ព្រះសីហនុ ៖ ជនជាតិចិន២នាក់ទៀត ត្រូវបានកម្លាំងការិយាល័យប្រឆាំងការជួញដូរមនុស្ស និងការពារអនីតិជន សហការជាមួយកម្លាំងអធិការដ្ឋាននគរបាលក្រុងព្រះសីហនុ ឃាត់ខ្លួនខណៈពេលកំពុងដើរផ្សព្វផ្សាយចែកខិតប័ណ្ណមានរូបអាសអាភាព បង្កប់ន័យបម្រើសេវាផ្លូវភេទ ។
ការឃាត់ខ្លួនជនសង្ស័យជនជាតិចិន ចំនួន២នាក់នេះធ្វើឡើងកាលពីម៉ោងជិត០១យប់រំលងអាធ្រាត្រឆ្លងចូលថ្ងៃទី០៦ ខែកញ្ញា ឆ្នាំ២០១៨ នៅចំណុចឆ្នេរអូរឈើទាល ក្នុងសង្កាត់៤ ក្រុងព្រះសីហនុ ។
លោក ជួន ណារិន្ទ ស្នងការដ្ឋាននគរបាលខេត្តព្រះសីហនុ បានឱ្យដឹងថា ជនសង្ស័យដែលឃាត់ខ្លួនបានមានទី១-ឈ្មោះ HUANG JI ភេទប្រុស អាយុ៣៥ឆ្នាំ ជនជាតិចិន (គ្មានលិខិតឆ្លងដែនជាប់ខ្លួន) ទី២-ឈ្មោះ XIA LU ភេទប្រុស អាយុ២៦ឆ្នាំ ជនជាតិចិន (គ្មានលិខិតឆ្លងដែនជាប់ខ្លួន) ។
ក្រោយពីបានឃាត់ខ្លួន កម្លាំងជំនាញបានឈានទៅធ្វើការឆែកឆេរកន្លែងស្នាក់នៅរបស់ជនសង្ស័យ នៅហាងម៉ាស្យា យីហោ SPA ស្ថិតក្នុងក្រុមទី២ ភូមិ៤ សង្កាត់៤ ក្រុងព្រះសីហនុ ដោយបាននាំខ្លួនស្ត្រីជនជាតិចិនចំនួន១០នាក់ នៅក្នុង ហាងម៉ាស្យា ដោយដកហូតបានវត្ថុតាង មានខិតប័ណ្ណមានរូបអាសអាភាស៧២ប្រអប់ (១ប្រអប់ស្មើនឹង៥០០សន្លឹក), សៀវភៅកត់ត្រា ៣ក្បាល,- ស្រោមអនាម័យមិនទាន់ប្រើចំនួន ៨០ស្រោម, ស្រោមអនាម័យប្រើរួចចំនួន ០៥ស្រោម, អាយផេត ម៉ាក Dinabook ១គ្រឿង, កាបូបដាក់ស្រោមអនាម័យចំនួន៣, វិទ្យុទាក់ទងម៉ាក Magaband ចំនួន៣គ្រឿង ។
ជនសង្ស័យទាំង២នាក់ និងស្ត្រីចំនួន១០នាក់ត្រូវបានកម្លាំងជំនាញកំពុងធ្វើការសាកសួរតាមនីតិវិធី នៅការិយាល័យប្រឆាំងការជួញដូរមនុស្សនិងការពារអនីតិជន នៃស្នងការដ្ឋាននគរបាលខេត្ត ។
សូមរម្លឹកថា កាលពីយប់ថ្ងៃទី១២ ខែសីហា ឆ្នាំ២០១៨ កន្លងទៅ សមត្ថកិច្ចនគរបាលខេត្តព្រះសីហនុ បានស្រាវជ្រាវឆ្មក់ចាប់បានជនជាតិចិន ដែលជាអ្នកដើរផ្សព្វផ្សាយចែកខិត្តប័ណ្ណម៉ាស្សាចំនួន៦នាក់ និងដកហូតបានខិត្តប័ណ្ណជាច្រើនសន្លឹក ។ ករណីនេះ សមត្ថកិច្ចគ្រាន់តែបានអប់រំឲ្យជនសង្ស័យទាំង៦ ធ្វើកិច្ចសន្យាបញ្ឈប់សកម្មភាពផ្សព្វផ្សាយទាំងស្រុងតែប៉ុណ្ណោះ ៕
