ខេតរតនគិរី៖ ជនជាតិដើមភាគតិចគ្រឹង កាលពីវេលាម៉ោង៩ព្រឹក ថ្ងៃទី៤ ខែកញ្ញា ឆ្នាំ២០១៨ កន្លងទៅថ្មីនេះ បាននាំគ្នាដឹកក្របីឈ្មោលមួយក្បាល មកកាត់ក ដើម្បីសែនព្រេនដល់អ្នកតាភូមិ និងអ្នកតាភ្នំ សុំសេចក្ដី សុខសប្បាយដល់អ្នកភូមិទាំងមូល។
ជនជាតិដើមភាគតិចគ្រឹង និងកាចក់ ភាគច្រើនរស់នៅក្នុងទឹកដីខេត្តរតនគីរី នាភូមិភាគឦសាន នៃប្រទេសកម្ពុជា ដែលមានចម្ងាយប្រហែល៥៨៨គីឡូម៉ែត្រ ពីរាជធានីភ្នំពេញ។ បើយើងធ្វើដំណើរទៅកាន់តំបន់នោះ គឺត្រូវធ្វើដំណើរតាមផ្លូវជាតិលេខ៧ និងផ្លូវជាតិលេខ១៣។
បើតាមសម្ដីរបស់បងប្អូនជនជាតិដើមភាគតិច បានឲ្យដឹងថា នៅក្នុងខេត្តត្តនេះ មានបងប្អូនជនជាតិភាគតិចរស់នៅ៦៥ភាគរយ។ កាលពីរាប់រយឆ្នាំមុន ពួកគាត់ចូលចិត្តរស់នៅតាមរបៀបកុលវសម្ព័ន្ធ គឺរស់នៅតាមតំបន់ព្រៃភ្នំ និងកាន់សាសនាព្រហ្មញ្ញ មានជំនឿទៅលើអារុក្ខអារក្ស អ្នកតាភ្នំ និងអ្នកតាភូមិ។
បងប្អូនជនជាតិភាគតិចដដែល បានបន្តថា ជនជាតិភាគតិចគ្រឹង និងកាចក់ តែងតែរៀបចំធ្វើពិធីសែនក្របីនេះ ពីព្រោះវាជាកេរដំណែលតតាំងពីដូនតាមក បានបន្សល់ទុករាប់រយឆ្នាំមកហើយ។ រីឯឆ្នាំនេះ ជនជាតិភាគតិចគ្រឹង និងកាចក់ បានជ្រើសរើសយក ថ្ងៃទី៤ ខែកញ្ញា ឆ្នាំ២០១៨ វេលាម៉ោង៩ព្រឹក មកធ្វើពិធីសែនតាមទំនៀមទម្លាប់ដូចតា ដោយកាប់ក្របីឈ្មោលមួយក្បាល សម្រាប់សែនអ្នកតាភូមិ និងអ្នកតាភ្នំ តាមទំនៀមទម្លាប់របស់ពួកគាត់ ដែលជាអ្នករស់នៅក្នុងភូមិកោះពាក ឃុំកោះពាក ស្រុកវើនសៃ ខេត្តរតនគិរី។
បងប្អូនជនជាតិភាគតិចរស់នៅក្នុងភូមិកោះពាក បានបន្តថា ការធ្វើពិធីតាមទំនៀមទម្លាប់របស់ពួកគាត់នេះ ក៏មានការឯកភាពគ្នា និងរៀបចំធ្វើឡើង នៅផ្ទះលោកតា នូល យ៉ាំង អាយុ៧០ឆ្នាំ ជនជាតិគ្រឹង មានមុខងារជាជំទប់ទី២ ឃុំកោះពាក។
អ្នកភូមិកោះពាក បានបន្តថា កម្មវិធីនេះ គឺបងប្អូនតែងតែប្រារព្ធធ្វើ ក្នុងមួយឆ្នាំម្ដង តាមប្រព្រៃណីជនជាតិគ្រឹង និងកាចក់។ បើតាមជំនឿរបស់ពួកគាត់ គឺបើមិនរៀបចំសែននោះទេ អ្នកតាភូមិ និងអ្នកតាភ្នំខឹង នាំឲ្យពួកគាត់មិនមានសេចក្ដីសុខ។ នៅក្នុងពិធីនេះ មានការរៀបចំសំណែនសែន ដូចជាសត្វក្របីឈ្មោលមួយក្បាល និងមានភ្លេងរបស់បងប្អូនជនជាតិ វាយគងរាំជុំវិញសត្វក្របី មុននឹងកាប់សម្លាប់ រួមទាំងស្រាពាងជាច្រើនពាង រៀបចំសែន នឹកគុណដល់ជីដូនជីតា ដែលបានចែកឋានទៅ និងនឹកគុណដល់អារុក្ខអារក្ស អ្នកតាភ្នំ និងអ្នកតាភូមិផងដែរ៕
