ភ្នំពេញ ៖ អាជ្ញាធរខណ្ឌមានជ័យ បានបញ្ជាឲ្យកម្លាំងគណៈបញ្ជារការឯកភាពខណ្ឌមានជ័យ ចុះទៅផ្អាកក្រុមហ៊ុន នឹម ម៉េង ឲ្យបញ្ឈប់ចាក់ការដី លុបប្រឡាយរំដោះទឹកស្អុយ ជាបន្ទាន់ ស្របពេលដែលសាលារាជធានីភ្នំពេញកំពុងតែស្តារប្រព័ន្ធប្រឡាយមួយចំនួននៅក្នុងក្រុង ដើម្បីរំដោះទឹកភ្លៀង ជនលិចនារដូវវស្សា ។
ការចុះទៅផ្អាកក្រុមហ៊ុនរបស់លោកផ្កាយ៣ ខាងលើនេះ ធ្វើឡើងព្រឹកថ្ងៃទី១៣ ខែវិច្ឆិកា ឆ្នាំ២០១៨ ស្ថិតនៅចំណុចភូមិដំណាក់ធំ២ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។
សមត្ថកិច្ចចុះទៅផ្អាកនេះក៏ដោយសារក្រុមហ៊ុនលោកផ្កាយ៣ នឹម ម៉េង ធ្វើការចាក់ដីលប់ ប៉ុន្មានថ្ងៃមកហើយ ទើបប្រជាពលរដ្ឋមានការភិតភ័យខ្លាច លិចលង់ លំនៅដ្ឋានផ្ទះ សម្បែងរបស់ពួកគាត់នៅរដូវវស្សា ខាងមុខនោះ ក៏ប្រញាប់រាយការណ៏ ជូនលោកចៅសង្កាត់ ស្ទឹងមានជ័យ៣ ហើយលោកចៅសង្កាត់ ក៏បានរាយការណ៍ជូនថ្នាក់លើបន្តផងដែរ ។
ក្រោយពីលោកអភិបាលខណ្ឌមានជ័យ ទទួលបានព័ត៌មានថា មានការចាក់ដីលុបប្រឡាយរំដោះផ្លូវទឹក ទើបគណៈបញ្ជាការឯកភាពខណ្ឌមានជ័យ ក៏បានដឹកនាំកម្លាំងចុះឃាត់ បញ្ឈប់ការចាក់ដី រំលោភប្រឡាយរំដោះទឹក នឹងឃាត់រថយន្តដឹកដី ម៉ាកយីឌុប ចំនួន៦គ្រឿង យកទៅរក្សាទុក នៅសាលាខណ្ឌមានជ័យ ដើម្បីដោះស្រាយគ្នាតាមផ្លូវច្បាប់ ៕
