កំពង់ស្ពឺ ៖ នៅព្រឹកថ្ងៃទី២០ ខែសីហា ឆ្នាំ២០១៨នេះ ការប្រឡងសញ្ញាបត្រមធ្យមសិក្សាទុតិយភូមិ ចាប់ផ្តើមហើយ នៅវេលាម៉ោង៧ព្រឹកថ្ងៃនេះ រហូតដល់ថ្ងៃទី២១ ខែសីហា ។ ហើយការប្រឡងបានព្រឹត្តិទៅដោយរលូន និងមានសភាពស្ងប់ស្ងាត់ពុំមានចំណុចខុសប្រក្រតីណាមួយគួរឲ្យកត់សម្គាល់នោះទេ ។
ក្នុងនោះអ្នកសង្កេតការណ៍របស់អង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា អនុរក្ស គណៈកម្មការទាំងអស់ បានរឹតបន្តឹងជាខ្លាំង មិនខុសពីឆ្នាំមុនៗឡើយ ។ បេក្ខជនដែលទៅប្រឡងគ្រប់មណ្ឌលត្រូវបានត្រួតពិនិត្យគ្រប់ចន្លោះកន្លៀតគ្មានសល់ ដើម្បីធានាឲ្យបានថា បេក្ខជនមិនអាចយកអ្វីដែលក្រសួងបានហាមឃាត់ចូលទៅក្នុងមណ្ឌលប្រឡងបានឡើយ ។
អ្វីដែលគួរឲ្យចាប់អារម្មណ៍នោះ គឺនៅមណ្ឌលបឋមសិក្សាវល្លិ៍ បន្ទប់លេខ១៣ ដែលស្ថិតក្នុងខេត្តកំពង់ស្ពឺ មានតែបេក្ខជនម្នាក់គត់ ចូលរួមប្រឡងសញ្ញាបត្រមធ្យមសិក្សា ទុតិយភូមិ (បាក់ឌុប) ស្របពេលដែលលោក ឱម យិនទៀង ប្រធានអង្គភាពប្រឆាំង អំពើពុករលួយ ចុះពិនិត្យផ្ទាល់ ថែមទៀត ។
យ៉ាងណាមិញ គ្រប់បេក្ខជនប្រលងទាំងអស់ និងអ្នកពាក់ព័ន្ធនានា បើធ្វើឲ្យបែកធ្លាយវិញ្ញាសារ ជាសាធារណៈ គឺជាប់ទោសព្រហ្មទណ្ឌ ហើយ បើមានការបែកធ្លាយវិញ្ញាសារមែននោះ អង្គភាពប្រឆាំងអំពើពុករលួយ នឹងបើកការស្រាវជ្រាវស៊ើបអង្កេត ឃាត់ខ្លួនជនល្មើស ឲ្យខានតែបាន។
ភាពសំងាត់នៃវិញ្ញាសារប្រលងជារឿយៗ ACU និងក្រសួងអប់រំ តែងតែដាស់តឿនឲ្យបេក្ខជនប្រលង អ្នកសង្កេតការណ៍ មេប្រយោគ អនុរក្ស និងអ្នកពាក់ព័ន្ធនានា ហាមដាច់ការថតវិញ្ញាសារ និងការរក្សាភាពសំងាត់នៃវិញ្ញាសារ ដែលសូម្បីតែការថតរក្សាទុកផ្ទាល់ខ្លួន ក៏មិនអនុញ្ញាតឲ្យថតដែរ ហើយអ្នកថតនោះ បើចាប់បានក៏ត្រូវមានទោសដូចគ្នាដែរ ៕
