ព្រះសីហនុ ៖ ប្រភពច្បាស់ការណ៍ពីក្នុងសាលាខេត្តព្រះសីហនុ បានប្រាប់អោយដឹងនៅមុននេះបន្តិចថា ក្រុមត្រួតពិនិត្យនេះ ដឹកនាំដោយលោក ប៉ែន សុផល រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នឹងទៅដល់ទីតាំងចាក់ដីចូលឆ្នេរព្រែកត្រែង ក្នុងឃុំអូរត្រេះ ស្រុកស្ទឹងហាវ ព្រំប្រទល់សង្កាត់លេខ១ ក្រុងព្រះសីហនុ ខេត្តព្រះសីហនុ នៅវេលាម៉ោង២រសៀលថ្ងៃទី១៨ ខែកញ្ញា ឆ្នាំ២០១៨នេះ ។
ប្រភពពីក្នុងសាលាខេត្តព្រះសីហនុ បានបញ្ជាក់ថា មន្ត្រីជាន់ខ្ពស់របស់ក្រសួងរៀបចំដែនដី នគរូបនីយកម្ម និងសំណង់ សហការជាមួយមន្ត្រីជាន់ខ្ពស់មកពីក្រសួងទេសចរណ៍ និងក្រសួងបរិស្ថាន បានចុះទៅត្រួតពិនិត្យដល់ទីតាំងចាក់ដីចូលឆ្នេរព្រែកត្រែង ។
ប្រសិនបើរកឃើញថា ពិតជាល្មើសច្បាប់មែននោះ រដ្ឋមន្ត្រីយ៉ាងហោចណាស់ចំនួន២រូប អះអាងថា នឹងចាត់វិធានការផ្លូវច្បាប់ ទៅលើសកម្មភាពចាក់ដីរំលោភយកឆ្នេរសមុទ្រខ្សាច់ដ៏ស្រស់ស្អាត ដោយបំពានច្បាប់ ស្ដីពីការគ្រប់គ្រងតំបន់ឆ្នេររបស់កម្ពុជា ។
កាលពីថ្ងៃទី១៧ កញ្ញា ម្សិលមិញនេះ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងប្រាប់សារព័ត៌មានក្នុងស្រុកមួយថា «ករណីចាក់ដីចូលតំបន់ឆ្នេរសមុទ្រព្រែកត្រែងនោះ ក្រសួងនឹងចាត់វិធានការនៅ ពេលខាងមុខនេះ» ។ «សូមរង់ចាំមើលនៅថ្ងៃខាងមុខ ក្រសួងនឹងចាត់វិធានការបែបណានោះ ។ រង់ចាំមើលទាំងអស់គ្នា» ។
ពាក់ព័ន្ធករណីនេះលោក យន្ត មីន អភិបាលខេត្តព្រះសីហនុ មិនអាចសុំការបំភ្លឺបានទេ ជុំវិញវិធានការរបស់រដ្ឋមន្ត្រីទាំងបីក្រសួងខាងលើនេះ ៕