ភ្នំពេញៈ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីវេលាម៉ោង១០ និង៥៥នាទីព្រឹក ថ្ងៃទី១៣ ខែវិច្ឆិកា ឆ្នាំ២០១៨នេះ បានដឹកនាំគណៈប្រតិភូជាន់ខ្ពស់កម្ពុជាទៅដល់ប្រទេសសិង្ហបុរី ដើម្បីចូលរួមកិច្ចប្រជុំកំពូលអាស៊ានលើកទី៣៣ និងកិច្ចប្រជុំជាច្រើនទៀត ដែលនឹងប្រព្រឹត្ដទៅ ចាប់ពីថ្ងៃទី១៣-១៥ ខែវិច្ឆិកា។
នៅក្នុងប្រទេសសិង្ហបុរី សម្ដេចនាយករដ្ឋមន្ត្រី នឹងចូលរួមក្នុងកិច្ចប្រជុំកំពូលអាស៊ានលើកទី៣៣ ក្រោមមូលបទ «ភាពរឹងមាំ និងនវានុវត្តន៍របស់អាស៊ាន»។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្ដិការអន្ដរកម្ពុជា។
ក្រៅពីការចូលរួម នៅក្នុងកិច្ចប្រជុំកំពូលអាស៊ានលើកទី៣៣ ដែលធ្វើឡើងជាទៀងទាត់មួយឆ្នាំ ពីរដងនោះ សម្ដេចប្រមុខរដ្ឋាភិបាលកម្ពុជា គ្រោងនឹងចូលរួមនៅក្នុងកិច្ចប្រជុំកំពូលពាក់ព័ន្ធជាច្រើនទៀត រួមាន កិច្ចប្រជុំកំពូលក្រៅផ្លូវការអាស៊ាន-អូស្ត្រាលី, កិច្ចប្រជុំកំពូលអាស៊ាន-ចិនលើកទី២១, កិច្ចប្រជុំកំពូលអាស៊ាន-សាធារណរដ្ឋកូរ៉េលើកទី២០, កិច្ចប្រជុំកំពូលអាស៊ាន-រុស្ស៊ី លើកទី៣, កិច្ចប្រជុំកំពូលអាស៊ាន-ជប៉ុនលើកទី២១, កិច្ចប្រជុំកំពូលក្រៅផ្លូវការអាស៊ាន-ឥណ្ឌា និងកិច្ចប្រជុំកំពូលអាស៊ាន-សហរដ្ឋអាមេរិក។
លើសពីកិច្ចប្រជុំកំពូលអាស៊ានបូក៣លើកទី២១ កិច្ចប្រជុំកំពូលអាស៊ីបូព៌ាលើកទី១៣ កិច្ចប្រជុំចង្អៀតកំពូលអាស៊ីបូព៌ាអមដោយអាហារថ្ងៃត្រង់ និងកិច្ចប្រជុំថ្នាក់ដឹកនាំ នៃភាពជាដៃគូសេដ្ឋកិច្ចទូលំទូលាយក្នុងតំបន់លើកទី២ជាដើម។ ស្របពេលជាមួយគ្នានេះ សម្ដេចនឹងអញ្ជើញចូលរួម នៅក្នុងកិច្ចប្រជុំជាមួយក្រុមប្រឹក្សាពិគ្រោះយោបល់ធុរកិច្ចអាស៊ាន ព្រមនឹងមានជំនួបទ្វេភាគី ជាមួយប្រមុខគណៈប្រតិភូ នៃបណ្តាប្រទេសមួយចំនួនទៀត។
ដោយឡែក គណៈប្រតិភូកម្ពុជា ដែលអមដំណើរសម្ដេចនាយករដ្ឋមន្ត្រី ទៅកាន់ប្រទេសសិង្ហបុរី រួមមាន លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា, លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម, លោក ហង់ ជួនណារ៉ុន រដ្ឋមន្ត្រីក្រសួងអប់រំ ព្រមទាំងឥស្សរជនជាន់ខ្ពស់រដ្ឋាភិបាលជាច្រើនរូបទៀត។
សម្ដេចនាយករដ្ឋមន្រ្ដីបានសរសេរនៅលើទំព័រហ្វេសបុករបស់សម្ដេចថា ទោះជាសម្ដេចចេញទៅបំពេញបេសកកម្ម នៅក្រៅប្រទេសក្ដី តែសម្ដេចតែងតែនឹករឭកដល់ប្រជាពលរដ្ឋកម្ពុជា គ្រប់ទីកន្លែងទាំងអស់៕
