ខេត្តកណ្ដាល៖ បុរសមួយក្រុមបានព័ទ្ធវង់ផឹកស៊ី ជល់កែវគ្នាចុះឡើង ស្រាប់តែទាស់ពាក្យសម្ដីគ្នា ទាញកាំបិតចាក់ប្រហារទៅលើគូទំនាស់ បណ្ដាលឲ្យរងរបួសធ្ងន់ កាលពីវេលាម៉ោង៦ និង៣០នាទីល្ងាច ថ្ងៃទី៦ ខែកញ្ញា ឆ្នាំ២០១៨ នៅងត្រង់ចំណុចសួនច្បារមាត់ស្ទឹង ស្ថិតក្នុងភូមិដើមមៀន សង្កាត់ដើមមៀន ក្រុងតាខ្មៅ។
មន្រ្ដីនគរបាលក្រុងតាខ្មៅ បានឲ្យដឹងថា ជនសង្ស័យជាប់ពាក់ព័ន្ធនឹងអំពើហិង្សា ហើយត្រូវសមត្ថកិច្ចចាប់ខ្លួននោះ ឈ្មោះ សា តាម អាយុ៥៧ឆ្នាំ (មានរបួសស្នាម១កន្លែង ត្រង់បាតដៃខាងស្តាំ)។ រីឯជនរងគ្រោះ ឈ្មោះ សុខ ចាន់ អាយុ៤៤ឆ្នាំ (មានរបួសស្នាម៣កន្លែង ត្រង់កញ្ចឹងក១កន្លែង ខ្នង១កន្លែង និងកំភួនដៃខាងឆ្វេង១កន្លែង)។ ពួកគាត់ទាំង២នាក់ (ជនសង្ស័យ និងជនរងគ្រោះ) មានលំនៅក្នុងភូមិព្រែកតាពៅ១ សង្កាត់ដើមមៀន ក្រុងតាខ្មៅ។ ចំណែកវត្ថុតាងដែលសមត្ថកិច្ចដកហូតបាន មានកូនកាំបិតចុងស្រួច១ មានប្រវែង២០សង់ទីម៉ែត្រ (ជារបស់ជនសង័្សយ)។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវអំពើហិង្សានោះ ជនសង្ស័យបានផឹកស្រាម្នាក់ឯង នៅផ្ទះរបស់ខ្លួន អស់ប្រហែលកន្លះលីត្រ។ បន្ទាប់មក ជនសង្ស័យបានដើរមកកម្សាន្ដលេង នៅតាមសួនច្បារមាត់ស្ទឹងតាខ្មៅ ហើយបានជួបនឹងជនរងគ្រោះដែលកំពុងអង្គុយផឹកស្រាជាមួយមិត្តភក្ដិម្នាក់ទៀត នៅលើបង់។ ភ្លាមៗនោះ ជនសង្ស័យបានដើរចូលទៅផឹកជាមួយអស់មួយកែវ ស្រាប់តែនិយាយទាស់ពាក្យសំដីគ្នា ធ្វើឲ្យជនសង័្សយ និងជនរងគ្រោះប្រតាយប្រតប់គ្នា។ នៅពេលនោះជនសង័្សយបានយកកូនកាំបិត ស្ទុះចាក់ប្រហារទៅលើជនរងគ្រោះចំនួន៣កន្លែង គឺត្រង់កញ្ចឹងក១កន្លែង ខ្នង១កន្លែង និងកំភួនដៃខាងឆ្វេង១កន្លែង បណ្ដាលឲ្យរងរបួសយ៉ាងដំណំ។
ក្រោយពេលកើតហេតុភ្លាម សមត្ថកិច្ចបានចុះទៅឃាត់ខ្លួនជនសង័្សយ នាំទៅកាន់អធិការដ្ឋាននគរបាល ដើម្បីសាកសួរ និងចាត់ការតាមនីតិវិធី។ ដោយឡែក ជនរងគ្រោះត្រូវបានក្រុមគ្រួសារនាំទៅព្យាបាល នៅក្នុងមន្ទីរពេទ្យ៕
