សៀមរាប៖ ជារឿងដ៏សោកស្ដាយបំផុតមួយ ដោយសារកាលពីថ្ងៃទី២៩ សីហា កន្លងទៅនេះ លោក អា គីរ៉ា ព្រមទាំងមនុស្ស ២នាក់ផ្សេងទៀត ត្រូវបានចាប់ខ្លួន នៅស្នាក់ការរបស់អង្គការសារមន្ទីរមីនលោក អាគីរ៉ា ផ្ទាល់ដែលស្ថិតនៅភូមិខ្នារ ឃុំខ្នារសណ្ដាយ ស្រុកបន្ទាយស្រី ខេត្តសៀមរាប ហើយត្រូវបានកម្លាំងនគរបាលព្រហ្មទណ្ឌកម្រិតធ្ងន់ កសាងសំណុំរឿងបញ្ជូនទៅកាន់សាលាដំបូងខេត្ត នារសៀលថ្ងៃទី៣០ ខែសីហា ដើម្បីចាត់ការតាមផ្លូវច្បាប់។
សូមរំឭកឱ្យដឹងដែរថា លោក អា គីរ៉ា ជាបុរសជនជាតិខ្មែរម្នាក់ ដែលធ្លាប់បានស្ថាននីយទូរទស្សន៍ព័ត៌មានពិភពលោក CNN អញ្ជើញក្នុងន័យបង្ហាញពិភពលោកឱ្យបានដឹង និងស្គាល់ថា គាត់គឺជាវីរបុរសម្នាក់ដែលហ៊ានលះបង់ មិនស្ដាយជីវិត ដើម្បីជួយប្រជាពលរដ្ឋខ្មែររាប់លាន់នាក់ ឱ្យរួចផុតពីគ្រោះថ្នាក់ ដោយសារគ្រាប់មីនមិនទាន់ផ្ទុះ ដែលបានសេសសល់តាំងពីសម័យសង្គ្រៀម ហើយក្នុងឱកាសនោះដែរ បុរសម្នាក់នោះ បានធ្វើឱ្យមនុស្សទាំងអស់ នៅក្នុងវេទិកា ស្រក់ទឹកភ្នែកដោយសារតែវីរភាពរបស់លោក ។
បុរសក្លាហានខាងលើ ដែលបច្ចុប្បន្នក្លាយជាជនសង្ស័យនេះ កើតនៅឆ្នាំ ១៩៧៣ ក្នុងខេត្តសៀមរាប បច្ចុប្បន្នមានការងារជាអ្នកធ្វើយុទ្ធនាការកម្ចាត់គ្រាប់មីន, អ្នកថែរក្សាសារមន្ទីរឯកជនមួយ និងជាប្រធានអង្គការក្រៅរដ្ឋាភិបាល «all-Khmer de-mining NGO»ថែមទៀតផង ហើយកាលពីកុមារភាព លោកជាអតីតទាហ៊ានកុមារ ក្នុងរបបខ្មែរក្រហម ។
លោក អា គីរ៉ា ស្ទើរតែបានលះបង់ជីវិតរបស់គាត់ ដើម្បីលុបបំបាត់គ្រាប់មីននៅកម្ពុជា និងយកចិត្តទុកដាក់ដល់ជនរងគ្រោះដោយសារគ្រាប់មីនវ័យក្មេង ។ លោក អា គីរ៉ា ដដែលបានបញ្ជាក់ថា ចាប់តាំងពីឆ្នាំ ១៩៩២ មក លោកបានលុបបំបាត់ចោល និងបំផ្លាញ គ្រាប់មីនចំនួន ៥០០០០គ្រាប់ ដោយផ្ទាល់ ហើយជាអ្នកបង្កើតសារមន្ទីរគ្រាប់មីនមួយនៅខេត្តសៀមរាប ដែលជាស្រុកកំណើតរបស់លោក ។
ដោយសារតែវីរភាពដ៏អង្គអាច ដូចនេះទើបកាលខែកក្កដា ឆ្នាំ ២០១០ លោក អា គីរ៉ា ត្រូវាបានជ្រើសជាវីរជនតែម្នាក់គត់ក្នុងប្រទេសកម្ពុជា ដែលត្រូវទៅទទួលពាន «Hero» នៅសា្ថនីយទូរទស្សន៍ CNN ហើយនៅក្នុងខែកញ្ញា ឆ្នាំដដែល លោក និងវីរបុរស ៩រូបមកពីប្រទេសផ្សេងៗទៀត បានឈរទទួលពាន «Hero» ប្រចាំសា្ថនីយទូរទស្សន៍ CNN ដោយមានការចូលរួមពីសំណាក់ភ្ញៀវអន្តរជាតិជាច្រើននាក់ផងដែរ ៕
សហការី KBN
អត្ថបទស្រាវជ្រាវ
