ខេត្តបន្ទាយមានជ័យៈ បុរសល្មោភកាមម្នាក់មានប្រពន្ធទៅហើយ បែរជាទុកឲ្យតណ្ហាដឹកមុខ ចាប់បង្ខំប្អនថ្លៃរំលោភសេពសន្ថវៈ រហូតបានសម្រេច ហើយត្រូវសមត្ថកិច្ចចុះទៅឃាត់ខ្លួន កាលពីវេលាម៉ោង៣ និង៣០នាទីរសៀល ថ្ងៃទី១៥ វិច្ឆិកា នៅក្នុងវត្តតេជោភ្នំឆត្រ ស្រុកស្វាយចេក។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវករណីចាប់រំលោភសេពសន្ថវៈនោះ គឺកាលពីវេលាម៉ោង៨ និង៣០នាទីយប់ ថ្ងៃទី១២ ខែវិច្ឆិកា ឆ្នាំ២០១៨ នារីរងគ្រោះបានពឹងឲ្យជនសង័្សយដែលជាបងថ្លៃ ជូននាងត្រឡប់ទៅផ្ទះវិញ។ លុះពេលគេបើកម៉ូតូជូននាងមកដល់ចំណុចដីក្រុមហ៊ុនជាតិអភិវឌ្ឍន៍ ដែលមានចម្ងាយពីផ្លូវជាតិលេខ៥៨ ប្រហែល៥០០ម៉ែត្រ ស្ថិតក្នងស្រុកថ្មពួក ខេត្តបន្ទាយមានជ័យ ឃើញឱកាសល្អ ក៏ចាប់បង្ខំប្អូនថ្លៃ ប៉ុនប៉ងរំលោភសេពសន្ថវៈ។
ប្រភពព័ត៌មានដដែល បានបន្ដថា ស្ថិតក្នុងសភាពបែបនេះ ជនរងគ្រោះបានខំប្រឹងរើបម្រះ តែត្រូវជនសង័្សយបានវាយតប់នាង រហូតសន្លប់សន្ដូកស្ដឹង ហើយក៏ចាប់នាងរំលោភរហូតបានសម្រេច។ ប៉ុន្តែក្រោយពេលជនសង័្សយរំលោភជនរងគ្រោះរួច ទើបនាងដឹងខ្លួនឡើងវិញ ហើយព្យាយាមអង្វរករបងថ្លៃឲ្យជូននាងទៅត្រឡប់មកផ្ទះវិញ។ លុះពេលជនសង័្សយបើកម៉ូតូដឹកនាងមកដល់ពាក់កណ្តាលផ្លូវ នាងឃើញអ្នកឆ្លុះសត្វ ក៏លោតចុះពីលើម៉ូតូ និងស្រែកហៅឲ្យគេជួយ។ ឮបែបនេះ អ្នកឆ្លុះសត្វបានរត់មកជួយជនរងគ្រោះ និងហូតខ្សែក្រវាត់វាយប្រហារទៅលើជនសង័្សយចំនួន២ខ្សែក្រវាត់។ ឃើញស្ថានភាពមិនស្រួល ជនសង្ស័យបានព្យាយាម បើកម៉ូតូគេចខ្លួនបាត់ ចាប់តាំងពីយប់ថ្ងៃកើតហេតុ។
មន្រ្ដីនគរបាលស្រុកថ្មពួក បានឲ្យដឹងថា ជនសង័្សយជាប់ពាក់ព័ន្ធនឹងករណីចាប់រំលោភសេពសន្ថវៈ ហើយត្រូវសមត្ថកិច្ចឃាត់ខ្លួននោះ ឈ្មោះ កែវ វណ្ណឌី អាយុ២៦ឆ្នាំ មុខរបរជាកម្មករ មានលំនៅក្នុងភូមិថ្មរមៀលកើត ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ រីឯនារីរងគ្រោះ ឈ្មោះ ក ស អាយុ១៧ឆ្នាំ មានលំនៅក្នុងស្រុកថ្មពួក ខេត្តបន្ទាយមានជ័យ។ ជនរងគ្រោះ និងជនសង័្សយ ត្រូវជាបងថ្លៃ និងប្អូនថ្លៃ។
មន្រ្ដីនគរបាលដដែល បានបន្ដថា បន្ទាប់ពីកើតមាននូវករណីចាប់រំលោភសេពសន្ថវៈនោះមក អាណាព្យាបាលរបស់ជនរងគ្រោះ បាននាំនាងមកដាក់ពាក្យបណ្ដឹង នៅក្នុងប៉ុស្ដិ៍នគរបាលរដ្ឋបាល។ យោងតាមពាក្យបណ្ដឹងនេះ សមត្ថកិច្ចជំនាញ នៃអធិការដ្ឋាននគរបាលស្រុក បានស្រាវជ្រាវ រហូតឃាត់ខ្លួនជនសង័្សយបាន កាលពីវេលាម៉ោង៣ និង៣០នាទីរសៀល ថ្ងៃទី១៥ វិច្ឆិកា នៅក្នុងវត្តតេជោភ្នំឆត្រ ស្រុកស្វាយចេក ខេត្តបន្ទាយមានជ័យ។
ក្រោយពេលឃាត់ខ្លួន សមត្ថកិច្ចស្រុកស្វាយចេកបានធ្វើកំណត់ហេតុ ប្រគល់ជនសង័្សយជូននគរបាលស្រុកថ្មពួក នាំមកសាកសួរ និងកសាងសំណុំរឿង បញ្ជូនទៅកាន់ស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី៕