សៀមរាប ៖ នេះជារឿងប្លែកមួយ ហើយក៏ធ្លាប់កើតមានកន្លងមកដែរ ក្នុងប្រទេសកម្ពុជា ហើយក៏ជារឿងហួសចិត្តមួយ ដែលក្រុមចោរ បានលួចចូលទៅផ្ទះលក់ឥវ៉ាន់មួយកន្លែង (លក់ចាប់ហ៊ួយ) ហើយបានគាស់អស់ស្រាបៀ ជាច្រើនកេះ យកតែក្រវិលកំប៉ុង តែប៉ុណ្ណោះ បំណងផ្សងសំណាងយករង្វាន់ធំ…? ដោយទុកទឹកស្រាបៀពេញកំប៉ុងដដែល ។
បើយោងតាមរយៈគណណីហ្វេសបុកបុរសម្នាក់ឈ្មោះថា «Raksmey…» បានបង្ហោះនូវរឿងរ៉ាវដ៏គួរឲ្យហួសចិត្តមួយនេះ កាលពីម៉ោង៨និង៣៦នាទីព្រឹកថ្ងៃទី១៣ ធ្នូ ២០១៨ ដោយសារចោរហេងស៊យមួយក្រុមបានប្លោះរបងចូលផ្ទះ អ្នកចាប់ហ៊ួយមួយកន្លែងនៅទុលមុខនឹងសណ្ឋាគារឥន្ទ្របុរៈ ក្រុងសៀមរាប រួចគាស់យកតែគ្រវិលកំប៉ុងអស់ស្រាបៀចំនួន១៥កេះ ដើម្បីផ្សងយករង្វាន់ធំ ។
ហ្វេសបុក Raksmey សរសេរយ៉ាងដូច្នេះថា ៖ «មហាចោរផ្សងសំណាងបានផ្លោះរបងផ្ទះបងលក់ចាប់ហ៊ួយ មួយកន្លែង ស្ថិតផ្សារក្រោម នៅទុលមុខនឹង សណ្ឋាគារឥន្ទ្របុរៈ ស្ថិតនៅសង្កាត់ស្វាយដង្គំ បានចូលទៅគាស់ស្រាបៀ អស់ចំនួន១៥កេះ យកតែក្រវិល(កំប៉ុង) ជាចុងក្រោយសូមអោយ អាជ្ញាធរមានសមត្ថកិច្ច ជួយអន្តរាគមន៍លើករណីនេះផង, ក៍សូមអរគុណដល់លោកចោរ អោយគិតពីអារម្មណ៍ម្ចាស់ទ្រព្យគេផង សូមជួយផ្សព្វផ្សាយទាំងអស់គ្នាកុំអោយមាន ដូចករណីខាងលើហ្នឹង បំណងល្អពីខ្ញុំ D.V.N អរគុណ» ។
សូមរម្លឹកថា ករណីដូចគ្នានេះ ធ្លាប់បានកើតឡើងនៅថ្ងៃទី២៣ ឧសភា មាន ក្រុមជនសង្ស័យមិនស្គាល់អត្តសញ្ញាណ បានលួចចូលតូបលក់ឥវ៉ាន់មួយកន្លែងរបស់ម្ចាស់ឈ្មោះ សាំង រឿប ភេទស្រី អាយុ៣៦ឆ្នាំ រស់នៅភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ ។ មកដល់ពេលនេះ ការស្រាវជ្រាវរបស់សមត្ថកិច្ច នៅមិនទាន់រកឃើញជនសង្ស័យនៅឡើយទេ ។ ករណីនេះ ជនសង្ស័យ ក៏មិនបានយកសម្ភារផ្សេងៗ ក្រៅតែពីក្រវិលកំប៉ុងស្រាបៀ មាន៖ ស្រាបៀលីអូ និងស្រាបៀអង្គរ ដើម្បីផ្សងសំណាងយករង្វាន់ធំ ៕
