ភ្នំពេញ ៖ ជនជាតិចិនចំនួន៩១នាក់ ក្នុងមានស្រី២១នាក់ ពាក់ព័ន្ធករណីជំរិតទារប្រាក់តាមប្រព័ន្ធទូរគមនាគមន៍ (VOIP) និងលក់ផលិតផលក្លែងក្លាយ ត្រូវបានកម្លាំងសមត្ថកិច្ចនៃនាយកដ្ឋានអន្តោរប្រវេសន៍ ចាប់បញ្ជូនតាមជើងយន្តហោះពិសេសរបស់ប៉ូលិសខេត្តហ្គ័ងចូវ របស់ប្រទេសចិន ចេញពីកម្ពុជា នៅព្រឹកថ្ងៃទី១៥ ខែតុលា ឆ្នាំ២០១៨ នៅអាកាសយាន្តអន្តរជាតិភ្នំពេញ ។
ប៉ូលិសខេត្តហ្គ័ងចូវ របស់ចិន ដែលមកទទួលមានចំនួន១៨២នាក់ ។ ជនសង្ស័យត្រូវបានបញ្ជូនទៅចិនវិញ គឺតាមជើងយន្តហោះពិសេសប្រភេទ A330 (ជើងយន្តហោះលេខ CZ3001/CZ3002) ។
សមត្ថកិច្ចនៃនាយកដ្ឋានអន្តោរប្រវេសន៍ លោក ហៃ សិលា បានប្រាប់អ្នកសារព័ត៌មាន ថា ការឃាត់ខ្លួនជនជាតិចិនទាំង៩១នាក់នេះ បានធ្វើឡើង កាលពីអំឡុងខែកញ្ញា ឆ្នាំ២០១៨ ស្ថិតនៅទីតាំងផ្សេងគ្នា ក្នុងខេត្តកំពត រួមទាំងកាស៊ីផងដែរ ។
លោកបានបន្តថា ការឃាត់ខ្លួននេះ នាយកដ្ឋានអន្តោរប្រវេសន៍នៃប្រទេសកម្ពុជាបានសហការណ៍ជាមួយ និងកម្លាំងសមត្ថកិច្ចចិន និងអនុវត្តតាមសាលដីការបស់សមត្ថកិច្ចចិន ឈានដល់ការឃាត់ខ្លួនជនជាតិចិនប្រុសស្រីទាំងអស់ជាបន្តបន្ទាប់ រហូតនៅព្រឹកថ្ងៃទី១៥ តុលា ២០១៨ នេះដើម្បីបញ្ចូនទៅប្រទេសចិនវិញ និងចាត់ការទៅតាមផ្លូវច្បាប់ នៃប្រទេសចិន ៕
