ភ្នំពេញ៖ តុលាការកំពូល នៅព្រឹក ថ្ងៃទី២២ ខែសីហា នេះ បានបើកសវនាការលើសំណុំរឿងក្បត់ជាតិរបស់លោក កឹម សុខា អតីតប្រធានគណបក្សសង្គ្រោះជាតិ ដោយមានតែវត្តមានមេធាវីការពារក្តី តែគ្មានវត្តមានរបស់លោក កឹម សុខា ឡើយ។
ស្របពេលតុលាការកំពូលកំពុងដំណើរការរឿងក្ដីរបស់លោក កឹម សុខា នោះ ក៏មានអង្គការសង្គមស៊ីវិលជាតិ-អន្តរជាតិ សកម្មជនសិទ្ធិមនុស្ស ព្រះសង្ឃ និងអ្នកកាសែតកំពុងជួបជុំគ្នា តាមដានសវនាក្តីលោក កឹម សុខា ។
លោក កឹម សុខា ប្រធានអតីតគណបក្សសង្គ្រោះជាតិ ត្រូវបានលោក ឈួន ចាន់ថា អគ្គព្រះរាជអាជ្ញារង នៃមហាអយ្យការអមតុលាការកំពូល បានចេញលិខិតអញ្ជើញលោក ផាន់ ច័ន្ទស័ក្តិ មេធាវីការពារក្ដីឲ្យលោកកឹម សុខា ចូលមកតុលាការកំពូល នៅថ្ងៃទី២២ ខែសីហា ឆ្នាំ២០១៨ វេលាម៉ោង៨ព្រឹក ដើម្បីចូលរួមសវនាការ អំពីដំណើររឿងរបស់លោក កឹម សុខា ពីបទឃុបឃិតជាមួយជនបរទេស ក្នុងការផ្តួលរំលំរដ្ឋាភិបាលស្របច្បាប់របស់កម្ពុជា។ រីឯសមាសភាពក្រុមប្រឹក្សាជំនុំជម្រះ រួមមាន លោកគង់ ស្រ៊ីម ប្រធាន លោកសម សិរីវឌ្ឍ លោកអ៊ីវ គឹមស្រ៊ី លោកស្រី ចាំង ស៊ីណាត និងលោក ច័ន្ទ រង្សី ចៅក្រមប្រឹក្សា នៃក្រុមប្រឹក្សាជំនុំជម្រះ។
https://3.bp.blogspot.com/-0cdhdRIFdzs/W3zbKgIQ1uI/AAAAAAAAQb0/DqiN0oYnp4Me5Ejscmbu4CHXQQNwrnOPACLcBGAs/s1600/kem__4_.jpghttps://3.bp.blogspot.com/-bpjJGQ7prrI/W3zbKtASRZI/AAAAAAAAQb4/KP2-X39uk9gNq1k0tEc9EXr-sBpjucq2ACLcBGAs/s1600/kem__3_.jpg
គួរបញ្ជាក់ថា លោក កឹម សុខា ប្រធានអតីតគណបក្សសង្គ្រោះជាតិ ត្រូវបានសមត្ថកិច្ចចាប់ខ្លួន នៅពាក់កណ្តាលអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧។ លោក កឹម សុខា ត្រូវបានចោទប្រកាន់ពីបទសន្ទិដ្ឋិភាពជាមួយបរទេស តាមបញ្ញត្តិមាត្រា ៤៤៣ នៃក្រមព្រហ្មទណ្ឌ។ បើតាមក្រមព្រហ្មទណ្ឌ បទ សន្ទិដ្ឋិភាពជាមួយបរទេស គឺជាអំពើត្រូវរ៉ូវគ្នា ដោយសម្ងាត់ជាមួយរដ្ឋបរទេស ឬភ្នាក់ងារបរទេស ដើម្បីបង្កើតឲ្យមានអំពើប្រទូសរ៉ាយ ឬឲ្យមានអំពើឈ្លានពានប្រឆាំងនឹងព្រះរាជាណាចក្រកម្ពុជា។ បទល្មើសនេះ ប្រឈមនឹងការជាប់ពន្ធនាគារពី១៥ ដល់៣០ឆ្នាំ៕