ខេត្តក្រចេះ៖ បន្ទាប់ពីកើតមាននូវអំពើឃាតកម្មដ៏សាហាវ សម្លាប់មនុស្សមួយគ្រួសារ ហើយដុតបំផ្លាញសាកសពនោះមក សមត្ថកិច្ចជំនាញខេត្តក្រចេះបានស្រាវជ្រាវ រហូតឈានដល់ការឃាត់ខ្លួនជនពាក់ព័ន្ធចំនួន៤នាក់ កាលពីថ្ងៃទី១២ ខែសីហា ឆ្នាំ២០១៨ នៅក្នុងស្រុកចិត្របុរី។
មន្ត្រីនគរបាលស្រុកចិត្របុរី បានឲ្យដឹងថា ពិតជាមានឃាតកម្មដ៏សាហាវកើតឡើងមែន។ ករណីនេះបានកើតឡើង នៅយប់ ថ្ងៃ១៣រោច ខែទុតិយសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១០ ខែសីហា ឆ្នាំ២០១៨ នៅលើកោះប្រឹម ភូមិប្អៀរ ឃុំថ្មី ស្រុកចិត្របុរី ខេត្តក្រចេះ។
មន្ត្រីនគរបាលស្រុកចិត្របុរី បានបន្តថា ជនរងគ្រោះ នៅក្នុងអំពើឃាតកម្មដ៏សាហាវខាងលើនេះ ទី១-ឈ្មោះ ឆុំ ឈាន អាយុ៣០ឆ្នាំ(ប្ដី) ទី២-ឈ្មោះ ជួន សុខនាង (ប្រពន្ធ) អាយុ៣៦ឆ្នាំ ទី៣-ឈ្មោះ ឈាន ភឹមសី ភេទប្រុស អាយុ១១ឆ្នាំ (កូន) និងទី៤-ឈ្មោះ ឈាន វណ្ណី ភេទស្រី អាយុ៩ឆ្នាំ(កូន)។ ពួកគេទាំង៤នាក់ឪពុក ម្ដាយ និងកូន រស់នៅលើកោះប្រឹម ភូមិប្អៀរ ឃុំថ្មី ស្រុកចិត្របុរី ខេត្តក្រចេះ។ រីឯជនសង្ស័យជាប់ពាក់ព័ន្ធនឹងអំពើឃោរឃៅនេះ រួមមាន ទី១-ឈ្មោះ ចឹក ណូ ភេទប្រុស អាយុ៥០ឆ្នាំ រស់នៅភូមិប្អៀរ ឃុំថ្មី ស្រុកចិត្របុរី ខេត្តក្រចេះ ទី២-ឈ្មោះ ម៉ៅ ញ៉ាញ់ ភេទប្រុស អាយុ១៧ឆ្នាំ រស់នៅរាជធានីភ្នំពេញ មុខរបរជាសន្តិសុខក្រុមហ៊ុនហនុមានមានឫទ្ធិ ទី៣-ឈ្មោះ ចឹក ម៉ៅ ភេទប្រុស អាយុ៤៦ឆ្នាំ រស់នៅភូមិប្អៀរ ឃុំថ្មី ស្រុកចិត្របុរី ខេត្តក្រចេះ និងទី៤-ឈ្មោះ ចឹក លឹមស្រេង ភេទប្រុស អាយុ២០ឆ្នាំ រស់នៅភូមិប្អៀរ ឃុំថ្មី ស្រុកចិត្របុរី ខេត្តក្រចេះ។
មន្ត្រីនគរបាលស្រុកចិត្របុរី បានបន្តថា ក្រោយពេលធ្វើសកម្មភាពរួចហើយ ជនសង្ស័យបានដុតបំផ្លាញផ្ទះ និងសាកសពរបស់ជនរងគ្រោះ ដើម្បីបង្វែរសំណុំរឿងទៅជាករណីគ្រោះថ្នាក់អគ្គិភ័យ។ រីឯនៅកន្លែងកើតហេតុ សមត្ថកិច្ចបានរកឃើញមានសំបកកាំភ្លើង ដែលជាតម្រុយ ក្នុងការស៊ើបអង្កេតរបស់សមត្ថកិច្ច។
មន្ត្រីនគរបាលស្រុកចិត្របុរី បានបន្តថា បន្ទាប់ពីកើតមាននូវករណីឃាតកម្មខាងលើនេះរួចមក សមត្ថកិច្ចនគរបាលជំនាញស្រុក និងខេត្តបាន ក្រោមការសម្របសម្រួលពីលោក ធុច បញ្ចសន្តិភាព ព្រះអាជ្ញារងអមសាលាដំបូងខេត្តក្រចេះ បានសហការគ្នាស្រាវជ្រាវ រហូតឃាតដល់ការឃាត់ខ្លួនជនសង័្សយបានចំនួន៤នាក់។
ទោះជាយ៉ាងណាសមត្ថកិច្ច នៅមិនទាន់បានបញ្ជាក់ពីចម្លើយរបស់ជនសង្ស័យទាំង៤នាក់ពាក់ព័ន្ធនឹងករណីឃាតកម្មនោះឡើយ ពីព្រោះសមត្ថកិច្ចកំពុងធ្វើកិច្ចការនេះ។ ប៉ុន្តែទោះជាយ៉ាងណា ករណីអំពើឃាតកម្មដ៏សាហាវនេះ គឺគេដាក់សង័្សយទៅលើរឿងគំនុំ។
ក្រោយពេលពិនិត្យ និងធ្វើកោសល្យវិច័យរួច សមត្ថកិច្ចបានប្រមូលសាកសពបញ្ចុះទុកជាបណ្តោះអាសន្ន ដើម្បីរង់ចាំស្រាវជ្រាវរកសាច់ញាតិ និងបងប្អូនមកយកទៅធ្វើបុណ្យតាមប្រពៃណី។ បន្ទាប់ពីបើកការស្រាវជ្រាវតាមជំនាញនោះមក សមត្ថកិច្ចបានឃាត់ខ្លួនជនពាក់ព័័ន្ធចំនួន៤នាក់ រួចហើយបញ្ជូនទៅកាន់ស្នងការដ្ឋាននគរបាលខេត្ត ដើម្បីសាកសួរ និងកសាងសំណុំរឿងបញ្ជូនទៅសាលាដំបូងខេត្ត ផ្ដន្ទាទោសតាមច្បាប់៕
