ខេត្តព្រះសីហនុ៖ ជនអន្ធពាលចិនមួយក្រុម បានចាប់ជនជាតិចិនដូចគ្នាបង្ខាំងទុក និងធ្វើទារុណកម្ម ដោយខុសច្បាប់ ក៏ត្រូវសមត្ថកិច្ចនគរបាលខេត្តព្រះសីហនុចុះទៅបង្រ្កាប និងចាប់ខ្លួន កាលពីវេលាម៉ោង៣ និង២០នាទីរសៀល ថ្ងៃទី១០ ខែកញ្ញា ឆ្នាំ២០១៨ នៅក្នុងបន្ទប់លេខ៤០៩ ជាន់ទី៤ នៃកាស៊ីណូខ្សាច់មាស មានទីតាំងស្ថិតក្នុងក្រុមទី១៥ ភូមិ៤ សង្កាត់លេខ៤ ក្រុងព្រះសីហនុ។
មន្ត្រីនគរបាលខេត្តព្រះសីហនុ បានឱ្យដឹងថា ជនសង័្សយជាប់ពាក់ព័ន្ធនឹងករណីចាប់មនុស្សបង្ខាំងទុកដោយខុសច្បាប់ និងធ្វើទារុណកម្ម ហើយត្រូវសមត្ថកិច្ចឃាត់ខ្លួននោះ រួមមាន ទី១-ឈ្មោះ WU TAOTAO ភេទប្រុស អាយុ៣០ឆ្នាំ ជនជាតិចិន មុខរបរមិនពិតប្រាកដ លិខិតឆ្លងដែនលេខ E47110783, ទី២-ឈ្មោះ WU XIONGBO ភេទប្រុស អាយុ៣៣ឆ្នាំ ជនជាតិចិន មុខរបរមិនពិតប្រាកដ លិខិតឆ្លងដែនលេខ E18485588, ទី៣-ឈ្មោះ WU XUXIANG ភេទប្រុស អាយុ២៧ឆ្នាំ ជនជាតិចិន មុខរបរមិនពិតប្រាកដ លិខិតឆ្លងដែនលេខ E89684327 និងទី៤-ឈ្មោះ REN JIHU ភេទប្រុស អាយុ២៩ឆ្នាំ ជនជាតិចិន មុខរបរមិនពិតប្រាកដ លិខិតឆ្លងដែនលេខ E45370348 ។ ពួកគេទាំង៤នាក់ស្នាក់នៅបន្ទប់លេខ៤០៩ ជាន់ទី៤ នៃកាស៊ីណូខ្សាច់មាស មានទីតាំងស្ថិតក្នុងក្រុមទី១៥ ភូមិ៤ សង្កាត់៤ ក្រុងព្រះសីហនុ ខេត្តព្រះសីហនុ។ ក្រៅពីឃាត់ខ្លួនជនសង័្សយខាងលើនេះ សមត្ថកិច្ចដកហូតបានវត្ថុតាងមួយចំនួន រួមមាន ពិលឆក់ចំនួន២ដើម, រថយន្ត១គ្រឿង ម៉ាក LEXUS RX៣០០ ពណ៌ស ស្លាកលេខ ភ្នំពេញ 2AL-5010។
មន្ត្រីនគរបាលដដែល បានបន្ដថា ដោយឡែកជនរងគ្រោះ នៅក្នុងអំពើចាប់បង្ខាំងនោះ រួមមាន ទី១-ឈ្មោះ CHEN TI ភេទប្រុស អាយុ៣៦ឆ្នាំ ជនជាតិចិន កាន់លិខិតឆ្លងដែនលេខ ED6680842 រងរបួសបែកមាត់ និងស្នាមដាច់រលាត់ខ្នង(រងរបួសមធ្យម) និងទី២-ឈ្មោះ DAI YANYING ភេទស្រី អាយុ៤៤ឆ្នាំ ជនជាតិចិន កាន់លិិខិតឆ្លងដែនលេខ ED6689382 ។ ពួកគេទាំង២នាក់ស្នាក់នៅក្នុងសណ្ឋាគារដើមត្នោត មានទីតាំងស្ថិតនៅក្រុមទី១៥ ភូមិ៤ សង្កាត់លេខ៤ ក្រុង-ខេត្តព្រះសីហនុ។
មន្ត្រីនគរបាលដដែល បានបន្តថា មុនពេលកើតហេតុ ជនរងគ្រោះបានធានាលុយចំនួន១សែនយ័ន (Yuan) ពីក្រុមជនសង្ស័យ ដើម្បីឲ្យមិត្តភក្ដិយកទៅលេងល្បែង នៅក្នុងកាស៊ីណូឆាងយូ។ លុះពេលមិត្តភក្ដិរបស់ពួកគេលេងល្បែងចាញ់អស់លុយពីខ្លួន ក៏គ្មានប្រាក់សម្រាប់សងទៅក្រុមជនសង្ស័យ ទើបពួកនេះចាប់ជនរងគ្រោះឃុំឃាំងទុក នៅក្នុងបន្ទប់។ បន្ទប់មក ជនសង័្សយបានធ្វើទារុណកម្ម និងវាយធ្វើបាបទៅលើជនរងគ្រោះ ដោយប្រើពិលឆក់ ដើម្បីបង្ខំឲ្យជនរងគ្រោះសរសេរលិខិតជំពាក់ប្រាក់។
មន្ត្រីនគរបាលដដែល បានបន្ដថា បន្ទាប់ពីទទួលបាននូវព័ត៌មនបែបនេះ សមត្ថកិច្ចនគរបាលខេត្តព្រះសីហនុ បានចុះទៅបង្រ្កាប និងចាប់ខ្លួនជនសង័្សយ ព្រមទាំងរំដោះជនរងគ្រោះ។ នៅពេលនេះជនសង្ស័យខាងលើនេះ ត្រូវមន្ត្រីជំនាញ នៃការិយាល័យនគរបាលព្រហ្មទណ្ឌកម្រិតស្រាល កំពុងចាត់ការបន្តតាមនីតិវិធី៕