មាន់ជល់មួយក្បាល ជាពូជមាន់ដ៏កម្រ ដែលមានឈ្មោះថា «Chao Hong Thong» ដែលមានរោមកន្ទុយវែង ប្រវែង១ម៉ែត្រ ត្រូវបានគេហ៊ានទិញក្នុងតម្លៃដល់២០លានបាត (ប្រមាណជាជាង៦០ម៉ឺនដុល្លារអាមេរិក) ប៉ុន្តែម្ចាស់វា នៅតែមិនព្រមលក់ទៀត ។
បើតាមកាសែតបាងកកប៉ុស្តិ៍របស់ថៃ បានចុះផ្សាយថា មាន់ជល់មួយក្បាលនេះ ជាពូជមាន់ដ៏កម្រ និងពូកែ ដែលអ្នកនិយមលេងល្បែងបញ្ចល់មាន់នៅថៃ បានស្គាល់ហើយហៅវាថា ជាស្ដេចមាន់ជល់ ដែលមានម្ចាស់ជាស្ត្រី មានឈ្មោះថា ប៊ូសារិន បានចិញ្ចឹមវា នៅក្នុងខេត្តសាមុទប្រាកាន ប្រទេសថៃ ។
អ្នកស្រី ប៊ូសារិន បានបដិសេធសំណើលក់ក្នុងតម្លៃជាង៦០ម៉ឺនដុល្លារនេះ ក៏ដោយសារ អ្នកស្រីស្រលាញ់វាខ្លាំងពេក រហូតមិនដាច់ចិត្តបែកពីវាឡើយ ។ហើយមាន់ជល់មួយក្បាលនេះ ជល់មិនដែលចាញ់ម្តងណាឡើយ រហូតក្លាយជាម្ចាស់ជើងឯកមាន់ជល់នៅប្រទេសថៃ ដែលអ្នកស្រុកហៅវាថា ស្ដេចមាន់ជល់ Chao Hong Thong ។
អ្នកស្រី បញ្ជាក់ថា ចាប់តាំងពីអ្នកស្រីទទួលបានមាន់ជល់មួយក្បាលនេះមក អ្នកស្រីមានសំណាងល្អរហូត ហើយអ្នកស្រីស្រលាញ់មាន់ជល់នេះ ដូចជាកូនរបស់ខ្លួនឯងអីចឹង ។ ព្រោះជាច្រើនឆ្នាំមកនេះ វាបានផ្ដល់ប្រាក់ដល់អ្នកស្រីរាប់លានបាត ពីការបង្កាត់ពូជកូនមាន់ជល់ បានយ៉ាងច្រើនផងដែរ ៕
