ភ្នំពេញ ៖ ជនសង្ស័យម្នាក់ ត្រូវបានកម្លាំងកងអាវុធហត្ថខណ្ឌទួលគោកបង្ក្រាបចាប់ជាក់ស្តែងជាប់ពាក់ព័ន្ធទៅនឹងករណីលួចកាច់សោកម៉ូតូយ៉ាងសកម្ម ក្នុងរាជធានីភ្នំពេញ ខណៈកម្លាំងកំពុងជិះល្បាតតាមមូលដ្ឋាន ។
ក្នុងប្រតិបិត្តការបង្ក្រាបជនសង្ស័យលួចកាច់សោកម៉ូតូ ធ្វើឡើងនៅវេលាម៉ោង០៧និង១០នាទី ថ្ងៃទី១៥ ខែតុលា ឆ្នាំ២០១៨ ថោយដកហូតបានម៉ូតូ០១គ្រឿង ម៉ាកហុងដា សេ១២៥ ពណ៌ខ្មៅ ពាក់ស្លាកលេខ ភ្នំពេញ 1GQ-1987 ។
ជនសង្ស័យមានឈ្មោះ ចាន់ណា វិរៈឆៃ ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះម្តាយមីង នៅម្តុំផ្សារពោធិ៍ចិនតុង ខណ្ឌពោធិ៍សែនជ័យ រាជធានីភ្នំពេញ មានស្រុកកំណើត នៅភូមិព្រែកថ្មី ស្រុកកោះធំ ខេត្តកណ្តាល ។
បច្ចុប្បន្ន ជនសង្ស័យខាងលើត្រូបានបញ្ជូនទៅការិយាល័យបទល្មើសព្រហ្មទណ្ឌកងរាជអាវុធហត្ថរាជធានីភ្នំពេញ ដើម្បីធ្វើការសួរចម្លើយ និងកសាងសំណុំរឿងបញ្ជូនទៅតុលាការ ដើម្បីចាត់ការតាមនិតិវិធីនៃច្បាប់ ៕
