ខេត្តក្រចេះ ៖ សមត្ថកិច្ចចម្រុះ បានចុះបង្ក្រាបទីតាំងសិប្បកម្មកែច្នៃឈើមួយកន្លែង របស់ជនជាតិវៀតណាម ដែលធ្វើបែបអនាធិបតេយ្យ គ្មានច្បាប់អនុញ្ញាតិពីរដ្ឋបាលព្រៃឈើ ។
ការចុះចាប់សិប្បកម្មកែច្នៃឈើ ធ្វើឡើងកាលពីព្រឹកថ្ងៃទី១៤ ខែវិច្ឆកា ឆ្នាំ២០១៨ នេះ ស្ថិតនៅភូមិក្រគរ សង្កាត់ក្រគរ ក្រុងក្រចេះ ។
ប្រភពពីសមត្ថកិច្ច បានឲ្យដឹងថា កម្លាំងចម្រុះដែលដឹកនាំដោយ លោក ជា សុភក្ត្រ័ ព្រះរាជអាជ្ញារងសាលាដំបូងខេត្តក្រចេះ បានចុះចាប់សិប្បកម្មកែច្នៃឈើ និងរឹបអូសឈើបានជាច្រើនកំណាត់ ។ ដែលទីតាំងនេះ តែងតែធ្វើសកម្មភាព អារ ជ្រៀក ឈូសឈើដោយម៉ាស៊ីន លាន់សំលេងទ្រហឹង ពេញភូមិ រំខានដំណេកដល់អ្នកភូមិ ពេលសម្រាកពេលថ្ងៃ ថែមទាំងយកកាកសំណល់ឈើ ឬអាចម៍អាណា ចាក់ចូលក្នុងទន្លេ បណ្ដាលឲ្យប៉ះពាល់ដល់បរិស្ថាន ថែមទៀត ។
ដោយឡែកលោក ម៉ី វុទ្ធី នាយសង្កាត់រដ្ឋបាលព្រៃឈើដីថ្មក្រែ បានឲ្យដឹងថា ឈើទាំងនោះជាប្រភេទឈើប្រណីត និងឈើលេខ១ ត្រូវបានរឹបអូសយកទៅរក្សាទុក នៅស្ថានីយ៍បណ្ដុះកូនឈើខ្សា ដើម្បីវាស់វែង និងពិន័យ ទៅតាមច្បាប់របស់រដ្ឋបាលព្រៃឈើ ៕
