ខេត្តកំពង់ចាម៖ យុវជនម្នាក់បានចាប់មាន់ ឆ្កែ ហើយគីង្គក់ ហែកជញ្ជាក់ឈាម និងស៊ីសាច់ឆៅ ក៏ត្រូវសមត្ថកិច្ចចុះទៅឃាត់ខ្លួន កាលពីវេលាម៉ោងជិត៦ល្ងាច ថ្ងៃទី៩ ខែកញ្ញា ឆ្នាំ២០១៨ នៅក្នុងភូមិកោះចិន ឃុំកំពង់រាប ស្រុកកោះសូទិន។
លោកវរសេនីយ៍ឯក អ៊ឹម ខឿន អធិការនគរបាលស្រុកកោះសូទិន បានឲ្យដឹងថា យុវជនដែលអ្នកភូមិអះអាងថា ខ្មោចចូល ហើយចាប់សត្វហែកស៊ីទាំងរស់ ហើយត្រូវសមត្ថកិច្ចឃាត់ខ្លួននោះ ឈ្មោះ រុន រាជ អាយុ២៤ឆ្នាំ រស់នៅភូមិកោះចិន ឃុំកំពង់រាប ស្រុកកោះសូទិន។ ជនបានចាប់ឆ្កែ៣ក្បាល មាន់មួយក្បាល និងគីង្គក់មួយក្បាល ហែកស៊ីទាំងរស់ និងជញ្ជក់ឈាម។
លោកអធិការនគរបាលស្រុកកោះសូូទិន បានរៀបរាប់តាមការឲ្យដឹងពីអ្នកភូមិថា មួយរយៈកន្លងមកនេះ យុវជនខាងលើបានចាកចេញពីផ្ទះរបស់គេ ដោយប្រាប់អ្នកភូមិថា គេទៅលេងម្តាយ នៅឯភ្នំពេញ អស់រយៈពេលជាច្រើនថ្ងៃ ហើយផ្ទះនៅភូមិកោះចិនបានបិទទ្វារចាក់សោចោល រហូតមកដល់ពី៤ទៅ៥ថ្ងៃមុននេះ ទើបគេត្រឡប់មកវិញ។ លុះមកដល់ព្រឹក ថ្ងៃទី៨ ខែកញ្ញា ឆ្នាំ២០១៨ គេបានចេញទៅច្រូតស្មៅឱ្យគោជាមួយនឹងអ្នកជិតខាង។
លោកអធិការនគរបាលស្រុកកោះសូទិន បានបន្ដថា បន្ទាប់ពីត្រឡប់មកពីច្រូលស្មៅគោវិញ យុវជនខាងលើបានទៅទិញស្រាមកអង្គុយផឹកតែម្នាក់ឯង នៅលើផ្ទះរបស់គេ។ ក្រោយមក គេបានប្រាប់ទៅអ្នកជិតខាងថា សូមឱ្យជួយប្រាប់ដល់សាច់ញាតិរបស់ខ្លួនផងថា “ល្ងាចនេះ រូបគេមិនស្រួលខ្លួនទេ សូមជួយប្រាប់ទៅបងប្អូនឱ្យបានដឹង និងស្រះរបងបិទផង ព្រោះនៅក្នុងខ្លួន ហាក់មានវិញ្ញាណមនុស្សប៉ុន្មាននាក់មកចូលសណ្ឋិតនៅក្នុងខ្លួន»។
លោកអធិការនគរបាលស្រុកកោះសូទិន បានបន្តថា បើទោះជា យុវជនខាងលើនេះនិយាយបែបនេះក្ដី ក៏អ្នកភូមិមិនបានចាប់អារម្មណ៍នោះដែរ។ លុះមកដល់វេលាម៉ោង៧ និង៣០នាទីយប់ អ្នកជិតខាងបានឮសូរសំឡេងឆ្កែស្រែក ទើបពួកគាត់នាំគ្នាបញ្ចាំងភ្លើងពិលមើល ក៏ឃើញយុវជនម្នាក់នេះកំពុងតែចាប់ហែកកូនឆ្កែទាំងរស់ ជញ្ជក់ឈាម និងស៊ីគួរឱ្យរអើមបំផុត។
លោកអធិការនគរបាលដដែល បានបន្តថា ឃើញបែបនេះ ម្តាយរបស់គេបានខំប្រឹង និយាយលួងលោមកូនប្រុសរបស់គាត់យ៉ាងខ្លាំង តែកូនប្រុសមិនព្រមបើកទ្វារផ្ទះឱ្យអ្នកណាម្នាក់ចូលក្នុងផ្ទះនោះទេ។ រហូតមកដល់រសៀលថ្ងៃទី៩ ខែកញ្ញា លោកដឹកនាំកម្លាំងព្រហ្មទណ្ឌស្រុកចុះដល់ផ្ទះកើតហេតុ ឃើញយុវជនម្នាក់កំពុងចាប់មាន់១ក្បាលហែកស៊ី និងជញ្ជក់ឈាម រួចហើយបានបោះមកដី។
លោកអធិការនគរបាលស្រុកកោះសូទិន បានឲ្យដឹងថា នៅពេលឃើញសកម្មភាពកូនរបស់ខ្លួនធ្វើបែបនេះ ម្ដាយរបស់គេ និងអ្នកភូមិគិតទៅលើជំនឿអរូបី ទើបនាំគ្នាអុជធូបបួងសួងដល់ដូនតាឱ្យជួយអន្ទងចិត្តកូនប្រុសឱ្យព្រមចេញពីក្នុងផ្ទះ។ លុះបន្តិចក្រោយមក យុវជនម្នាក់នេះបានទ្វារផ្ទះចុះមកដី ហើយរត់ឡើងទៅលើផ្ទះវិញ។ រីឯសមត្ថកិច្ចក៏ចេះតែតាមឃ្លាំមើល ខ្លាចកើតមានបញ្ហាជាយថាហេតុ រហូតដល់វេលាម៉ោងជិត៦ល្ងាច ទើបសមត្ថកិច្ចប្រើវិធីសាស្ត្របញ្ឆោត និងប្រើកម្លាំងឡើងទៅលើផ្ទះចាប់ និងប្រគល់ឱ្យម្តាយនាំទៅទុក នៅឯវត្តសិន ដើម្បីបន្តព្យាបាលជំងឺ ព្រោះរូបគេពិតជាមានសតិលែងប្រក្រតីទៅហើយ៕