ភ្នំពេញ៖ ជនជាតិកូរ៉េ២នាក់ឪពុក និងកូន បានរងនូវការចោទប្រកនា់ពីបទ ឆបោក និងលួចលុយពីក្រុមហ៊ុនចិនមួយ មានទឹកប្រាក់ប្រហែលជិត៩លានដុល្លារសហរដ្ឋអាមេរិក ក៏ត្រូវសមត្ថកិច្ច នៃការិយាល័យបទល្មើសព្រហ្មទណ្ឌ នៃបញ្ជាការដ្ឋានកងរាជអាវុធហត្ថរាជធានីភ្នំពេញ ចាប់បញ្ជូនទៅកាន់សាលាដំបូងរាជធានីភ្នំពេញ នៅថ្ងៃទី១៤ ខែកញ្ញា ឆ្នាំ២០១៨នេះ។
មន្រ្ដីកងរាជអាវុធហត្ថរាជធានីភ្នំពេញ បានឲ្យដឹងថា ជនសង័្សយទាំង២នាក់ឪពុកកូនជាប់ពាក់ព័ន្ធនឹងករណីឆបោក និងលួច ហើយត្រូវសមត្ថកិច្ចឃាត់ខ្លួននោះ គឺកូនឈ្មោះ ចូ ស៊ូពិន (Cho So In) ភេទប្រុស អាយុ២៩ឆ្នាំ កាន់លិខិតឆ្លងដែនលេខ M36107313 និងឪពុកឈ្មោះ ចូ សាមហ្សុង (Cho Samsung ) អាយុ៦០ឆ្នាំ។ ពួកគេទាំង២នាក់ ជនជាតិកូរ៉េខាងត្បូង បច្ចុប្បន្នស្នាក់នៅផ្ទះលេខ១៥ ផ្លូវ១១២៦ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ចំណែកដើមបណ្តឹង ក្នុងសំណុំរឿងនេះឈ្មោះ ជិន ជីហុង (Jin Zhehong ) ភេទប្រុស អាយុ៤៤ឆ្នាំ ជនជាតិចិន មានមុខរបរជាពាណិជ្ជករ តំណាងឲ្យក្រុមហ៊ុន Shenyang Aiweiou Healfh Products Co ltd មានអាសយដ្ឋានផ្ទះលេខ២៧ ផ្លូវលេខ១០០៧ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
លោកវរសេនីយ៍ឯក ម៉ាំង សុខលុច នាយការិយាល័យព្រហ្មទណ្ឌ នៃបញ្ជាការដ្ឋានកងរាជអាវុធហត្ថរាជធានីភ្នំពេញ បានឲ្យដឹងថា ជនសង្ស័យទាំង២នាក់ឪពុកកូន ត្រូវកម្លាំងសមត្ថកិច្ចរបស់លោក ឃាត់ខ្លួនបាន កាលពីវេលាម៉ោង១១ និង៣០នាទីព្រឹក ថ្ងៃទី១៣ ខែកញ្ញា ឆ្នាំ២០១៨ នៅតាមផ្លូវឧកញ៉ា ម៉ុង ឫទ្ធី ស្ថិតក្នុងភូមិកោះអណ្ដែត សង្កាត់ទួលសង្កែ២ ខណ្ឌឫស្សីកែវ។ រីឯការឃាត់ខ្លួននេះ សមត្ថកិច្ចបានធ្វើឡើង តាមដីកាបញ្ជាឲ្យចូលខ្លួនរបស់អយ្យការសាលាដំបូងរាជធានីភ្នំពេញ។
ប្រភពព័ត៌មាន បានឲ្យដឹងថា ដើមបណ្តឹងជាជនរងគ្រោះខាងលើ បានប្តឹងជនជាតិកូរ៉េ២នាក់ ឪពុក និងកូន ពីបទ “ឆបោក” ដែលមានទឹកប្រាក់ប្រហែល ២៩២០៤៥ដុល្លារ ដែលជនសង្ស័យបានប្រព្រឹត្តកាលពីអំឡុងខែវិច្ឆិកា ឆ្នាំ២០១៦ និងបទលួច មានទឹកប្រាក់ចំនួន៧២០៥៨៨២ដុល្លារ ដែលបាលប្រព្រឹត្ត កាលពីអំឡុងឆ្នាំ២០១៧ ព្រមទាំងពីបទក្លែងឯកសារសាធារណៈ៕
