ភ្នំពេញ៖ បន្ទាប់ពីលោក សួន សេរីរដ្ឋា សរសេរលិខិតសុំទៅសម្ដេចនាយករដ្ឋមន្ត្រី ដើម្បីទូលថ្វាយព្រះមហាក្សត្រ នៃព្រះរាជាណាចក្រកម្ពុជា សុំព្រះរាជទានទោសនោះមក តុលាការបានសម្រេចដោះលែង លោក សួន សេរីរដ្ឋា អតីតមេបក្សអំណាចខ្មែរឲ្យមានសេរីភាពឡើងវិញ កាលពីល្ងាច ថ្ងៃទី២៣ ខែសីហា ឆ្នាំ២០១៨នេះ។
នៅក្នុងលិខិតរបស់លោក សួន សេរីរដ្ឋា ដែលបានផ្ញើចេញពីពន្ធនាគារនោះ មានខ្លឹមសារដូចតទៅ៖ “ជាថ្មីម្តងទៀត ខ្ញុំបាទសួនសេរីរដ្ឋា សូមគោរពសម្តេចតេជោ នាយឧត្តមសេនីយ៍ផុតលេខ មេត្តាជួយអន្តរាគមន៌ ស្នើសុំលើកលែងទោសឱ្យខ្ញុំបាទ បានរួចផុតពីទោសដែលខ្ញុំបានសរសេរនូវសារនយោបាយផ្សព្វផ្សាយ លើទំព័រហ្វេសប៊ុករបស់ខ្ញុំបាទ នាពេលកន្លងមក ដោយមិនបានពិចារណា ឲ្យបានច្បាស់លាស់ ដែលធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយសរបស់សម្តេច នាយឧត្តមសេនីយ៌ផុតលេខ ផ្កាយមាសប្រាំ និងនាយឧត្តមសេនីយ៍ ព្រមទាំងឧត្តមសេនីយ៍ ជាអគ្គមេបញ្ជាការកងទ័ពជាតិ” ។
នៅក្នុងលិខិតដដែលនោះ លោក សួន សេរីរដ្ឋា បានសម្តែងនូវការសោកស្តាយរាល់កំហុសឆ្គងរបស់ខ្លួន និង សូមអភ័យទោសពីសម្តេច ហ៊ុន សែន នាយឧត្តមសេនីយ៌ផ្កាយផុតលេខ សូមទោសចំពោះនាយឧត្តមសេនីយ៍ ឧត្តមសេនីយ៍ ព្រមទាំងអគ្គបញ្ជាការ អគ្គបញ្ជាការង នៃកងទ័ពជាតិទាំងអស់ សូមមេត្តាទទួលនូវការគោរព និងសុំទោសពីខ្ញុំបាទ”។
លោក សួន សេរីរដ្ឋា បានសន្យាថា ចាប់ពីថ្ងៃនេះតទៅ លោកនឹងមិនសរសេរ ឬនិយាយអ្វី ដែលធ្វើឲ្យប៉ះពាល់ដល់កិត្តិយសជាតិ ដោយគ្មានការពិចារណាតទៅទៀតឡើយ ហើយនឹងចូលរួមការពារនូវសន្តិភាព និងការអភិវឌ្ឍន៍ដែលសម្តេចតេជោ បានខិតខំកសាងយ៉ាងលំបាកជូនជាតិ និងប្រជាជនកម្ពុជា ឡើយ។
នៅក្នុងវេទិកាសំណេះសំណាលជាមួយក្រុមកម្មករ នៅក្នុងខេត្តកណ្តាល កាលពីព្រឹក ថ្ងៃព្រហស្បតិ៍ ទី២៣ ខែសីហា ឆ្នាំ២០១៨ សម្ដេចនាយករដ្ឋមន្ត្ រីហ៊ុន សែន បានប្រកាសឲ្យដឹងពីគម្រោងស្នើសុំលើកលែងទោសទ្រង់ទ្រាយធំ នៅក្នុងឆ្នាំនេះ។ ក្នុងនោះ សម្ដេចចង់ស្នើឲ្យដោះលែងមនុស្ស១២នាក់ ដែលទំនងជាសម្ដេចចង់សំដៅទៅលើសកម្មជនរបស់អតីតបក្សសង្គ្រោះជាតិ នៅក្នុងរដូវភ្ជុំបិណ្ឌខាងមុខនេះ។ ប៉ុន្តែសម្ដេចក៏មានលក្ខខណ្ឌមួយ គឺមិនឲ្យអ្នកណានិយាយថា ការស្នើនេះធ្វើឡើង ដោយសារតែមានការគាបសង្កត់ពីសហគមន៍អន្តរជាតិនោះឡើយ។
ទោះជាយ៉ាងណា សម្ដេចនាយករដ្ឋមន្ត្រី បានដាក់លក្ខខណ្ឌមួយទៅកាន់មន្ត្រីអតីតបក្សប្រឆាំងទាំងអស់ថា កុំនិយាយថា គម្រោងស្នើលើកលែងទោសនេះ កើតចេញពីការគាបសង្កត់ពីសហគមន៍អន្តរជាតិឲ្យសោះ។ សម្ដេចបានបញ្ជាក់ថា ខ្ញុំស្អប់ពាក្យនេះខ្លាំងណាស់ ហើយថែមទាំងព្រមាន ពួកគេទាំងនោះ ជាពិសេសលោក សម រង្ស៊ី តែម្តងឲ្យមានការប្រុងប្រយ័ត្ន ចំពោះការប្រើប្រាស់ពាក្យទាំងអស់នេះមកលើសម្ដេច។ ប្រសិនមានអ្នកណាមួយហ៊ានធ្វើអត្ថាធិប្បាយថា ការស្នើលើកលែងទោសរបស់សម្ដេច បណ្តាលមកពីសម្ពាធពីបរទេសនោះ សម្ដេចនឹងមិនទាន់ស្នើសុំលើកលែងទោសនោះទេ។ ពោលគឺសម្ដេចនឹងទុកពេលឲ្យអ្នកកំពុងជាប់ឃុំទាំង១២នាក់ ធ្វើលិខិតថ្កោលទោសដល់អ្នកហ៊ាននិយាយបែបនេះជាមុនសិន ទើបសម្ដេចព្រមស្នើលើកលែងទោសដល់ពួកគេ។
សម្ដេចនាយករដ្ឋមន្ត្រី ហ៊ុន សែន បានគូសបញ្ជាក់ម្តងជាពីរដងថា គម្រោងស្នើសុំលើកលែងទោសនេះ មិនជាប់ពាក់ព័ន្ធនឹងសហគមន៍អន្តរជាតិណាមួយឡើយ។ ផ្ទុយទៅវិញ វាគឺជាបំណងដែលកើតចេញពីចិត្តធម៌របស់លោក ចំពោះប្រជាពលរដ្ឋខ្មែរ ដើម្បីឲ្យពួកគេបានទៅជួបជុំក្រុមគ្រួសារឡើងវិញ។ ដោយឡែកមនុស្សទាំង១២នាក់នោះ គឺបានសរសេរលិខិតសុំទោសរូបលោករួចរាល់ហើយ។
ថ្វីបើសម្ដេចនាយករដ្ឋមន្ត្រី មិនបានបញ្ចេញឈ្មោះមនុស្សទាំង១២នាក់នោះក្ដី តែសម្ដេចទំនងជាចង់និយាយសំដៅទៅលើសកម្មជនអតីតបក្សសង្គ្រោះជាតិ។ សកម្មជនអតីតគណបក្សប្រឆាំងទាំងនេះ ត្រូវបានតុលាការរាជធានីភ្នំពេញ ផ្ដន្ទាទោសដាក់ពន្ធនាគារ ចន្លោះពី៧ឆ្នាំទៅ ២០ឆ្នាំ ក្រោមការចោទប្រកាន់ពីបទចូលរួម និងដឹកនាំកុបកម្មរំដោះទីលានប្រជាធិបតេយ្យ ដែលបានធ្វើឡើង កាលថ្ងៃទី១៥ ខែកក្កដា ឆ្នាំ២០១៤កន្លងទៅ។
ការប្រកាសឲ្យដឹងពីគម្រោងស្នើលើកលែងទោសដល់មនុស្ស១២នាក់ ពីសំណាក់សម្ដេចនាយករដ្ឋមន្ត្រីកម្ពុជា នៅថ្ងៃនេះ គឺកើតឡើង ក្រោយពេលសម្ដេចបានជួបផ្ទាល់ជាមួយលោក Mark Field អនុរដ្ឋមន្ត្រីទទួលបន្ទុកកិច្ចការអាស៊ី និងប៉ាស៊ីហ្វិក នៃក្រសួងការបរទេសអង់គ្លេស កាលពីថ្ងៃទី២២ ខែសីហា ឆ្នាំ២០១៨ នៅក្នុងវិមានសន្ដិភាព នារាជធានីភ្នំពេញ។
យោងតាមដីកាបង្គាប់ឲ្យដោះលែង ចុះថ្ងៃទី២៣ ខែសីហា ឆ្នាំ២០១៨ ចេញដោយលោក រៀល សុភិន ព្រះរាជអាជ្ញារងអមសាលាដំបូងរាជធានីភ្នំពេញ បានបង្គាប់ឲ្យប្រធានពន្ធនាគារ ដោះលែងលោក សួន សេរីរដ្ឋា អតីតប្រធានគណបក្សអំណាចខ្មែរ តាមអំណាចព្រះរាជក្រឹត្យ នៃព្រះមហាក្សត្រ។
សូមជម្រាបថា លោករស់ ពិសិដ្ឋ ចៅក្រមជំនុំជម្រះ នៃសាលាដំបូងរាជធានីភ្នំពេញ កាលពីរសៀលថ្ងៃទី២៥ ខែសីហា ឆ្នាំ២០១៧ កន្លងទៅ បានសម្រេចប្រកាសសាលក្រមផ្តន្ទាទោសលោក សួន សេរីរដ្ឋាប្រធានគណបក្សអំណាចខ្មែរ ដាក់ពន្ធនាគាររយៈពេល៥ឆ្នាំ និងពិន័យជាប្រាក់ចំនួន១០លានរៀល បង់ចូលក្នុងថវិការដ្ឋ។ លោក សួន សេរីរដ្ឋា ត្រូវរងនូវការចោទប្រកាន់ចំនួន៣បទល្មើស រួមមាន ទី១-បទញុះញង់កុំឱ្យយោធិនស្តាប់បង្គាប់ តាមបញ្ញត្តិមាត្រា៤៧១ នៃក្រមព្រហ្មទណ្ឌ ទី២-បទធ្វើឱ្យខូចទឹកចិត្តកងទ័ព តាមបញ្ញត្តិមាត្រា៤៧២ នៃក្រមព្រហ្មទណ្ឌ និងទី៣-បទញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមបញ្ញត្តិមាត្រា៤៩៤ និងមាត្រា ៤៩៥ នៃក្រមព្រហ្មទណ្ឌ។
ការសម្រេចផ្តន្ទាទោសនេះ បានធ្វើឡើង បន្ទាប់សំណុំរឿងនេះ ត្រូវបានចៅក្រម នៃសាលាដំបូងរាជធានីភ្នំពេញ លើកយកមកបើកសវនាការ កាលពីល្ងាច ថ្ងៃទី១៤ ខែសីហា ឆ្នាំ២០១៧ កន្លងទៅ។ ប៉ុន្តែសវនាការនោះ ត្រូវបានលើកពេល ដោយសារលោក សួន សេរីរដ្ឋា ស្នើសុំស្វែងរកមេធាវីការពារក្តីឲ្យរូបលោក។ បន្ទាប់មក សំណុំរឿងនេះត្រូវបានចៅក្រម នៃសាលាដំបូងរាជធានីភ្នំពេញ លើកយកមកបន្តសវនាការនិងបញ្ចប់ កាលពីរសៀល ថ្ងៃទី២៤ ខែសីហា ឆ្នាំ២០១៧។
លោក សួន សេរីរដ្ឋា ត្រូវបានសមត្ថកិច្ចនគរបាលយុត្តិធម៌ នៃស្នងការដ្ឋាននគរបាលរាជធានីភ្នំពេញ ឃាត់ខ្លួន ដោយសារជាប់ពាក់ព័ន្ធនឹងអង្គហេតុនៃការបង្ហោះសារជាសាធារណៈនៅលើផេក ឈ្មោះ Soun Serey Ratha កាលពីថ្ងៃទី១២ ខែសីហា ឆ្នាំ២០១៧ ។ សារដែលលោកបង្ហោះនោះ ត្រូវបានសមត្ថកិច្ចចាត់ទុកថា មានចរិតបង្កគ្រោះថ្នាក់ដល់វិស័យការពារជាតិ។ យោងតាមសេចក្តីថ្លែងការណ៍របស់អយ្យការអមសាលាដំបូងរាជធានីភ្នំពេញ បានចាត់ទុកថា សំណុំរឿងរបស់លោកសួន សេរីរដ្ឋា គឺជាករណីបទមជ្ឈិមជាក់ស្តែង៕
