ភ្នំពេញ ៖ ជនសង្ស័យ២នាក់ ធ្វើសកម្មភាពឆក់ទូរសព្ទ័ដៃពីបុរសម្នាក់ បានសម្រេច ប៉ុន្តែរត់មិនរួច ព្រោះបុរសម្នាក់បានប្រើជើងរន្ទះធាក់ក្រុមជនសង្ស័យបណ្តាលអោយដួលម៉ូតូ ត្រូវបានប្រជាពលរដ្ឋព័ទ្ធចាប់បានវាយទ្រមខ្លួន រួចប្រគល់ឲ្យសមត្ថកិច្ចប៉ុស្ដិ៍នគរបាលព្រែកព្នៅ ។
ហេតុការណ៍ចោរឆក់ខាងលើនេះ បង្កការភ្ញាក់ផ្អើលកាលពីវេលាម៉ោង៥និង៤០នាទីព្រឹក ថ្ងៃទី០៥ ខែធ្នូ ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៥ នៅចំណុចមុខវត្តពោធិ៍មង្គលភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
ជនសង្ស័យដែលត្រូវឃាត់ខ្លួនបានមាន ៖ ទី១ឈ្មោះ សន រស្មី ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិធំ សង្កាត់ពញាពន់ ខណ្ឌព្រែកព្នៅ និងជនសង្ស័យ ទី២ឈ្មោះ សឿន វុទ្ធី ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ ។
ជនសង្ស័យទាំង២នាក់ ត្រូវបានសមត្ថកិច្ចឃាត់ខ្លួនបណ្ដោះអាសន្ន និងកសាងសំណុំរឿងបន្តតាមនិតិវិធី ៕
