ភ្នំពេញ៖ ឌីជីថលម៉ាឃីតធីង ជាពាក្យដ៏ងាយយល់ ងាយនឹងបកស្រាយ បើត្រឹមតែនិយាយពីនិយមន័យ។ ប៉ុន្តែបើនិយាយពីការអនុវត្តន៍ និងការប្រើប្រាស់យុទ្ធសាស្ត្រ ផ្សព្វផ្សាយលើទីផ្សារឌីជីថលនាពេលបច្ចុប្បន្ននេះ មានចំណុចជាច្រើនដែលក្រុមហ៊ុនបើកដំណើការយូរឆ្នាំ ឬទើបតែបើកដំណើការ មិនគួរមើលរំលងរាល់ពេលរៀបចំយុទ្ធសាស្រ្ដទីផ្សារថ្មី ក្នុងគោលបំណងណែនាំផលិតផល ឬសេវាកម្មថ្មីដល់អតិថិជនខ្លួន។
ជាក្រុមហ៊ុនមានបទពិសោធន៍ផ្ដល់សេវាកម្មប្រឹក្សា និងផ្ដល់ដំណោះស្រាយទីផ្សារច្រើនសណ្ឋានដល់ក្រុមហ៊ុនធំៗក្នុងប្រទេសកម្ពុជាជិត ១០ ឆ្នាំ សូលីឌឺស បានរៀបចំកម្មវិធីពិសេស Solidus Biz Café នៅសណ្ឋាគារសូហ្វីតែលភ្នំពេញ ដើម្បីជួបជុំដៃគូពាណិជ្ជកម្ម ចែករំលែកបទពិសោធន៍ថ្មីៗ ពាក់ព័ន្ធនឹងឧស្សាហកម្មផ្សព្វផ្សាយពាណិជ្ជកម្មស្របតាមការបម្រែបម្រួលនៃបច្ចេកវិទ្យាបច្ចុប្បន្ន។
វាគ្មិន ៤ រូមគ្នាចែករំលែក ៤ ចំណុចធំៗ ដែលក្រុមហ៊ុននៅកម្ពុជា មិនគួរមើលរំលង ក្នុងការប្រើប្រាស់យុទ្ធសាស្រ្ដទីផ្សារឲ្យចំគោលដៅ និងទទួលបានប្រសិទ្ធភាពខ្ពស់។
លោក សឿម ណារិន ស្ថាបនិក និងនាយកគ្រប់គ្រងក្រុមហ៊ុន សូលីឌឹស បានលើកចំណុចធំមួយមកចែករំលែកពី «ដំណើរបម្រែបម្រួលនៃទំនាក់ទំនងទីផ្សារ និងសមាហរណកម្មនៃវិស័យសេដ្ឋកិច្ចទីផ្សារបែបឌីជីថល និងបែបបុរាណ»។
លោក ណារិន បានលើកឡើងថា ការលេចវត្តមាននៃឌីជីថលម៉ាឃីតធីង បានធ្វើឲ្យរវាង អតិថិជន និងម្ចាស់ក្រុមហ៊ុនកាន់តែមានលទ្ធភាពស្គាល់ពីគ្នាបានកាន់តែល្អជាងមុន រឹតតែពិសេសជាងនេះម្ចាស់ក្រុមហ៊ុនដែលជាអ្នកផ្សព្វផ្សាយវិញក៏អាចដឹងពីលទ្ធផលរំពឹងទុកជាក់លាក់មួយផងដែរ ដែលចំណុចនេះខុសពីការផ្សព្វផ្សាយបែបបុរាណដែលអ្នកផ្សាយបានត្រឹមតែផ្សាយតែមិនអាចនឹងដឹងថា សារនៃការទំនាក់ទំនងនោះ បានទៅដល់អតិថិជនគោលដៅ ឬមិនដល់នោះទេ។
ពាក់ព័ន្ធនឹងចំណុចនេះ លោក Yusuke Morotomi ប្រធានផ្នែកដៃគូ Solidus Consulting & Solidus Group ( ប្រទេសជប៉ុន ) ក៏បានចែករំលែកប្រធានបទគាំទ្រនូវអ្វីដែលលោក ណារិន បានលើកឡើងដែរគឺ «អ្វីដែលអ្នកមើលឃើញពេលនេះជាលទ្ធផលជាក់លាក់ដែលអ្នកនឹងទទួលបាន។ អ្នកអាចនឹងមានគំនិតថ្មីៗ តែបើមិនបានយកទៅអនុវត្ត និងរៀបចំផែនការនោះស្មើនឹងគ្មានអ្វីទាំងអស់»។
បន្ថែមពីនេះ លោកបណ្ឌិត Daniel McFarlane សាស្រ្ដាចារ្យនៃសាកលវិទ្យាល័យ Thamamsat ប្រទេសថៃ និងជានាយកផ្នែកស្រាវជ្រាវក្រុមហ៊ុន Solidus Consulting បានលើកយកប្រធានបទមួយដែលនិយាយអំពី «ការបង្កើតទស្សនវិស័យផ្ដោតទៅលើសហគមន៍ និងមនុស្សជាតិនៃអ្នកប្រើប្រាស់ និងម៉ាកយីហោដែលក្រុមហ៊ុនបានបង្កើតឡើង»។
លោកលើកឡើងថា អតិថិជនរបស់ក្រុមហ៊ុននីមួយៗអាចនឹងមានច្រើនប្រភេទ ស្របតាមសេវាកម្ម និងផលិតផលដែលបានបង្កើត ដើម្បីប្រកួតប្រជែងលើទីផ្សារ។ វាអាចជារឿងមិនល្អមួយ ដែលក្រុមហ៊ុនមួយចំនួន មិនស្គាល់ ឬមិនទាន់រកឃើញអតិថិជនគោលដៅពិតប្រាកដរបស់ខ្លួន។ នេះជាចំណុចមួយបណ្ដាលឲ្យក្រុមហ៊ុនធំៗមួយចំនួនក្នុងប្រទេសកម្ពុជាដួលរលំ។ ការដួលរលំនៃក្រុមហ៊ុនធំៗមួយចំនួននៅកម្ពុជា មិនមែនមានន័យថា ក្រុមហ៊ុនគ្មានធនធានល្អ និងយុទ្ធសាស្រ្ដទីផ្សាល្អនោះទេ តែគ្រាន់តែចំណុចធ្វេសប្រហែសមួយគឺមិនបានគិតដល់សហគមន៍ និងប្រភេទអតិថិជនដែលពួកគាត់ចង់បង្កើតទំនាក់ទំនងជាមួយ។
លោកបណ្ឌិត Daniel McFarlane បន្ថែមថា «ចំណុចដែលខ្ញុំមើលឃើញនោះ ក្រុមហ៊ុនធំៗទាំងនោះផ្ដោតទៅលើធនធាន និងយុទ្ធសាស្រ្ដពីបរទេស ដោយមិនបានគិតពីស្ថានភាពវប្បធម៌ និងសហគមន៍របស់អតិថិជនកម្ពុជាឲ្យបានដិតដល់។
៣ ចំណុចធំៗខាងលើ នៅមិនទាន់ចប់នៅឡើយទេ។ លោកបណ្ឌិត Neil Gains ស្ថាបនិក និងជានាយកប្រតិបត្តិក្រុមហ៊ុន TapestryWorks ក៏បានលើកយកប្រធានបទមួយមកចែករំលែកដែរគឺ « ការប្រែក្លាយរឿងរ៉ាវរបស់អតិថិជនទៅជាបទពិសោធស្លាកយីហោ» ក្នុងឱកាសចែករំលែកបទពិសោធន៍ Solidus Biz Cafeផងដែរ។ លោកលើកឡើងថា រាល់ម៉ាកល្បីៗជុំវិញពិភពលោកដែលទទួលបានភាពជោគជ័យ គឺមិនមែនជាភាពចៃដន្យនោះទេ។ អ្វីៗទាំងអស់សុទ្ធតែជារឿងរ៉ាវពាក់ព័ន្ធនឹងអតិថិជនរបស់ពួកគេ។ ជាក់ស្ដែងដូចជាម៉ាកស្បែក Nike គឺបង្កើតឡើងសម្រាប់អ្នកកីឡាឈានមុខ ចំណែកឯកូកាកូឡា បង្កើតឡើងដើម្បីភ្ជាប់ទំនាក់ទំនងនៃការចែករំលែកភាពរីករាយរបស់មនុស្សជាដើម ។ ដូច្នេះរាល់ការធ្វើការផ្សព្វផ្សាយជុំវិញពិភពលោក ម៉ាកយីយោល្បីៗតែងតែបង្កើតសាច់រឿងណា ដែលអតិថិជនពួកគាត់ធ្លាប់បានជួបប្រទះ និងទទួលយកម៉ាកទាំងនោះជាចំណែកនៃជីវិតប្រចាំថ្ងៃរបស់ពួកគេ។
លោកបណ្ឌិតក៏បានលើកឡើងដែរថា នៅពេលដែលលោកបង្កើតម៉ាក Halal ផលិតផលគ្រឿងសម្អាងមួយនៅប្រទេសឥណ្ឌូនេស៊ី លោកបានសិក្សាស្រាវជ្រាវពី Culture Sense ទាំងក្នុងប្រទេសឥណ្ឌូនេស៊ី និងបណ្ដាប្រទេសជុំវិញ។
កំឡុងពេលស្រាវជ្រាវ ក្រុមការងារលោកបានសិក្សាពីទម្លាប់ និងវប្បធម៌របស់ជនជាតិ ឥណ្ឌូនេស៊ី ទាំងសកម្មភាពប្រចាំថ្ងៃ ការជួបជុំគ្នាក្នុងពិធីធំ និងតូច រឿងផ្ទាល់ខ្លួន និងអ្នកជុំវិញ ដោយប្រមូលយកសិក្សា ហើយបង្កើតជាម៉ាកផលិតផលមួយនេះ។ ជាលទ្ធផលផលិតម៉ាក Halal បានរីកចម្រើនក្នុងទីផ្សារគួរឲ្យកត់សម្គាល់ ហើយកំពុងចរាចរទូទាំងឥណ្ឌូនេស៊ី។
អំពី Solidus Consulting
Solidus ជាក្រុមហ៊ុនផ្ដល់សេវាកម្មផ្សព្វផ្សាយ បើកដំណើរការនៅកម្ពុជាអស់រយៈពេល ជិត ១០ ឆ្នាំមកហើយ។ បច្ចុប្បន្ន Solidus បានអភិវឌ្ឍលើសេវាប្រឹក្សាផ្នែកជំនួញ និងផ្សព្វផ្សាយពាណិជ្ជកម្ម Solidus Consulting ផងដែរ ដោយអញ្ជើញវាគ្មិនដែលមានទទួលបទពិសោធន៍ជាច្រើនឆ្នាំ ពាក់ព័ន្ធនឹងឧស្សាហកម្មពាណិជ្ជកម្មផងដែរ ៕