ខេត្តប៉ៃលិន៖ ជនទំនើងម្នាក់ទើបនឹងត្រឡប់មកពីផឹកស្រវឹង បង្ករឿងនៅក្នុងគ្រួសារ ហើយវាយបំផ្លិចបំផ្លាញសម្ភាររបស់ឪពុកម្ដាយ ក៏ត្រូវសមត្ថកិច្ចចុះទៅឃាត់ខ្លួន កាលពីវេលាម៉ោង២រសៀល ថ្ងៃអាទិត្យ ០៧រោច ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២ ខែកញ្ញា ឆ្នាំ២០១៨ នៅក្នុងភូមិទួលខ្ពស់ ឃុំស្ទឹងត្រង់ ស្រុកសាលាក្រៅ។
មន្ត្រីនគរបាលស្រុកសាលាក្រៅ បានឲ្យដឹងថា ជនសង័្សយជាប់ពាក់ព័ន្ធនឹងអំពើហិង្សា នៅក្នុងគ្រួសារ ហើយត្រូវសមត្ថកិច្ចឃាត់ខ្លួននោះ ឈ្មោះ គឹម មិថុនា អាយុ២៩ឆ្នាំ។ រីឯជនរងគ្រោះជាម្ដាយ ឈ្មោះ សុទ្ធ ញី អាយុ៦៧ឆ្នាំ មុខរបរជាកសិករ។ ពួកគេទាំងពីម្ដាយ និងកូន រស់នៅភូមិឃុំកើតហេតុខាងលើ។
ប្រភពព័ត៌មានពីកន្លែងកើតហេតុ បានឲ្យដឹងថា ជនទំនើងម្នាក់នេះតែងតែបង្កហិង្សា នៅក្នុងគ្រួសារជាញឹកញាប់ ប៉ុន្តែម្ដាយរបស់គេចេះតែណែនាំកូន ក្រែងលោគេកែខ្លួន។ លុះមកដល់ថ្ងៃកើតហេតុ មិនដឹងថា ជននេះដើរមកពីផឹកនៅទីណាទេ ស្រាប់តែគេបង្ករឿងនៅក្នុងគ្រួសារ រួចហើយយកពូថៅវាយផ្លាញទូកញ្ចក់ និងសម្ភារនៅក្នុងផ្ទះ រហូតធ្វើឲ្យម្ដាយរបស់គេអត់ទ្រាំលែងបាន ក៏ប្ដឹងទៅសមត្ថកិច្ចឲ្យចុះមកឃាត់ខ្លួនតែម្ដង។
ក្រោយពេលកើតហេតុ សមត្ថកិច្ចបានចុះទៅឃាត់ខ្លួនជនសង័្សយ នាំមកកាន់អធិការដ្ឋាននគរបាលស្រុក ដើម្បីសាកសួរ និងចាត់ការតាមនីតិវិធី៕