ភ្នំពេញ៖ បន្ទាប់ពីតុលាការរាជធានីភ្នំពេញ បានសម្រេចដោះលែងលោក កឹម សុខា អតីតប្រធានគណបក្សជាតិ ឲ្យនៅក្រៅពន្ធនាគារ ជាបណ្ដោះអាសន្ន កាលពីវេលាទៀបភ្លឺ ថ្ងៃទី១០ ខែកញ្ញា ឆ្នាំ២០១៨ នោះមក លោក សម រង្ស៊ី ដែលកំពុងតែនិរទេសខ្លួន នៅក្រៅប្រទេស បានសាទរនឹងការដោះលែងនេះដែរ ប៉ុន្តែលោកនៅតែចាត់ទុកថា នេះមិនទាន់គ្រប់គ្រាន់ទេ ត្រូវបើកផ្លូវឲ្យគណបក្សសង្រ្គោះជាតិរស់ឡើងវិញ និងផ្ដល់សិទ្ធិដល់តំណាងរាស្រ្ដរបស់គណបក្ស មានសិទ្ធិធ្វើនយោបាយពេញលេញដូចដើម។
លោក សម រង្ស៊ី បានបង្ហោះវីដេអូ តាមគណនីហ្វេសប៊ុករបស់លោក នាព្រឹក ថ្ងៃទី១០ ខែកញ្ញា ឆ្នាំ២០១៨ ខណៈលោកចូលរួមប្រជុំជាមួយនឹងអ្នកគាំទ្រ នៅក្នុងប្រទេសកាណាដា ថា “លោកអបអរសាទរចំពោះការដោះលែងលោក កឹម សុខា ឲ្យមានសេរីភាពឡើងវិញ។ ឥឡូវគេដោះលែង កឹម សុខា វិញហើយ ប៉ុន្តែការដោះលែងនេះ មិនគ្រប់គ្រាន់ទេ”។
លោក សម រង្ស៊ី អតីតប្រធានគណបក្សសង្រ្គោះជាតិ បានបន្តថា ការដោះលែងលោក កឹម សុខា គ្រាន់តែជាជំហានទី១ប៉ុណ្ណោះ គឺយើងត្រូវតែទាមទារឲ្យគណបក្សសង្គ្រោះជាតិកើតឡើងវិញ។ យើងត្រូវទាមទារឲ្យថ្នាក់ដឹកនាំគណបក្សសង្គ្រោះជាតិទាំង១១៨នាក់ មានសិទ្ធិធ្វើនយោបាយឡើងវិញ។ យើងត្រូវទាមទារឲ្យសមាជិកក្រុមប្រឹក្សាទាំង៥០០៧រូប ទទួលតំណែងឡើងវិញ ហើយយើងត្រូវទាសមទារឲ្យមានការបោះឆ្នោតឡើងវិញ ដោយមានអន្តរជាតិទទួលស្គាល់។
ការលើកឡើងរបស់អតីតមេបក្សប្រឆាំងរូបនេះ បានធ្វើឡើង បន្ទាប់ពីតុលាការរាជធានីភ្នំពេញ បានដោះលែងលោក កឹម សុខា អតីតប្រធានគណបក្សសង្រ្គោះជាតិ ឲ្យនៅក្រៅឃុំជាបណ្តោះអាសន្ន កាលពីវេលាម៉ោង៣ និង៣០ទៀបភ្លឺ ថ្ងៃទី១០ ខែកញ្ញា ឆ្នាំ២០១៨។ លោក កឹម សុខា ត្រូវបានតុលាការសម្រេចឃុំខ្លួន នៅក្នុងពន្ធនាគារត្រពាំងផ្លុង ខេត្តត្បូងឃ្មុំ អស់រយៈពេលជាង១ឆ្នាំ ក្រោមការចោទប្រកាន់ ពីបទ “សន្ទិដ្ឋិភាពជាមួយបរទេស”។
ដោយឡែក នៅឯរាជធានីភ្នំពេញឯណេះវិញ អ្នកគាំទ្រគណបក្សសង្រ្គោះជាតិ ជាច្រើនរយនាក់ បានទៅប្រមូលផ្ដុំគ្នា នៅមុខគេហដ្ឋានរបស់លោក កឹម សុខា ផ្ទះលេខ៩៧ ផ្លូវលេខ៣១៣ សង្កាត់បឹងកក់២ ខណ្ឌទួលគោក ដើម្បីចង់សួរសុខទុក្ខ។ ប៉ុន្តែលោក កឹម សុខា មិនបានចេញមកជួបអ្នកគាំទ្រទាំងនោះទេ។
លោក ចាន់ ចេង មេធាវីការក្តីឲ្យលោក កឹម សុខា បានអះអាងកាលពីព្រឹក ថ្ងៃទី១០ ខែកញ្ញានេះថា លោក កឹម សុខា មិនអាចចេញមកជួបជាមួយអ្នកគាំទ្រទាំងនោះបានទេ ដោយសារបញ្ហាសុខភាពរបស់គាត់ នៅមិនទាន់បានស្រួលនៅឡើយ។ ប៉ុន្តែទោះជាយ៉ាង លោកនៅមិនទាន់បានពិភាក្សាជាមួយកូនក្តីរបស់លោក ក្នុងការពិភាក្សាជាមួយចៅក្រមស៊ើបសួរ ដើម្បីសុំទៅព្យាបាល នៅឯក្រៅប្រទេសនៅឡើយ។
សូមជ្រាបថា បន្ទាប់ពីមានឃ្លីបវីដេអូមួយ បានបែកធ្លាយពីការសារភាពរបស់លោក កឹម សុខា ប្រធានគណបក្សសង្រ្គោះជាតិ ពីការឃុបឃិតជាមួយនឹងបរទេស ដើម្បីផ្ដួលរំលំរដ្ឋាភិបាល ដោយយកលំនាំតាមប្រទេសស៊ែប៊ី និងយូហ្គោស្លាវី ដែលរាជរដ្ឋាភិបាលចាត់ទុកថា ជាអំពើក្បត់ជាតិ។ ក្រោយមក លោក កឹម សុខា ត្រូវបានសមត្ថកិច្ចចាប់ខ្លួន កាលពីរំលងអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧ ក្រោមបទ “ក្បត់ជាតិ” ហើយលោក កឹម សុខា ត្រូវបានតុលាការបញ្ជូនទៅឃុំខ្លួន នៅក្នុងពន្ធនាគារត្រពាំងផ្លុង ខេត្តត្បូងឃ្មុំ ក្រោមការចោទប្រកាន់ពីបទ “សន្ទិដ្ឋិភាពជាមួយបរទេស” តាមមាត្រា៤៤៣ នៃក្រមព្រហ្មទណ្ឌ។
បើតាមក្រមព្រហ្មទណ្ឌ នៃព្រះរាជាណាចក្រកម្ពុជា បទ “សន្ទិដ្ឋិភាពជាមួយបរទេស” គឺជាអំពើត្រូវរ៉ូវគ្នាដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឱ្យមានអំពើប្រទូសរ៉ាយ ឬឱ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ត្រូវជាប់ពន្ធនាគារពី១៥ឆ្នាំដល់៣០ឆ្នាំ។
ក្រោយពេលមានការចាប់ខ្លួនលោក កឹម សុខា ប្រធានគណបក្សសង្រ្គោះជាតិភ្លាម គណបក្សយុវជនកម្ពុជា ដឹកនាំដោយលោក ពេជ្រ ស្រស់ និងគណបក្សហ៊្វុនស៊ិនប៉ិច ដឹកនាំដោយសម្ដេចក្រុមព្រះ នរោត្ដម រណឫទិ្ធ បានប្ដឹងទៅក្រសួងមហាផ្ទៃ ដើម្បីសុំរំលាយគណបក្សសង្រ្គោះជាតិ។
បន្ទាប់ពីមានពាក្យបណ្ដឹងពីគណបក្សទាំង២នេះ ក្រសួងមហាផ្ទៃក៏បានដាក់ពាក្យបណ្ដឹងទៅតុលាការកំពូល ដើម្បីសុំរំលាយគណបក្សសង្រ្គោះជាតិ។ តុលាការកំពូលបានលើកយកសំណុំរឿងនេះ មកបើកសវនការពេញមួយថ្ងៃព្រហស្បតិ៍ ទី១៦ វិច្ឆិកា ឆ្នាំ២០១៧ ហើយនៅល្ងាចថ្ងៃដដែលនោះ តុលាការកំពូលបានសម្រេចរំលាយគណបក្សសង្រ្គោះជាតិ ព្រមទាំងហាមឃាត់មន្រ្តីជាន់ខ្ពស់របស់គណបក្សនេះចំនួន១១៨នាក់ មិនឲ្យធ្វើនយោបាយ រយៈពេល៥ឆ្នាំ។ សេចក្តីសម្រេចនេះ គឺជាការសម្រេចជាស្ថាពរ ដោយបិទផ្លូវតវ៉ា។ ដោយឡែក តំណាងរាស្រ្ដ និងសមាជិករបស់ក្រុមប្រឹក្សា នៃគណបក្សសង្រ្គោះជាតិ ក៏ត្រូវបាត់បង់នូវអាសនៈរបស់ខ្លួនទៅតាមគណបក្សនេះដែរ៕
https://www.facebook.com/CambodiaElections/videos/314306959334096/UzpfSTUyMDcwODU2Nzk4NTg4MToxOTkxNjI4ODQ3NTYwNTA1/
