ភ្នំពេញ ៖ មន្ត្រីសាលាដំបូងរាជធានីភ្នំពេញ បានបង្ហើបថា មុខសញ្ញាចោរលួចម៉ូតូយ៉ាងសកម្មម្នាក់ត្រូវបាន លោក អ៊ី ថាវរៈ ចៅក្រមស៊ើបសួរ នៃសាលាដំបូងរាជធានីភ្នំពេញ ដោះលែងឲ្យទៅផ្ទះវិញ កាលពីថ្ងៃទី០៨ ខែកញ្ញា ឆ្នាំ២០១៨នេះ ក្រោមហេតុផលថា ដាក់ចោរក្រោមការត្រួតពិនិត្យតាមផ្លូវតុលាការ កុំឲ្យដើរលួចដូចមុនទៀត ។
សូមបញ្ជាក់ថា ជនសង្ស័យលួចម៉ូតូយ៉ាងសកម្មម្នាក់ ដែលត្រូវលោកចៅក្រម អ៊ី ថាវរៈ ដោះលែង មានឈ្មោះ សម វិចិត្រ ភេទប្រុស អាយុ២៤ឆ្នាំ ។
យោងតាមសមត្ថកិច្ច បានឲ្យដឹងថា សំណុំរឿងជនសង្ស័យឈ្មោះ សម វិចិត្រ ត្រូវបានលោកស្រី ស៊ឺ វណ្ណនី បើកការស៊ើបសួរ និងចោទប្រកាន់ពីបទ លួច (បន្លំយកម៉ូតូ) ប្រព្រឹត្តនៅកន្លែងផ្ញើម៉ូតូ ក្នុងមន្ទីរពេទ្យរុស្ស៊ី យោងតាមមាត្រា ៣៥៦ នៃក្រមព្រហ្មទទណ្ឌ ដែលអាចប្រឈមនឹងការផ្តន្ទាទោសដាក់គុកពី៦ខែ ទៅ៣ឆ្នាំ ។
ក្រោយពីបញ្ជូនសំណុំរឿងបន្តទៅឲ្យចៅក្រម អ៊ី ថាវរៈ ចោរក៏មានសំណាងទៅផ្ទះវិញ ដើម្បីបន្តមុខរបរដើម ដោយលោកស្រី ស៊ឺ វណ្ណនី មិនបានប្តឹងទាស់ នឹងសេចក្តីសម្រេច មិនឃុំខ្លួនជនសង្ស័យ របស់ចៅក្រមស៊ើបសួរនោះទេ នេះបើតាមប្រភពពីមន្ត្រីតុលាការ ។
ប្រភពពីនគរបាល នៃអធិការដ្ឋាននគរបាលខណ្ឌចំការមនបាន ខ្សឹបប្រាប់អ្នកកាសែតទាំងហួសចិត្តថា មិនសមណាចោរដែលសមត្ថកិច្ចខំចាប់ មិនបានជាប់គុក បែរជាមានសំណាង បានបន្តមុខរបរចាស់បែបនេះសោះ ដូច្នេះនេះជាកំហុស ដ៏ធ្ងន់ធ្ងររបស់ប៉ូលីស ដែលចាប់ចំចោរល្អ ទើបតុលាការសហការគ្នាលែងចោរល្អឲ្យទៅផ្ទះវិញ ៕