ភ្នំពេញ ៖ រថយន្តទំនើបម៉ាក ហ្វើរ៉ារី (Ferrari) មួយគ្រឿង បើកបរក្នុងល្បឿនលឿនបានជ្រុលចង្កូតរេឡើងលើខឿនថ្មចិញ្ចើមផ្លូវ បន្តទៅបុកគម្របលូទឹកស្អុយ កៀបជាប់នឹងដើមត្នោត មុខភូមិគ្រឹះឯកឧត្តម ជា សុផារ៉ា ទៅមុខលែងរួច ។
បណ្តាលអោយរថយន្តទំនើបរងការខូចខាតយ៉ាងដំណំ តែសំណាងល្អអ្នកបើកបរគ្រាន់តែរងរបួសស្រាលស្រាលប៉ុណ្ណោះ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី០៧ កញ្ញា ២០១៨ នៅតាមបណ្តោយផ្លូវលេខ៥៩៨ ស្ថិតក្នុងភូមិទួលពពែ សង្កាត់ទួលសង្កែ២ ខណ្ឌឫស្សីកែវ ត្រង់ចំណុចមុខភូមិគ្រឹះលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដីនគរូបនីយកម្ម និងសំណង់ ។
រថយន្តដែលជួបហេតុការណ៍គ្រោះថ្នាក់នេះ ម៉ាក ហ្វើរ៉ារី (Ferrari) ពណ៌ក្រហម ជាប្រភេទរថយន្តទំនើប និងមានតម្លៃកប់ពពក ពាក់ស្លាកលេខភ្នំពេញ 2AJ-7777 រងការខូចខាតយ៉ាងដំណំ តែសំណាងល្អអ្នកបើកបរគ្រាន់តែរងរបួសស្រាលស្រាលប៉ុណ្ណោះ មិនត្រូវបានស្គាល់អត្តសញ្ញាណនោះឡើយ ។
ក្រោយពេលកើតហេតុ សមត្ថកិច្ចប៉ុស្តិ៍ និងសមត្ថកិច្ចជំនាញក្រុង បានមកដល់កន្លែងកើតហេតុ ប៉ុន្តែដោយពិនិត្យមើលឃើញរថយន្តខាងលើ មិនបង្កឱ្យប៉ះពាល់ដល់ទ្រព្យសម្បត្តិរដ្ឋ ហើយម្ចាស់រថយន្តបានចេញមុខ មកដោះស្រាយជាមួយតំណាង ដោយយល់ព្រមជួសជុលឱ្យម្ចាស់ផ្ទះទាំងស្រុង ដើម្បីបញ្ចប់រឿងនៅកន្លែងកើតហេតុ ទើបអនុញ្ញាតិឱ្យម្ចាស់រថយន្ត ហៅរថយន្តស្ទូចមកធ្វើការស្ទូចរថយន្តទំនើបខាងលើ យកទៅជួសជុលដោយខ្លួនឯង ៕