ភ្នំពេញ ៖ ក្រោយពេល អាក់ខានការសម្តែងមួយរយៈកន្លងមក លោក ជួង ជី ហៅនាយ កុយ ជាប្រធានក្រុមកំប្លែងដែលមានក្រុមសិល្បករចាស់ៗមានវ័យហាសិប និងហុកសិបប្លាយភាគច្រើននោះ នឹងមានវត្តមាន សម្តែងក្នុងកម្មវិធីកម្សាន្តមួយ នៅឯប៉ុស្តិ៍ទូរទស្សន៍ CTN វិញ ។
តាមរយៈវីដេអូផ្សាយផ្ទាល់ ពីសំណាក់តារាកំប្លែងជើងចាស់នាយ កុយ លោកបានប្រាប់ដល់ទស្សនិកជនយ៉ាងដូច្នេះថា «ក្រុមកំប្លែងរបស់លោក បានវិលទៅសម្តែង ក្នុងស្ថានីយសម្តែងវិញហើយ គឺនឹងត្រូវសម្តែងក្នុងកម្មវិធី មន្តស្នេហ៍សំនៀង របស់ស្ថានីយ៍ទូរទស្សន៍ CTN នៅថ្ងៃសៅរ៍ទី១៥ ខាងមុននេះ» ។
ជាមួយគ្នានេះ លោកក៏បានធ្វើការប្រការស្វែងរកសមាជិករួមក្រុម ជាពិសេសគឺនាង ឃ្មឹប ព្រោះទំនាក់ទំនងទៅមិនបានសោះ ។ នាយកុយបាននិយាយ ដោយមានខ្លឹមសារថា «ដោយសារទំនាក់ទំនងទៅមិនបាន ដូច្នេះបើនាង ឃ្មឹប បានឃើញវីដេអូនេះ សូមទាក់ទងមកផង ហើយចូលមកសម្តែងកំប្លែងវិញផង ដើម្បីកំដរអារម្មណ៍ទស្សនិកជន ទោះបីជាបានចំណូលបន្តិចបន្តួចក្តី តែមានវាចំណែកមួយក្នុងការជួយគ្នាទៅវិញទៅមក ក្នុងវិស័យសិល្បៈ» ។
យ៉ាងណាមិញ ជាមួយដំណឹងនេះ គឺបានធ្វើឲ្យទស្សិកជន ដែលធ្លាប់តែគាំទ្រ និងតាមដានការសម្តែងរបស់ក្រុមតារាកំប្លែងនាយកុយ ពីមុនមក មានការរីករាយយ៉ាងខ្លាំង ហើយពួកគេភាគច្រើន ក៏កំពុងតែរង់ចាំការសម្តែងរបស់នាយ កុយបន្តទៀតផងដែរ ។
គួរជម្រាបថា ប្រិយមិត្តទស្សនិកជនច្បាស់មិនទាន់ភ្លេចឡើយ សម្រាប់កម្មវិធីកម្សាន្តនាពេលថ្ងៃត្រង់ឈ្មោះ «មន្តស្នេហ៍សំនៀង» នៅប៉ុស្តិ៍ទូរទស្សន៍ CTN ដែលនៅនាទីចុងក្រោយតែងមាន វត្តមានក្រុមកំប្លែងរបស់នាយកុយ តែនៅរយៈពេលប៉ុន្មានខែចុងក្រោយនេះ ស្រាប់តែក្រុមកំប្លែងនាយកុយគេលែងឃើញមានការសម្តែងបន្តទៀតដូចកាលពីមុន ។
លោក ជួង ជី ហៅនាយ កុយ ក៏បានបង្ហើបប្រាប់ហេតុផល ដែលក្រុមត្រូវបាត់មុខពីការសម្តែងក្នុងកម្មវិធី «មន្តស្នេហ៍សំនៀង» នៅឯប៉ុស្តិ៍ទូរទស្សន៍ CTN នោះដឹងដែរថា «សូម្បីតែខ្ញុំផ្ទាល់(នាយ កុយ) ក៏មានការងឿងឆ្ងល់ដែរ ខណៈនាមួយរយៈពេលប៉ុន្មានខែចុងក្រោយនេះ ស្រាប់តែក្រុមកំប្លែងរបស់ខ្ញុំ ដែលធ្លាប់មានវត្តមានសម្តែងតាំងពីយូរយារមកហើយនោះ ត្រូវខាងអ្នករៀបចំកម្មវិធី ផ្តល់ដំណឹងថា ដោយសារខាងស្ពនស័រចង់បានក្រុមកំប្លែងមានអ្នកសម្តែងក្មេងៗ ទើបបានជាក្រុមរបស់ខ្ញុំត្រូវជំនួសដោយក្រុមកំប្លែងមានក្មេងៗសម្តែងរបស់នាយពែកមី វិញម្តង»។
បើតាមស្តាប់ការរៀបរាប់របស់នាយ កុយ ជាប្រធានក្រុមកំប្លែងជើងចាស់ ដែលមានសមាជិកជាង ១០ រូប ភាគច្រើនមានវ័យសុទ្ធតែជាងហាសិបឆ្នាំ ឬហុកសិបឆ្នាំប្លាយនោះ មិនបានយកបញ្ហាលុយកាក់បានពីសម្តែងនោះជាធំឡើយសម្រាប់ភាពអាក់អន់ស្រពន់ចិត្ត ដែលក្រុមលោកត្រូវបាត់មុខពីប៉ុស្តិ៍ទូរទស្សន៍មួយនេះ។
នាយ កុយ បានបញ្ជាក់ថា៖ «តាមពិតទៅ ក្រុមរបស់ខ្ញុំ ដែលមានសមាជិកជាង ១០ នាក់គឺមានរូបខ្ញុំ នាយ សាន ម៉ៅ តាចេក នាយក្រិន នាយកយ នាយ ហុងដា នាង ឃ្មិប នាងគ្រត នាងប្រិមប្រិយ ជាដើម គឺមិនបានគិតថា ស្តាយរឿងប្រាក់ បានពីការសម្តែងម្តងៗមានប្រហែលជាង ៣០០ ដុល្លារនោះឡើយ។ ប្រការសំខាន់ ពួកយើងសោកស្តាយ និងបារម្ភចំពោះការបាត់បង់វត្តមានពួកយើងពីក្រសែភ្នែកនៃទស្សនិកជនខ្មែរទូទាំងប្រទេស ដែលខំរក្សាសិល្បៈកំប្លែងដែលមានបញ្ជូលនូវទម្រង់សិល្បៈបុរាណនានាយូរយារមកហើយនោះ។ ម្យ៉ាងទៀត ពួកយើង សុខចិត្តឈប់ពីប៉ុស្តិ៍លេខ ៣ មកសម្តែងនៅ CTN តែពេលនេះត្រូវគេឈប់យក» ៕