ខេត្តស្ទឹងត្រែង ៖ ការដឹកជញ្ជូនឈើប្រណីតខុសច្បាប់ពីស្រុកនានា ក្នុងខេត្តស្ទឹងត្រែង ទៅកាន់ទីផ្សារក្រៅប្រទេសកំពុងតែមានសកម្មភាពខ្លាំងក្លាទ្វេឡើងពីមួយថ្ងៃទៅមួយថ្ងៃ ក្នុងនោះក្រុមឈ្មួញមិនត្រឹមតែប្រើមធ្យោបាយតាមផ្លូវគោកទេ គេថែមទាំងកំពុងដឹកជញ្ជូនតាមផ្លូវទឹកជារៀងរាល់ថ្ងៃទៀតផង ។
ជាក់ស្តែង កាលពីរំលងអាធ្រាត្រឈានចូលថ្ងៃទី១០ កញ្ញា ២០១៨ កម្លាំងនគរបាលប្រឆាំងបទល្មើសសេដ្ឋកិច្ច ដឹកនាំដោយ លោក វ៉ា សុ ផាន់ ប្រធាន ការិយាល័យប្រឆាំងបទល្មើសសេដ្ឋកិច្ចខេត្តស្ទឹងត្រែង សហការជាមួយមន្ត្រីជំនាញរដ្ឋបាលព្រៃឈើខេត្ត ស្ទាក់បាប់បានក្បូនឈើមួយ ដើម្បីនាំបន្តទៅវៀតណាម តាមដងទន្លេសេកុង ក្បែរស្ពានសេកុង ក្រុងស្ទឹងត្រែង ។
ប្រភពព័ត៌មានពីសមត្ថកិច្ចឲ្យដឹងថា បន្ទាប់ពី កម្លាំងសមត្ថកិច្ចបង្ក្រាបក្បួនឈើនេះរួចមក ក៏ធ្វើការអូសក្បូនឈើដែលគេឃើញប្រភេទឈើមូលចងក្រសោមគ្នាយកទៅទុករក្សាទុកនៅខណ្ឌរដ្ឋបាលព្រៃឈើខេត្ត ។
សមត្ថកិច្ចបានបន្ថែមថា ចំនួនឈើពិតប្រាកដគេនៅមិនទាន់ដឹងនៅឡើយទេរង់ចាំជំនាញធ្វើការវាស់វែងនៅពេលក្រោយ ៕
