ភ្នំពេញ ៖ បុរសម្នាក់ដែលបានបាត់ស្លាកលេខរថយន្តអស់ជាច្រើនខែ ស្រាប់តែប្រទះឃើញជាប់នឹងរថយន្តមួយគ្រឿងផ្សេងទៀត ដែលគេ ចតទុកនៅម្តុំលក់រថយន្តក្បែរវត្តភ្នំ បង្កឱ្យមានការភ្ញាក់ផ្អើលកើតឡើងនៅវេលាម៉ោង ១១និង៣០នាទីព្រឹក ថ្ងៃទី២៨ ខែវិច្ឆិកា ឆ្នាំ២០១៨ នៅចំណុចសួនច្បារវត្តភ្នំ ក្នុងសង្កាត់វត្តភ្នំ ខណ្ឌដូនពេញ ។
ប្រភពពីបុរសម្នាក់ ដែលបានអះអាងថា ខ្លួនជាម្ចាស់ស្លាកលេខរថយន្តនោះ បានប្រាប់ឱ្យដឹងថា គាត់បានធ្វើដំណើរតាមផ្លូវ ហើយក៏បានប្រទះឃើញស្លាកលេខរថយន្តរបស់គាត់ ដែលបានបាត់អស់រយៈពេលជាង២ឆ្នាំមកហើយ ស្រាប់តែពេលនេះ ឃើញគេយកទៅពាក់លើរថយន្តមួយគ្រឿងទៀត ដែលគេចតទុកចោលនៅក្បែរវត្តភ្នំទៅវិញ ។
តាមប្រភពដដែល បានប្រាប់ឱ្យដឹងទៀតថា ស្លាកលេខរថយន្តដែលបុរសជាម្ចាស់ប្រទះឃើញនេះ គឺមានលេខភ្នំពេញ 2H-0621 បាត់តាំង២ឆ្នាំមុន នៅម្តុំស្ទឹងមានជ័យ ។ លុះដល់ព្រឹកនេះ ក៏ស្រាប់តែបានប្រទះឃើញស្លាកលេខរថយន្តរបស់គាត់ដែលបាត់នោះ ត្រូវបានគេយកទៅដាក់ជាប់នឹងរថយន្តម៉ាក CORONA ព៌ណទឹកប្រាក់មួយគ្រឿងទៀត ដែលចតទុកចោលនៅលើផ្លូវក្បែរសួនច្បារវត្តភ្នំ ហើយគាត់ក៏បានរាយការណ៍ទៅ ប្តឹងកម្លាំងមានសម្ថកិច្ចទាំងខណ្ឌដូនពេញ និងសមត្ថកិច្ចប៉ុស្តិ៍នគរបាលស្ទឹងមាន១ ឱ្យជួយឃាត់ទុកតែម្តង ។
ក្រោយពេលកើតហេតុ កម្លាំងមានសម្ថកិច្ចមូលដ្ឋានក៏បានចុះទៅធ្វើអន្តរាគមន៍ឃាត់រថយន្ត នៅនឹងកន្លែងកើតហេតុ រង់ចាំសហការជាមួយសមត្ថកិច្ចប៉ុស្តិ៍ស្ទឹងមានជ័យ ហើយបានបញ្ជូនរថយន្តទាំង២គ្រឿង ទៅកាន់នគរបាលប៉ុស្តិ៍ស្ទឹងមានជ័យ១ ដើម្បីធ្វើការដោះស្រោយគ្នាបន្តទៅទៀត ៕
