ភ្នំពេញ ៖ ឃាត់ខ្លួនស្ត្រីម្នាក់ ដែលជាមេតុងទីន ដែលបានបោកប្រាស់ រត់ចោលកូនៗតុងទីន ជាក្រុមអាជីវករផ្សារឯករាជ្យ១ និងអាជីវករផ្សារកាណាឌីយ៉ា រាប់រយនាក់ សរុបជាទឹកប្រាក់ជាង៣០ម៉ឺនដុល្លារ ។
ករណីនេះកើតឡើងនៅថ្ងៃទី០១ ខែវិច្ឆិកា ឆ្នាំ២០១៨នេះ ចំណុចផ្សារកាណាស៊ីធី ស្ថិតនៅក្នុងសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
បើតាមកូនតុងទីនម្នាក់ បានប្រាប់ឲ្យដឹងថា ស្ត្រីដែលជាមេតុងទីនបោកលុយនោះ មានឈ្មោះ ឆេង សារ៉ា អាយុ៣៩ឆ្នាំ ស្នាក់នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ប្រភពដដែរបន្តថា ស្ត្រីដែលជាមេតុងទីនបោកប្រាស់នេះ ជាអ្នកគួកជេរដីផង និងធ្លាប់រកស៊ីបោះដុំឥវ៉ាន់ចាប់ហួយ នៅផ្សារឯករាជ្យ១ និងផ្សារកាណាឌីយ៉ា រហូតបានស្គាល់គ្នាជិតឌិត ក៏បាននាំគ្នាលេងតុងទីន ចាប់ពីក្បាល២ម៉ឺនរៀល ដល់ក្បាល១០០ដុល្លារ ចំនួនអ្នកលេងតុងទីជិត៥០០នាក់ អ្នកខ្លះលេង៣ក្បាល និង៨ក្បាល ។ ពួកគាត់មានអ្នកខ្លះលេងរយ:ពេល៦ឆ្នាំ ខ្លះ៣ឆ្នាំ និងខ្លះទៀត២ឆ្នាំ ហើយក្នុងម្នាក់ៗ អ្នកខ្លះបង់តិចបំផុត ជាង១,០០០ដុល្លារ រីឯខ្លះទៀតរហូតដល់ទៅជាង៣ម៉ឺនដុល្លារក៏មាន ។
ប្រភពបន្តទៀតថា មេតុងទីន ប្រើល្បិចបោកប្រាស់ ក្នុងរូបភាពភូត កុហកថ្ងៃនះ សប្តាហ៍នេះ ឬខែនេះ ។ មេតុងទីនប្រាប់ថា កូនឈ្មោះនេះ ឈ្មោះនោះ ដេញបាន តែធាតុពិត គ្មានកូនៗណាដេញបានឡើយ ចម្លើយឆ្លើយប្រាប់ចេញពីពីមាត់ខ្លួនឯង ។
លុះរហូតអស់មនុស្ស អ្នកលេង កូនៗ ម្នាក់ៗសុទ្ធតែសំអាងថាខ្លួន កើបលុយ ក្រោយគេគ្រប់គ្នា ។ តែលុយមិនដឹងថា កើបលុយនៅឯណា រហូតបែកធ្លាយរឿង ទើបដឹងថា មេបោកប្រាស់ ធ្វើឲ្យម្នាក់ៗ ខាតបង់អស់លុយរាប់រយ ពាន់ ដុល្លាររហូតដល់ខ្ទង់ម៉ឺនក៏មាន ។
រីឯកូនតុងទីនម្នាក់ទៀត បានអោយអ្នកសារព័ត៌មានយើងដឹងថា អស់រយ:ពេលជាង៦ឆ្នាំមកនេះ ស្ត្រីរូបនេះ ជាមេតុងទីនល្អទេ បានលេងជាមួយកូនតុងទីនយ៉ាងល្អប្រសើរ ប៉ុន្តែមិនដឹងយ៉ាងម៉េច រយ:ពេលជាង៥ខែ ចិងក្រោយនេះ មេតុងទីន បានព្យាយាមមិនឲ្យកូនតុងទីនផ្សេងៗដេញយកលុយនោះឡើយ ហើយប្រុងរត់ចោលកូនតុងទីនទាំងអស់ ដោយគេចវេស មិនខ្ចីលើកទូរស័ព្ទទេ ហើយបានរត់គេចខ្លួនបាត់អស់រយ:ពេលជិត៦ខែមកហើយ ទើបកូនតុងទីនទាំងអស់នោះ បានដឹងថា មេតុងទីនបោក ក៏បានរត់មកដាក់ពាក្យបណ្តឹង នៅផ្នែកព្រហ្មទណ្ឌខណ្ឌពោធិ៍សែនជ័យ ដើម្បីជួយអន្តរាគមន៍ តែចៃដន្យក្រុមកូនតុងទីន បានជួបស្ត្រីជាមេតុងទីននោះ នៅក្នុងផ្សារកាណាស៊ីធី ទើបនាំគ្នាឃាត់ខ្លួនប្រគល់ ឲ្យនគរបាលចាត់ ។
ស្ត្រីសង្ស័យត្រូវបាននគរបាលព្រហ្មទណ្ឌខណ្ឌពោធិសែនជ័យ ឃាត់ខ្លួនតាមបណ្តឹងជនរងគ្រោះ២នាក់ ដើម្បីសាកសួរ និងកសាងសំណុំរឿង អនុវត្តន៍ទៅតាមនីតិវិធី ៕