ភ្នំពេញ ៖ កម្លាំងមន្ត្រីកាំកុងត្រូល បានចុះពិនិត្យនិងឆែកឆេរមើលចំណីអាហារ បន្លែផ្លែឈឺ សាច់ និងទំនិញមួយចំនួនទៀត នៅផ្សារដើមគរ ដើម្បីបន្តស្វែងរកសារធាតុគីមីហាមឃាត់ នៅថ្ងៃទី១៨ ខែធ្នូ ឆ្នាំ ២០១៨នេះ ។
នៅក្នុងប្រតិបត្តិការនេះ មន្ត្រីកាំកុងត្រូល បានរកឃើញបង្គាជិត២០គីឡូក្រាម ដែលក្នុងបង្គានោះ បានចាក់ចាហួយចូលក្នុងពោះ ដើម្បីបង្កើនគីឡូ និងរកឃើញ ជីរណា ជាច្រើនគីឡូទៀត មានផ្ទុកសារធាតុគីមីហាមឃាត់ ។
ក្រុមការងារចុះត្រួតពិនិត្យសុវត្ថិភាពចំណីអាហារ នៅផ្សារដើមគរ ដែលជាកន្លែងធំមួយ ដែលលក់ចែកចាយលើទីផ្សារនានាក្នុងក្រុងភ្នំពេញ បានធ្វើតេស្តបមឋ និងយកគំរូចំនួនជាង៤០មុខ ដែលសង្ស័យមានហានិភ័យខ្ពស់ដូចជាសរសៃមីលឿង ប្រហិតសាច់គោ មឹក បង្គារ ត្រីងៀត ត្រីហើម សាច់ក្រកបាញ់កាញ់ លត គុយទាវសរសៃធំ គុយទាវសរសៃតូច គ្រឿងសមុទ្រ និងនំផ្សេងៗ បញ្ជូនមករថយន្តពិសោធន៍ចល័ត ដើម្បីរកសារធាតុគីមីហាមឃាត់ ។ ក្រោយពិនិត្យបឋមក្រុមការងារ បានរកឃើញចាហួយចាក់ក្នុងពោះបង្គា ដើម្បីបង្កើនគីឡូជិត២០គីឡូក្រាម ដែលអាជីវករកំពុងដាក់លក់ និងសារធាតុគីមីហាមឃាត់ក្នុងជីរណាចំនួន១៨គីឡូក្រាម ហើយក្រុមការងារក៏សម្រេចដកហូត យកទៅកម្ទេចចោលទាំងពីរ ។
ដោយឡែក អាជីវករបានត្រឹមតែ មន្ត្រីកាំកុងត្រូលរាជធានីភ្នំពេញអោយធ្វើកិច្ចសន្យាបញ្ឈប់តែប៉ុណ្ណោះ មិនមានវិធានការផ្លូវច្បាប់ណាមួយ ដើម្បីស្រាវជ្រាវរកជនខិលខូចមួយចំនួនលួចបញ្ចេញមកលក់ចែកចាយលើទីផ្សារនោះឡើយ ព្រោះថាសារធាតុគីមីដែលដាក់ទៅលើផលិតផលម្ហូបអាហារធ្វើអោយប៉ះពាល់ដល់សុខភាពអ្នកប្រើប្រាស់យ៉ាងខ្លាំងបង្កចេញទៅជាជំងឺកាចសាហាវនានា នៅពេលអនាគត ៕
