ភ្នំពេញ៖ នៅព្រឹកនេះ ភរិយារបស់លោក រ៉ាត់ រដ្ឋមុនី រួមជាមួយអ្នកគាំទ្រលោកប្រមាណជាង១០នាក់បានប្រមូលផ្តុំគ្នាធ្វើបាតុកម្មនៅមុខស្ថានទូតរុស្ស៊ីក្រុងភ្នំពេញ ដើម្បីអំពាវនាវតាមរយៈញត្តិឳ្យស្ថានទូតរុស្ស៊ីជួយអន្តរាគមន៍ឳ្យអាជ្ញាធរខ្មែរដោះលែងលោក រ៉ាត់ រដ្ឋមុនី ដែលកំពុងជាប់ឃុំ ពីបទញុះញង់ឳ្យមានការរើសអើង តាមរយៈវីដេអូអប់រំមួយដែលលោក រ៉ាត់ រដ្ឋមុនី បានផលិតមានចំណងជើងថា «ម្ដាយខ្ញុំលក់ខ្ញុំ» និងបានផ្សព្វផ្សាយតាមរយៈទូរទស្សន៍រុស្ស៊ី RT ។
លោក រ៉ាត់ រដ្ឋមុនី ត្រូវបានអាជ្ញាធរកម្ពុជាទៅនាំខ្លួនពីប្រទេសថៃមកកាន់ប្រទេសកម្ពុជាកាលពីរសៀលថ្ងៃទី១២ ធ្នូ ក្រោយពីលោកត្រូវបានអាជ្ញាធរថៃចាប់ និងឃុំខ្លួនអស់រយៈពេល៥ថ្ងៃនៅមណ្ឌលឃុំខ្លួនជនអន្តោរប្រវេសន៍ក្នុងទីក្រុងបាងកក ប្រទេសថៃ ហើយអាចប្រឈមនឹងទោសជាប់ពន្ធនាគារពី១ ឆ្នាំទៅ៣ឆ្នាំនិងពិន័យជាទឹកប្រាក់ពី២លានរៀលទៅ៦លានរៀល ប្រសិនបើតុលាការកម្ពុជារកឃើញថា លោកបានប្រព្រឹត្តបទល្មើសញុះញង់ឳ្យមានការរើសអើងពិតប្រាកដមែន ។
សូមបញ្ជាក់ថាវីដេអូរអប់រំមានចំណងជើងថា «ម្ដាយខ្ញុំលក់ខ្ញុំ» ដែលនិយាយអំពីម្ដាយ លក់កូនស្រីខ្លួនឯងបង្កើត បានធ្វើឳ្យរដ្ឋាភិបាលកម្ពុជាមិនពេញចិត្កយ៉ាងខ្លាំងដោយយល់ឃើញថា ជារឿងមិនពិត ធ្វើឳ្យខូចតម្លៃស្ត្រីខ្មែរ ក៏ដូចជាអាប់ឳនកិត្តិយសប្រទេសកម្ពុជាទាំងមូលផងដែរ ។
យោងតាមការបកស្រាយរបស់នារីវ័យក្មេងដែលជាតួអង្គសំខាន់នៅក្នុងវីដេអូអប់រំ «ម្ដាយខ្ញុំលក់ខ្ញុំ» បានឳ្យដឹងភ្លាមៗក្រោយពេលវីដេអូនោះមានការចាប់អារម្មណ៍នៅលើបណ្ដាញសង្គមហ្វេសប៊ុកក្នុងប្រទេសកម្ពុជា យ៉ាងដូច្នេះថា នាងពុំបានដឹងខ្លួនថា អ្នកផលិតវីដេអូដាក់ចំណងជើងធ្ងន់ៗបែបនេះទេ ព្រោះកាលនិយាយហៅនាងថត គឺគេបានអះអាងថា ថតរឿងអប់រំធម្មតាៗ ហើយពាក្យពេជន៍ដែលនាងនិយាយនៅក្នុងវីដេអូ គឺគ្រាន់តែនិយាយតាមប៉ារ៉ូល របស់អ្នកដឹកនាំតែប៉ុណ្ណោះ ។
នារីដដែលបានបន្តថា កាលណោះអ្នកផលិតបានប្រាប់ថា វីដេអូខាងលើដែលនាងសម្ដែង គឺមិនបង្ហាញនៅលើហ្វេសប៊ុកឡើយ គឺចាក់តែនៅលើទូរទស្សន៍ក្រៅប្រទេសប៉ុណ្ណោះ ដូចនេះមិនបាច់ឳ្យនាងបារម្ភខ្លាចខ្មាសគេទេ ប៉ុន្តែក្រោយមកអ្នកផលិត មានជនម្លោះជាមួយម្ដាយនាង ហើយក្នុងអំឡុងពេលនោះស្រាប់តែបានឃើញវីដេអូ «ម្ដាយខ្ញុំលក់ខ្ញុំ» ត្រូវបានគេចែករំលែកយ៉ាងច្រើននៅលើបណ្ដាញសង្គមហ្វេសប៊ុកទើបធ្វើឳ្យនាងមានអារម្មណ៍មិនល្អ ៕
សហការី KBN