ខេត្តក្រចេះ ៖ បុរសម្នាក់បានបបួលមិត្តភក្តិជិតស្និទ្ធម្នាក់ ផឹកស៊ីនៅផ្ទះរបស់ខ្លួន ហើយព្យាយាមបង្អកស្រាមិត្តភក្តិនោះរហូតដល់ស្រវឹងក្រោកមិនរួច ក៏ជិះម៉ូតូទៅចាប់រំលោភប្រពន្ធមិត្តភក្តិ រហូតបានសម្រេច មួយភ្លែតដល់ទៅ២ដង ទើបស្ត្រីរងគ្រោះទម្លាយរឿងប្រាប់ប្តី ក៏ឈានដល់ការដាក់ពាក្យបណ្តឹង ឱ្យសមត្ថកិច្ចចាប់យកមកចាត់ការតាមច្បាប់ ។
ករណីរំលោភសេពសន្ថវៈខាងលើនេះ បានកើតឡើងកាលពីយប់ថ្ងៃទី០៥ កញ្ញា ២០១៨ នៅចំណុចឃុំស្នួល ស្រុកស្នួល ។ លុះស្ត្រីរងគ្រោះដាក់ពាក្យបណ្តឹង ក៏ត្រូវសមត្ថកិច្ចចុះឃាត់ខ្លួនជនសង្ស័យបាន កាលពីព្រឹកថ្ងៃទី០៧ កញ្ញា នៅចំណុចភូមិឃុំកើតហេតុខាងលើ ។
ជនសង្ស័យខាងលើ ឈ្មោះស ឌី អាយុ៣៨ឆ្នាំ មុខរបរកសិករ មានលំនៅក្នុងឃុំស្នួល ស្រុកស្នួល ។ ចំណែកស្ត្រីរងគ្រោះ មានអាយុ៣៥ឆ្នាំ ត្រូវជាប្រពន្ធរបស់មិត្តភក្តិជិតស្និទ្ធ ជាមួយជនសង្ស័យខាងលើ និងមានលំនៅក្នុងភូមិឃុំកើតហេតុខាងលើជាមួយគ្នា ។
តាមសម្តីស្ត្រីរងគ្រោះ បានរៀបរាប់ប្រាប់ថា នៅមុនពេលកើតហេតុ កាលពីយប់ថ្ងៃទី០៥ កញ្ញា ជនសង្ស័យបានមកបបួលប្តីរបស់នាង ដែលត្រូវជាមិត្តភក្តិជិតស្និទ្ធនឹងគ្នា ផឹកស៊ីនៅផ្ទះរបស់ជនសង្ស័យ ។ បន្ទាប់មក ជនសង្ស័យ ក៏បានព្យាយាមបង្អកស្រាប្តីរបស់នាង រហូតដល់ស្រវឹងជោកជាំ ក្រោកលែងរួច (សម្តីប្តីនិយាយប្រាប់ប្រពន្ធ) ។ លុះមកដល់វេលាម៉ោង៩យប់ ថ្ងៃដដែល ជនសង្ស័យក៏បានជិះម៉ូតូ មកផ្ទះរបស់នាង និងបានមកប្រាប់នាងថា ឱ្យទៅយកប្តីផង ព្រោះផឹកស្រវឹងដេកងើបមិនរួច នៅផ្ទះរបស់គេ ។
ស្ត្រីរងគ្រោះ បន្តថា ភ្លាមនោះ ជនសង្ស័យក៏បានហៅឱ្យនាងឡើងជិះម៉ូតូជាមួយគេទៅ ចាំគេ នាំទៅយកប្តី ចំណែកនាងហេតុតែទុកចិត្តពេក ព្រោះជាមិត្តភក្តិរបស់ប្តី ក៏ព្រមឡើងម៉ូតូ ទៅជាមួយជនសង្ស័យទាំងយប់ ស្រាប់តែ ពេលដឹកនាងដល់ពាក់កណ្តាលផ្លូវ ដែលជាកន្លែងស្ងាត់ ជនសង្ស័យក៏បានឈប់ម៉ូតូ រួចចាប់អូសនាងចុះពីលើម៉ូតូ និងបានគំរាមសម្លាប់ នាងចោល ប្រសិនបើនាងហ៊ានស្រែក បន្ទាប់មក ជនសង្ស័យក៏បានចាប់នាងរំលោភរហូតដល់បានសម្រេចតែម្តង ចំណែកនាងក៏មិនហ៊ានស្រែកទេ ព្រោះខ្លាចជនសង្ស័យសម្លាប់បំបិតមាត់ ហើយបើទោះជាស្រែកក៏គ្មានអ្នកលឺដែរ ព្រោះតំបន់នោះដាច់ស្រយាលពីភូមិ គ្មានមនុស្សនៅទេ ។
ស្ត្រីរងគ្រោះ បន្តទៀតថា ក្រោយពីចាប់នាងរំលោភបានសម្រេចមួយលើកហើយ ជនសង្ស័យក៏បានដឹកនាងបំណងត្រឡប់ទៅផ្ទះនាងវិញ ស្រាប់តែទៅជិតដល់ផ្ទះរបស់នាងទៅហើយ ជនសង្ស័យមិនទាន់ស្កប់ស្កល់ ក៏ឈប់ម៉ូតូចាប់ខ្ទប់មាត់រំលោភនាងរហូតដល់បានសម្រេចមួយលើកទៀត សរុបទៅ តែមួយភ្លែតសោះ ជនសង្ស័យចាប់នាងរំលោភរហូតបានសម្រេចដល់ទៅ២ដង ។
ស្ត្រីរងគ្រោះ បន្ថែមថា ក្រោយពីត្រូវជនសង្ស័យចាប់រំលោភរួចហើយ នាងមិនទាន់ហ៊ានប្រាប់ប្តីភ្លាមៗទេ រហូតមកដល់ ព្រឹកថ្ងៃទី០៧ កញ្ញា ទើបនាងដាច់ចិត្តរៀបរាប់ប្រាប់ថាប្តី និងត្រូវប្តីនាំនាងទៅដាក់ពាក្យបណ្តឹង ដើម្បីឱ្យសមត្ថកិច្ចជួយអន្តរាគមន៍តែម្តង ។
នគរបាលស្រុកស្នួលបានឱ្យដឹងថា ក្រោយពីទទួលបានពាក្យបណ្តឹងពីស្ត្រីរងគ្រោះរួចមក សមត្ថកិច្ចបានចុះធ្វើការស្រាវជ្រាវ និងឃាត់ខ្លួនជនសង្ស័យភ្លាមៗ នាំយកមកសាកសួរ ។
នៅចំពោះមុខសមត្ថកិច្ច ជនសង្ស័យឈ្មោះស ឌី បានឆ្លើយសារភាពថា ខ្លួនពិតជាបានប្រព្រឹត្តដូចអ្វីដែលស្ត្រីរងគ្រោះប្តឹងចោទប្រកាន់មែន ពេលដឹងថាមិត្តភក្តិជិតស្និទ្ធរបស់ខ្លួនស្រវឹងក្រោកលែងរួច ខ្លួនក៏បែកគំនិតចង់ប្រពន្ធក្លើ ក៏ជិះម៉ូតូទៅបញ្ឆោតនាងថា មកយកប្តី រួចក៏ចាប់រំលោភនាង តាមផ្លូវរហូតដល់បានសម្រេច២ដងតែម្តង ៕