ភ្នំពេញ ៖ សកម្មភាពធ្វើរោងបុណ្យ ឬរោងការ នៅមុខផ្ទះតាមដងផ្លូវ បានក្លាយទៅជាប្រធានបទក្តៅគគុកមួយ ក្នុងរយៈពេលប៉ុន្មានឆ្នាំចុងក្រោយនេះ ព្រោះតែសកម្មភាពនេះ ត្រូវបានអ្នកខ្លះអះអាងថា រំខានអ្នកជិតខាង និងរំខានអ្នកធ្វើដំណើរតាមផ្លូវសាធារណៈ ។
ពាក់ព័ន្ធនឹងប្រធានបទក្តៅគគុកនេះ លោក ឃួង ស្រេង អភិបាលរាជធានីភ្នំពេញ បានណែនាំ និងជំរុញឲ្យអាជ្ញាធរគ្រប់ខណ្ឌ ត្រូវចាត់មន្ត្រីចុះត្រួតពិនិត្យរាល់ការសុំច្បាប់ និងសាងសង់រោងបុណ្យ ឬរោងការណា ដែលបិទផ្លូវទាំងស្រុង គឺមិនអនុញ្ញាតឡើយ ដើម្បីជៀសវាងមានការថ្នាំងថ្នាក់ពីប្រជាពលរដ្ឋ ។
អភិបាលរាជធានីភ្នំពេញ ថ្លែងបែបនេះ នៅក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅរដ្ឋបាលរាជធានីភ្នំពេញ កាលពីរសៀលថ្ងៃទី១២ កញ្ញា ២០១៨នេះ ។
លោក ឃួង ស្រេង បញ្ជាក់យ៉ាងដូច្នេះថា អាជ្ញាធរមូលដ្ឋានគ្រប់ខណ្ឌ សង្កាត់ និងកំលាំងមានសមត្ថកិច្ច ត្រូវចុះត្រួតពិនិត្យ ឲ្យបានជាប្រចាំ ចំពោះការសាងសង់រោងបុណ្យ, រោងការ ធ្វើឲ្យមានការកកស្ទះចរាចរណ៍ ដែលនាំអោយប្រជាពលរដ្ឋថ្នាំងថ្នាក់ នាពេលកន្លងមកនោះ គួរម្ចាស់រោងបុណ្យ ឬរោងការ រកទីតាំងណា ដែលសមស្រប មិនប៉ះពាល់ផ្លូវសាធារណៈដូចជា ទីវត្តអារាម តាមភោជនីដ្ឋាន ឬទីតាំងណាដែលសមរម្យ ។
លោក ឃួង ស្រេង បានបន្តក្រើនរម្លឹកកដល់អាជ្ញាធរ និងស្ថាបន័ពាក់ព័ន្ធឲ្យបង្កើនប្រសិទ្ធភាពការងារទ្វេដងថែមទៀត លើការបម្រើសេវាសាធារណៈជូនប្រជាពលរដ្ឋ ឲ្យសក្តិសមទៅនឹងទំនុកចិត្ត របស់ប្រជាពលរដ្ឋ ដែលបានបោះឆ្នោតឲ្យយើង ។
ជាការកត់សម្គាល់នៅក្នុងសង្គមខ្មែរ ក្នុងរយៈពេល១០ឆ្នាំចុងក្រោយនេះ សកម្មភាពធ្វើរោងបុណ្យ រោងការនៅពីមុខគេហដ្ឋាន ដែលរំខានដល់អ្នកជិតខាង ឬអ្នកធ្វើដំណើរ ហាក់បីដូចជាទទួលការរិះគន់ច្រើនពីមហាជន ដោយសារពួកគេគិតថា ទង្វើនេះ រំខានដល់សណ្តាប់ធ្នាប់សាធារណៈ ក្នុងបរិបទដែលផ្លូវក្នុងទីក្រុងធំៗរបស់កម្ពុជា កំពុងប្រឈមនឹងការកកស្ទះចរាចរណ៍ជារៀងរាល់ថ្ងៃ ។ ម្យ៉ាងទៀត ការសង់រោងបុណ្យទាំងនេះ ក៏អាចរំខានអ្នកជិតខាង ជាពិសេស អ្នកប្រកបអាជីវកម្ម ផងដែរ ។
ជាការពិត មិនអាចប្រកែកបាន មានតែអស់លោកអ្នកធំៗទេ ដែលសាងសង់រោងបុណ្យ, រោងការ បិទផ្លូវសាធារណៈទាំងស្រុងនោះ ហើយពេលខ្លះបិទដល់ទៅ៣ថ្ងៃ ក៏មានដែរ ៕