រាជធានីភ្នំពេញ ៖ បុរស៤នាក់ ចូលហាងផឹកស៊ីមួយកន្លែង ដែលមានយីហោភ្នំពេញសាច់អាំង PPQ ត្រូវបុគ្កលិកនាំគ្នាព្រួតវាយដោយប្រើ ច្រវ៉ាក់សោ និងកែវស្រា បណ្ដាលឱ្យរងរបួសបែកក្បាលឈាមហូរស្រោចពេញខ្លួន ព្រោះពេលផឹកស៊ី មើលមុខប្អូនស្រីម្ចាស់ហាង ច្រើនពេក ។
ហេតុការណ៍នេះបានកើតឡើងវេលាម៉ោង១និង២០នាទីរំលងអធ្រាត្រចូលថ្ងៃទី១១ ខែមករា ឆ្នាំ២០១៩ នៅចំណុចហាងផឹកស៊ីយីហោ ភ្នំពេញសាច់អាំង ស្ថិតនៅតាមបណ្ដោយផ្លូវ លេខ១៣៦ ផ្សារកណ្ដាល២ ខណ្ឌដូនពេញ ។
តាមជនរងគ្រោះ ប្រាប់ឱ្យដឹងថា ពួកគាត់ធ្លាប់ចូលមកផឹកស៊ី ក្នុងហាងនេះជាច្រើនសារ មកហើយ ។ ហើយក្នុងចំណោមជនរងគ្រោះទាំង៤នាក់នេះ ក៏មានម្នាក់ជាបុគ្គលិក ក្នុងហាងនេះដែរ ដែលបាននាំមិត្តភក្តិ មកផឹកជុំគ្នា ហើយក្រោយពីផឹកស៊ីចប់ ពួកគាត់បានគិតលុយឱ្យគេរួចរាល់ដែរ ។ ប៉ុន្តែមិនដឹងយ៉ាងម៉េច ? ក្រោយពីគិតលុយរួច ពួកគាត់បាននាំគ្នាដើរចេញពីហាង ដល់ខាងទ្វារមុខ ស្រាប់តែក្រុមបុគ្គលិក នៅក្នុងហាងនាំគ្នាព្រួតវាយដោយប្រើសោច្រវ៉ាក់ និងកែវស្រា បណ្ដាលឱ្យរងរបួសធ្ងន់ ស្រាលទាំង៤នាក់ ។
បើតាមជនរងគ្រោះម្នាក់ទៀត ដែលជាបុគ្គលិកហាងនោះ បានឱ្យដឹងថា រឿងនេះ គឺកើតចេញដោយសារតែ គ្រាន់តែមិត្តភក្តិរបស់គាត់ម្នាក់(ជនរងគ្រោះ) មើលមុខប្អូនស្រីរបស់ម្ចាស់ហាង ទើបធ្វើឱ្យបុគ្គលិកហាងនោះ បង្កហិង្សាមកលើពួកគាត់ និងបណ្ដាលអោយរងរបួសទៀតផង រួចហើយក្រុមអ្នកបង្កនាំគ្នាចូលទៅខាងក្នុងហាង និងទាញទ្វារបិត ។
ក្រោយកើតហេតុ កម្លាំងសមត្ថកិច្ចមូលដ្ឋានចុះទៅអន្តរាគមន៍ដល់កន្លែងកើតហេតុទាំងយប់ និងហៅម្ចាស់ហាងដើម្បីធ្វើការសាកសួរ ។
បើតាមសម្ដីស្ត្រីម្នាក់ ជាអ្នកគ្រប់គ្រងហាង បានអោយដឹងដែរថា ក្រុមបុគ្គលិកក្នុងហាងរបស់គាត់ ក៏រងរបួសដែរ បន្ទាប់ពីវាយគ្នាទៅវិញទៅមក ដោយមិនទាន់ដឹងមូលហេតុនោះ ហើយគាត់ប្រាប់ឲ្យបុគ្គលិកបិទទ្វារចាក់សោសិន ព្រោះខ្លាចមានការវាយគ្នាម្ដងទៀត កុំឲ្យខូចខាតសម្ភារៈក្នុងហាង ។
ស្ត្រីអ្នកគ្រប់គ្រងហាង មានរូបស្រស់ សម្ដីស្រទន់ បន្តថា ទោះជាយ៉ាងណាក្នុងនាមគាត់ជាអ្នកគ្រប់គ្រងហាង គាត់នៅតែទទួលខុសត្រូវ ព្រោះជនរងគ្រោះជាភ្ញៀវ ពួកគាត់បានចូលមកហូបចុកលក្ខណៈធម្មតាប៉ុណ្ណោះ និងមិនមែនមកអុកឡុកហាងអ្វីឡើយ ហើយពេលហូបចប់ ពួកគាត់ក៏បានមកគិតលុយគ្រប់ចំនួនផងដែរ មិនបង្កបញ្ហាម្តងណាឡើយ ដូច្នេះ រូបគាត់សុំដោះស្រាយ និងសម្របសម្រួលជាមួយភ្ញៀវសិន ។
ស្ត្រីជាអ្នកគ្រប់គ្រងហាង បានចូលមកសម្របសម្រួលជាមួយអ្នករងរបួស ទាំង៤នាក់នោះ នៅចំពោះមុខសមត្ថកិច្ចប៉ុស្តិ៍ផ្សារកណ្ដាលទី២ ដោយភាគីខាងជនរងគ្រោះ សុំទាមទារជំងឺចិត្ត និងថ្លៃព្យាបាលរបួស ព្រោះមិនចង់ទៅប៉ុស្តិ៍ ដាក់ពាក្យបណ្ដឹងនាំវែងឆ្ងាយទេ ទើបភាគីខាងម្ចាស់ហាងព្រមសងថ្លៃព្យាបាលរបួស និងជម្ងីចិត្តចំនួន៧០០ដុល្លារដើម្បីបញ្ចប់រឿង និងធ្វើឯកសារបញ្ជាក់ថា មិនមានការគុំគួនគ្នាទៀតឡើយ ៕
