ភ្នំពេញ៖ បុរសកំណាចម្នាក់ទើបនឹងចេញពីផឹកស្រា ដើរត្រឡប់មកដល់ផ្ទះ ស្រាប់តែចាប់ផ្តើមបង្ករឿង ស្រែកឡូឡា ជេរបញ្ចោរប្រពន្ធកូន និងបោកចានឆ្នាំងបែកខ្ទេច រហូតធ្វើឲ្យប្រពន្ធអត់ទ្រាំមិនបាន ក៏សួរនាំ ស្រាប់តែគេស្ទុះទៅចាប់ប្រពន្ធបោកផ្ទប់នឹងជញ្ជាំង ទើបកូនស្រីស្ទុះទៅជួយម្តាយ ក៏ត្រូវឪពុកកំណាចចាប់ច្របាច់កវិះក្ស័យ បង្កឲ្យភ្ញាក់ផ្អើលឡើង កាលពីវេលាម៉ោង១១ និង៣០នាទីព្រឹក ថ្ងៃទី២៨ ខែសីហា ឆ្នាំ២០១៨ នៅក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ។
មន្ត្រីនគរបាលខណ្ឌពោធិ៍សែនជ័យ បានឲ្យដឹងថា ជនសង័្សយជាប់ពាក់ព័ន្ធនឹងអំពើហិង្សា វាយធ្វើបាបប្រពន្ធកូននោះ ឈ្មោះ តាំង សួយហេង អាយុ៣៨ឆ្នាំ មុខរបរជាអ្នករត់ម៉ូតូកង់បី។ រីឯស្ត្រីរងគ្រោះជាប្រពន្ធ ឈ្មោះ សុខ វណ្ណេត អាយុ៣៨ឆ្នាំ មុខរបរជាកម្មការិនីរោងចក្រ។ ចំណែកកូនស្រីរងរបួសដោយសារឪពុកចាប់ច្របាច់កនោះ គឺសមត្ថកិច្ចមិនបានស្គាល់ឈ្មោះនោះទេ គ្រាន់តែដឹងថា នាងទើបនឹងមានអាយុប្រហែលជាង១០ឆ្នាំប៉ុណ្ណោះ។ ក្រុមគ្រួសារខាងលើ មានលំនៅក្នុងភូមិ-សង្កាត់កើតហេតុខាងលើ។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតមាននូវអំពើហិង្សានោះ បុរសកំណាចខាងលើបានចេញពីទៅដើរស៊ីផឹក រហូតស្រវឹងជោកជាំ ទើបគេត្រឡប់មកវិញ។ ប៉ុន្តែគេគ្រាន់តែចូលមកដល់ផ្ទះ ក៏ស្រែកឡូឡា ជេរបញ្ចោរប្រពន្ធកូន រហូតផ្អើលដល់អ្នកជិតខាង។ ឃើញបែបនេះស្រ្ដីជាប្រពន្ធបានសួរនាំ ស្រាប់តែគេស្ទុះទៅវាយ និងចាប់ក្បាលប្រពន្ធបោកផ្ទប់នឹងជញ្ជាំង បណ្ដាលឲ្យរងរបួសធ្ងន់។ ស្ថិតក្នុងសភាពបែបនេះ កូនស្រីម្នាក់ទើបនឹងមានអាយុ១០ឆ្នាំ បានរត់ទៅជួយម្ដាយរបស់នាង ក៏ត្រូវបុរសកំណាចជាឪពុកចាប់កូនស្រីរបស់ខ្លួនច្របាច់កវិះក្ស័យ ទម្រាំអ្នកជិតខាងរត់ទៅជួយទាន់ពេលវេលា។
ក្រោយពេលកើតហេតុ ស្ត្រីជាប្រពន្ធបានដាក់ពាក្យបណ្តឹង ទើបសមត្ថកិច្ចចុះទៅឃាត់ខ្លួនបុរសកំណាចជាប្ដី នាំមកកាន់ប៉ុស្តិ៍នគរបាលរដ្ឋបាលសង្កាត់ចោមចៅទី៣ ដើម្បីសាកសួរ និងកសាងសំណុំរឿង បញ្ជូនទៅកាន់អធិការដ្ឋាននគរបាលខណ្ឌពោធិ៍សែនជ័យ ចាត់ការបន្តតាមច្បាប់៕