ខេត្តកំពង់ធំ៖ មនុស្សប្រុសស្រី៣នាក់បាននាំគ្នាហូបពងគីង្គក់ ស្រាប់តែកើតនូវអាការពុលក្អួតចង្អោរ បង្កឲ្យភ្ញាក់ផ្អើលឡើង កាលពីវេលាម៉ោង៨យប់ ថ្ងៃទី២០ ខែសីហា ឆ្នាំ២០១៨ នៅក្នុងភូមិសន្ទុកក្រៅ ឃុំកកោះ ស្រុកសន្ទុក។
មន្រ្ដីនគរបាលស្រុក បានឲ្យដឹងថា ជនរងគ្រោះទាំង៣នាក់ដែលពុលពងគីង្គក់នោះ រួមមាន ទី១–ឈ្មោះ ផាន ភា ភេទស្រី អាយុ៥០ឆ្នាំ មានស្ថានភាពធ្ងន់ធ្ងរជាងគេ ទី២-ឈ្មោះ សឿន ខន ភេទប្រុស អាយុ៥៥ឆ្នាំ មានអាការស្រាល និងទី៣-ឈ្មោះ ផាន គី ភេទប្រុស អាយុ៤៣ឆ្នាំ មានអាការស្រាល។ ពួកគាត់ទាំងបីនាក់នេះ រស់នៅភូមិកើតហេតុខាងលើ។
មន្ត្រីនគរបាលដដែល បានបន្តថា កាលពីល្ងាចថ្ងៃកើតហេតុ ជនរងគ្រោះបាននាំគ្នាចាប់គីង្គក់បានយ៉ាងច្រើន ហើយនាំគ្នាយកមកធ្វើម្ហូបហូបសាច់ ដោយយកទាំងសាច់ និងពងរបស់វា។ បន្ទាប់ពីចម្អិនហើយ ពួកគាត់បាននាំគ្នាហូប ស្រាប់តែមួយសន្ទុះក្រោយមក អ្នកហូបម្នាក់ៗបានចាប់ផ្ដើមកើតមានអាការក្អួតចង្អោរយ៉ាងខ្លាំង ទើបសាច់ញាតិដឹកជនរងគ្រោះបញ្ជូនទៅសង្រ្គោះ នៅក្នុងមន្ទីរពេទ្យ។
ប្រជាពលរដ្ឋចាស់ទុំ បានឲ្យដឹងថា គីង្គក់ គឺគេហូបតែសាច់ទេ ចំណែកពងរបស់វា គេមិនហូបឡើយ ពីព្រោះវាធ្វើឲ្យយើងពុល រហូតដល់ចេញឈាមតាមរោម បង្កឲ្យគ្រោះថ្នាក់ដល់អាយុជីវិតរបស់យើងទៀតផង ប្រសិនបើបញ្ជូនជនរងគ្រោះទៅសង្រ្គោះ នៅក្នុងមន្ទីរពេទ្យ មិនទាន់ពេលវេលាទេ។ ដូច្នេះសូមបងប្អូន មានការប្រុងប្រយ័ត្ន ពីករណីនេះផង៕