ខេត្តបន្ទាយមានជ័យ៖ ភ្លៀងបានបង្អុរចុះមួយមេយ៉ាងខ្លាំង ស្រោចស្រពមកលើទឹកដីខេត្តបន្ទាយមានជ័យ ចាប់តាំងពីវេលារំលងអធ្រាត្រ ឈានចូលថ្ងៃទី១២ ខែកញ្ញា ឆ្នាំ២០១៨ រហូតមកដល់វេលាម៉ោងជិត៩ព្រឹកនេះទៅហើយ ក៏នៅតែមិនទាន់រាំង ទើបធ្វើឲ្យតំបន់មួយចំនួន ត្រូវលិចទឹក ជាពិសេសនៅតាមដងផ្លូវនានា នៅក្នុងទីក្រុងប៉ោយប៉ែត។
បើតាមសេចក្ដីរាយការណ៍ពីខេត្តបន្ទាយមានជ័យ បានឲ្យដឹងថា ភ្លៀងធំនេះបានបង្អុរចុះ ចាប់តាំងពីវេលារំលងអធ្រាត្រ ឈានចូលថ្ងៃទី១២ ខែកញ្ញា មកម៉្លេះ ហើយរហូតមកដល់ព្រឹកនេះ ភ្លៀងក៏នៅតែមិនទាន់រាំងនៅឡើយ។ ដោយសារតែភ្លៀងធ្លាក់មកយ៉ាងខ្លាំងបែបនេះ ទើបធ្វើឲ្យតំបន់មួយចំនួន នៃខេត្ដបន្ទាយមានជ័យ ត្រូវជន់លិច ជាពិសេស ទីក្រុងប៉ោយប៉ែត លើកលែងតែនៅតាមដងផ្លូវជាតិលេខ៥។ ដោយឡែកនៅក្នុងទីក្រុងប៉ោយប៉ែតទាំងមូល ត្រូវទឹកជន់លិច។ សូម្បីតែនៅតាមដងផ្លូវបេតុងមួយចំនួន ចាប់តាំងពីសាលាសង្កាត់ប៉ោយប៉ែត រហូតទៅទិសខាងជើង ដែលពីមុនមិនធ្លាប់មានទឹកជន់លិចសោះ ស្រាប់តែពេលនេះ មានទឹកជន់លិច ធ្វើឱ្យអ្នកដំណើរមានការពិបាក។ ចំណែកចំណតរថយន្តក្រុង និងទីតាំងរង្វង់មូល ត្រង់ម្តុំមុខការិយាល័យគយ និងរដ្ឋាករ និងប៉ុស្តិ៍នគរបាលអន្តោប្រវេសន៍ ក៏មានទឹកជន់លិចល្ហល្ហាចដែរ។
ទោះជាយ៉ាងណា រហូតមកទល់នឹងពេលនេះ គឺនៅមិនទាន់មានទទួលព័ត៌មានណាមួយដែលប្រជាពលរដ្ឋរងគ្រោះ ដោយសារគ្រោះថ្នាក់ធម្មជាតិនេះនៅឡើយ៕
