ភ្នំពេញ ៖ អគ្គនាយកដ្ឋានកាំកុងត្រូល បានឲ្យដឹងថា កាលពីថ្ងៃទី១៥ ខែវិច្ឆិកា ឆ្នាំ២០១៨ មន្ដ្រីអគ្គនាយកដ្ឋានកាំកុងត្រូល សហការជាមួយអាជ្ញាធរដែនដី បានបន្តចុះផ្សព្វផ្សាយអំពីគុណភាព សុវត្ថិភាពម្ហូបអាហារ ត្រួតពិនិត្យទៅលើម្ហូបអាហារវេចខ្ចប់ស្រាប់ និងធ្វើតេស្តបឋមលើនំបញ្ចុក នំបាញ់ឌុក នំចាក់ចាន់ បាញ់កាញ់ លត សរសៃគុយទាវ និងផលិតផលម្ហូបអាហារមួយចំនួនទៀត ដើម្បីរកសារធាតុគីមីហាមឃាត់ ។
ជាលទ្ធផលការធ្វើតេស្តបឋម បានរកឃើញ ការដាក់លាយសារធាតុគីមីហាមឃាត់ «បូរ៉ាក់» នៅក្នុង នំចាក់ចាន់ ដែលដាក់តាំងលក់ នៅផ្សារច្បារអំពៅ ត្រូវមន្ត្រីជំនាញបានដកហូតកម្ទេចចោលភ្លាមៗផងដែរ និងធ្វើបែបបទកិច្ចសន្យាជាមួយអ្នកលក់ឲ្យបញ្ឈប់ ការប្រើប្រាស់សារធាតុគីមីនេះបន្តទៀត ករណីមិនរៀងចាល អាជ្ញាធរនឹងចាត់វិធានការតាមផ្លូវច្បាប់ ។
តាមព័ត៌មានដែលផ្សព្វផ្សាយនៅលើទំព័រហ្វេសប៊ុក អគ្គនាយកដ្ឋានកាំកុលត្រូល បានឲ្យដឹងថា មន្ត្រីសាខាកាំកុងត្រូលតំបន់សេដ្ឋកិច្ចពិសេសភ្នំពេញ សាខាកាំកុងត្រូលតំបន់សេដ្ឋកិច្ចពិសេស Kerry World Bridge Logistic សាខាកាំកុងត្រូលអាកាសយានដ្ឋានអន្តរជាតិភ្នំពេញ សាខាកាំកុងត្រូលរាជធានីភ្នំពេញ សាខាកាំកុងត្រូលផែស្ងួតចុងទីភ្នំពេញ និងសាខាកំពង់ផែអន្តរជាតិភ្នំពេញ ដោយទទួលបានការចូលរួមសហការពីមន្ត្រីមន្ទីរពិសោធន៍ និងគណៈកម្មការផ្សារ បានចុះប្រចាំការនៅតាមបណ្តាផ្សារសំខាន់ៗ ចំនួន៩ នៅរាជធានីភ្នំពេញមានដូចជា ៖ ផ្សារជម្ពូវ័ន ផ្សារសិនជូរីប្លាហ្សា ផ្សារអូរឡាំពិក ផ្សារអូរឬស្សី ផ្សារដើមគរ ផ្សារស្ទឹងមានជ័យ ផ្សារធំថ្មី ផ្សារទួលទំពូង និងច្បារអំពៅ ។
គោលដៅសំខាន់នៃការត្រួតពិនិត្យគឺដើម្បី ស្រាវជ្រាវ ទប់ស្កាត់ការចរាចរណ៍ទំនិញខូចគុណភាព ក្លែងបន្លំស្លាកសញ្ញា ផុតកំណត់កាលបរិច្ឆេទប្រើប្រាស់ និងមានសារធាតុគីមីហាមឃាត់ ៕