ខេត្តពោធិ៍សាត់៖ ផ្ទះដ៏ស្កឹមស្កៃមួយខ្នងត្រូវអគ្គីលេបត្របាក់យ៉ាងសន្ធោសន្ធៅ បង្កឲ្យភ្ញាក់ផ្អើលឡើង កាលពីវេលាម៉ោង១១ព្រឹក ថ្ងៃទី១១ ខែសីហា ឆ្នាំ២០១៨ នៅក្នុងភូមិអ៊ិស្លាម សង្កាត់បន្ទាយដី ក្រុងពោធិ៍សាត់។
មន្ត្រីនគរបាលក្រុងពោធិ៍សាត់ បានឲ្យដឹងថា ផ្ទះដែលរងនូវគ្រោះអគ្គិភ័យនោះមានបណ្ដោយប្រវែង១២ម៉ែត្រ និងទទឹងប្រវែង១០ម៉ែត្រ ធ្វើអំពីឈើប្រក់ក្បឿង ជណ្ដើរថ្ម សសរថ្ម និងជញ្ជាំងខាងមុខថ្ម មានម្ចាស់ឈ្មោះ ឯល អាល់ទីកេះ ភេទស្រី អាយុ៦៧ឆ្នាំ ជនជាតិខ្មែរអ៊ិស្លាម រស់នៅក្នុងភូមិកើតហេតុខាងលើ។ នៅក្នុងការជួយអន្តរាគមន៍បាញ់ទឹកពន្លត់នោះ សមត្ថកិច្ចបានប្រើប្រាស់ទឹកអស់ចំនួន៤រថយន្ដ។
ទោះជាយ៉ាងណា ផ្ទះបានឆេះអស់ទាំងស្រុងនៅសល់តែកាំជណ្ដើរ និងជញ្ជាំងថ្មខាងមុខតែប៉ុណ្ណោះ។ ចំណែកទ្រព្យសម្បត្តិ និងសម្ភារប្រើប្រាស់ដែលនៅក្នុងផ្ទះទាំងប៉ុន្មាន ត្រូវភ្លើងឆេះអស់ទាំងស្រុង ព្រោះម្ចាស់ផ្ទះរវល់ស្លន់ស្លោមិនបានយកអ្វីនោះទេ។
ករណីភ្លើងឆេះផ្ទះបងប្អូនខ្មែរអ៊ិស្លាមនៅសង្កាត់បន្ទាយដី ក្រុងពោធិ៍សាត់នេះ សមត្ថកិច្ចមិនទាន់ដឹងពីមូលហេតុច្បាស់លាស់នៅឡើយ។ ប៉ុន្តែភាគច្រើនគេសង្ស័យពីការទុស្សេខ្សែភ្លើងច្រើនជាង ព្រោះភ្លើងចាប់ផ្ដើមពីដំបូលមុន។ ចំណែកការខូចខាត និងបាត់បង់ទ្រព្យសម្បត្តិ មិនទាន់ប៉ាន់ប្រមាណដឹង គ្រាន់តែដឹងថា ផ្ទះទាំងមូល និងសម្ភារដែលមានក្នុងផ្ទះទាំងប៉ុន្មាន ត្រូវភ្លើងឆេះអស់ទាំងស្រុង។ នៅក្នុងគ្រោះអគ្គិភ័យនេះ មិនបានបង្កឲ្យមានគ្រោះថ្នាក់ដល់មនុស្សណាម្នាក់ និងផ្ទះសម្បែងរបស់អ្នកដទៃនោះទេ៕