ខេត្តបន្ទាយមានជ័យ ៖ តាមសេចក្តីរាយការណ៏ បានឲ្យដឹងថា មួយថ្ងៃៗក្រុមឈ្មួញនាំទំនិញ ដឹកតាមរទេះអូស ឆ្លងដែនចូលមកស្រុកខ្មែររាប់សិបគ្រឿង បើសិនជាក្រុមឈ្មួញទាំងនោះជា«ម៉ូយ» ដែលបានប្រើឥទ្ធិពលរបស់មន្ត្រីគយ ទាំងនោះ មិនឲ្យមន្ត្រីយាមតាមច្រកឆែកឆេរទំនិញខ្លួនឡើយ បើទោះបីជាត្រូវចូលបង់ ក៏អត្រាពន្ធខ្ពស់ប្រកាសបន្លំមកអត្រាពន្ធទាប បានដែរ ។
សេចក្តីរាយការណ៏បានបន្តថា ចំណែកឯ ក្រុមឈ្មួញណា ដែលមិនស្គាល់ចិត្ត ក្រុមអស់លោកគយវិញ ទំនិញទាំងនោះ និងត្រូវឆែកឆេរខ្ទេចវ៉ល់ ហើយតម្រូវអោយបង់ពន្ធគយពេញ ឬក៏បង្កការលំបាកគ្រប់ល្បិចមិនអោយរកស៊ីកើតតែម្តង ។
ជាក់ស្តែង បើតាមបុរសម្នាក់ជាកម្មករអូសរទេះ សុំមិនបញ្ចេញឈ្មោះ បានអោយអ្នកសារព័ត៌មានដឹងនៅថ្ងៃទី១០ កញ្ញា ២០១៨ នេះថា គ្រាន់តែរទេះអូស ដឹកពូកចំនួន២សោះ ត្រូវមន្ត្រីគយចាប់រទេះរបស់គាត់ថ្លឹង ហើយតម្រូវអោយបង់ពន្ធចំនួន១០ម៉ឺនរៀល ។ ចុះទម្រាំរថយន្តធំៗ ដឹកទំនិញធ្ងន់ៗទៀត តើយកលុយទៅណាអស់ទៅ ?
ពាក់ព័ន្ធនឹងករណីខាងលើនេះ អ្នកសារព័ត៌មានយើង នៅមិនទាន់សុំការពន្យល់ពីសំណាក់មន្ត្រីនៅការិយាល័យគយ និងរដ្ឋាករច្រកទ្វារព្រំដែនអន្តរជាតិប៉ោយប៉ែត ដែលទទួលបន្ទុកផែស្ងួត ចំណុចផ្សារមង្គល ឬគយទំនិញរទេះអូសនោះ បាននៅឡើយទេ ៕
