ខេត្តឧត្តរមានជ័យ៖ គោយន្តមួយគ្រឿង បានបើកយ៉ាងលឿន ស្រាប់តែរេចង្កូតធ្លាក់ជង្ហុកផ្ងារជើង បណ្ដាលឲ្យមនុស្ស៦នាក់រងរបួស កាលពីវេលាម៉ោង១ និង៣០នាទីរសៀល ថ្ងៃទី៣១ ខែសីហា ឆ្នាំ២០១៨ នៅត្រង់ចំណុចផ្លូវចុះចំណោតពីលើច្រកជប់គគីរ ស្ថិតក្នុងភូមិជប់គគីរខាងលិច ឃុំអំពិល ស្រុកបន្ទាយអំពិល។
មន្ត្រីនគរបាលចរាចរស្រុកបន្ទាយអំពិល បានឲ្យដឹងថា ជនរងគ្រោះ នៅក្នុងហេតុការណ៍ រួមមាន ទី១- ឈ្មោះ ផន ផៃ ភេទប្រុស អាយុ៣៨ឆ្នាំ (អ្នកបើកបរ) របួសស្រាល ទី២-ឈ្មោះ ស្រី ហ៊ូវ ភេទស្រី អាយុ ៣៨ឆ្នាំ របួសធ្ងន់, ទី៣-ឈ្មោះ ហ៊ាក់ លី ភេទស្រី អាយុ៣៨ឆ្នាំ របួសស្រាល, ទី៤-ឈ្មោះ មឿត ឡែប ភេទស្រី អាយុ១២ឆ្នាំ របួសស្រាល, ទី៥-ឈ្មោះ មីត បូ ភេទស្រី អាយុ៤៨ឆ្នាំ របួសធ្ងន់ និងទី៦-ឈ្មោះ ហ៊ុង ហឿយ ភេទប្រុស អាយុ៣៨ឆ្នាំ របួសស្រាល។ ពួកគេទាំងអស់គ្នា រស់នៅភូមិគោកត្រាង ឃុំជើងទៀន ស្រុកចុងកាល់ ខេត្តឧត្តរមានជ័យ។
ប្រភពព័ត៌មានដដែល បានឲ្យដឹងថា មុនពេលកើតហេតុ គេឃើញគោយន្តមួយគ្រឿងដឹកមនុស្សប្រុសស្រីចំនួន៦នាក់ បានបើកបរយ៉ាងលឿន។ លុះពេលគោយន្តកន្ត្រៃបើកមកដល់ចំណុចកើតហេតុ ស្រាប់តែរេចង្កូតធ្លាក់ចូលជង្ហុកក្រឡាប់ផ្ងារជើង បណ្ដាលឲ្យរងរបួសធ្ងន់ចំនួន២នាក់(ស្រី) និងរបួសស្រាលចំនួន ០៤នាក់។
ក្រោយពេលកើតហេតុ អ្នករងរបួសទាំងអស់ ត្រូវគេបញ្ជូនទៅសង្រ្គោះ នៅក្នុងមន្ទីរពេទ្យ នៃប្រទេសថៃ តាមច្រកជប់គគីរ នៃប្រទេសកម្ពុជា៕
