ភ្នំពេញ៖ នៅលើបណ្ដាញសង្គមហ្វេសប៊ុករបស់លោក សម រង្ស៊ី អតីតប្រធានគណបក្សសង្រ្គោះជាតិ ដែលកំពុងនិរទេសដោយខ្លួនឯង នៅឯក្រៅប្រទេស បានចោទប្រកាន់មកលើសម្ដេចនាយករដ្ឋមន្ត្រីថា បានជួលឃាតកតាមសម្លាប់លោក ប៉ុន្តែត្រូវបានអ្នកនាំពាក្យរបស់គណបក្សកាន់អំណាច ចាត់ទុកថា នេះគ្រាន់តែជាការតម្កើងខ្លួន មិនខុសពីអង្គុយលើចង្អេលើកខ្លួនឯងនោះឡើយ។
លោក សម រង្ស៊ី បានសរសេរនៅលើគណនីហ្វេសប៊ុករបស់លោក នៅថ្ងៃទី១០ ខែសីហា ឆ្នាំ២០១៨នេះថា ចរិតរបស់លោក ហ៊ុន សែន ក្នុងការបបួលគេឯងស្បថស្បែ ពីរឿងប្រទេសជាតិ។ ការដែលលោក ហ៊ុន សែន បបួលគេឯងស្បថស្បែពីរឿងប្រទេសជាតិ បង្ហាញថា គាត់ជាមនុស្សអវិជ្ជា ទាល់ច្រក និងមិនទទួលខុសត្រូវ។
គណនីដដែល បានសរសេរបន្តថា ១-អវិជ្ជា៖ ហ៊ុន សែន មិនបានរៀនចប់អនុវិទ្យាល័យផង ដែលជាចំណុចខ្សោយមួយ សម្រាប់អ្នកដឹកនាំប្រទេស។ គាត់មិនអាចក្តាប់បាននូវជំនាញបច្ចេកទេស ក្នុងការដឹកនាំប្រទេស ជាពិសេស ការបង្ហាញពីការពិត និងពីការងារជាក់ស្តែង តាមក្បួនវិទ្យាសាស្ត្រ។ ដូច្នេះហើយបានជាគាត់ត្រូវបែរទៅរកអបិយជំនឿវិញ។ ២-ទាល់ច្រក៖ ចោរដែលគេចាប់បាន កំពុងតែលួចជាក់ស្តែង ដូចលោក ហ៊ុន សែន ឥឡូវនេះ វាស្ថិតក្នុងភាពទាល់ច្រក ពីព្រោះវាមិនអាចរកភស្តុតាងអ្វី អាចជួយដោះសារ វាបានមានតែសុំស្បថថា វាមិនមែនចោរទេ។ ៣-មិនទទួលខុសត្រូវ៖ ក្នុងតួនាទីរបស់គាត់ ជាអ្នកដឹកនាំប្រទេស ហ៊ុន សែន បង្ហាញចរិតមិនទទួលខុសត្រូវ ពីអ្វីដែលគាត់បានធ្វើ ឬមិនបានធ្វើ ពីព្រោះការគ្រាន់តែស្បថស្បែ ជាការគេចវេះ ពីកាតព្វកិច្ចបង្ហាញការពិត តាមបច្ចេកទេសគ្រប់គ្រងកិច្ចការសាធារណៈ និងទំនាក់ទំនងសាធារណៈ។ ឧទាហរណ៍៖ ដើម្បីឲ្យមហាជនឃើញច្បាស់ពីការពិត ទាក់ទងទៅនឹងការបោះឆ្នោត ត្រូវតែរាប់សន្លឹកឆ្នោតឡើងវិញ ដោយមានសាក្សីឯករាជ្យជាច្រើនចូលរួមផងដែរ។ វិធីបែបនេះ គឺជាវិធីសមស្របតែមួយគត់ ដើម្បីបង្ហាញការពិត សម្រាប់អ្នកដែលមានស្មារតីទទួលខុសត្រូវ។ ក្នុងរឿងនេះដែរ លោក សម រង្សុី បានបញ្ជាក់ថា៖ “ខ្ញុំមិនបន្ទាបខ្លួនទៅលេងឆ្កួតជាមួយលោក ហ៊ុន សែន ទេ ពីព្រោះគាត់នេះមានចរិតដូចក្មេងពាល។”
គណនីហ្វេសប៊ុករបស់លោក សម រង្ស៊ី បានសរសេរទៀតថា គ្មានប្រទេសប្រជាធិបតេយ្យណាមួយ ក្នុងពិភពលោក ទទួលស្គាល់ការបោះឆ្នោត ចុងក្រោយ នៅកម្ពុជានោះទេ។ រហូតមកដល់ថ្ងៃនេះ មានតែប្រទេសកុម្មុយនីស្តមួយតំបរស្វាប៉ុណ្ណោះ ដែលបានចូលរួមអបអរសាទររបបលោក ហ៊ុន សែន ដែលអះអាងថា ទទួលបានជ័យជម្នះ ក្រោយការបោះឆ្នោត ថ្ងៃ ២៩ កក្កដា ២០១៨។ ប្រទេសកុម្មុយនីស្តដែលទទួលបានស្គាល់នូវលទ្ធផលបោះឆ្នោតនោះ រួមមាន ប្រទេសចិន ប្រទេសវៀតណាម ប្រទេសលាវ និងប្រទេសគុយបា។ ចំណែកប្រទេសរាប់រយផ្សេងទៀត ដែលកាន់លទ្ធិប្រជាធិបតេយ្យ គេមានតែថ្កោលទោស និងពេបជ្រាយ ពីការបោះឆ្នោតក្លែងក្លាយចុងក្រោយ នៅកម្ពុជា។
គណនីហ្វេសប៊ុករបស់លោក សម រង្ស៊ី បានសរសេរបន្តថា ព្រះមហាក្សត្រនឹងមិនយាងទៅមិនយាងទៅបើកសម័យប្រជុំរដ្ឋសភាពេញអង្គ នៅដើមខែកញ្ញា នេះទេ ដោយសារតែព្រះអង្គ ប្រហែលជាយល់ឃើញថា ប្រជារាស្ត្រខ្មែរ និងសាធារណមតិ ស្ទើរទូទាំងពិភពលោក ច្បាស់ជាថ្កោលទោសព្រះអង្គយ៉ាងធ្ងន់ធ្ងរ បើព្រះអង្គយល់ព្រមយាងទៅបើកសម័យប្រជុំរដ្ឋសភាពេញអង្គ ជាត្លុកកំប្លែង នៅដើមខែកញ្ញាខាងមុខនេះ។ ព្រះមហាក្សត្រ ព្រះបាទព្រះបរមនាថ នរោត្តម សីហមុនី ហាក់ដូចជាព្រះអង្គប្រញាប់ប្រញាល់ យាងចេញពីប្រទេសកម្ពុជា ឲ្យបានមុនចុងខែសីហានេះ ដើម្បីទៅពិនិត្យសុខភាព នៅប្រទេសចិន ។
គណនីហ្វេសប៊ុករបស់លោក សម រង្ស៊ី បានសរសេរបន្តថា ដោយសារតែ សម រង្ស៊ី ជាបន្លាធំជាងគេ ក្នុងភ្នែក ទើបលោក ហ៊ុន សែន កំពុងជួលឃាតករបរទេសឲ្យប៉ុនប៉ងសម្លាប់ សម រង្ស៊ី នៅប្រទេសបារាំង។ កាលពី៤-៥ ខែមុន ហ៊ុន សែន បាននិយាយជាសាធារណៈថា គាត់នឹងបញ្ជូនភ្នាក់ងារសម្ងាត់របស់គាត់ឲ្យទៅចាប់សម រង្ស៊ី នៅឯបរទេស ហើយបញ្ជូន សម រង្ស៊ី ទាំងបង្ខំ និងទាំងលួចលាក់ទៅប្រទេសកម្ពុជា។ តែឥឡូវនេះ ដោយសារតែគាត់ជួបភាពទាល់ច្រកនយោបាយ រកដំណោះស្រាយមិនចេញ ទើប ហ៊ុន សែន សម្រេចជួលឃាតកឲ្យសម្លាប់ សម រង្ស៊ី តែម្តង។ អាជ្ញាធរបារាំងបានដឹងពីគម្រោងដើមរបស់ ហ៊ុន សែន ដែលចង់លួចចាប់ សម រង្ស៊ី លើទឹកដីបារាំង ហើយច្បាស់ជាបានព្រមាន ហ៊ុន សែន កុំឲ្យគាត់ប៉ុនប៉ងអនុវត្តគម្រោងបែបហ្នឹង ពីព្រោះខ្លួនគាត់ ក៏មិនរួចខ្លួនដែរ។
ទោះជាយ៉ាងណា បន្ទាប់ពីលោក សម រង្ស៊ី បានសរសេរបែបនេះ នៅលើគណនីហ្វេសប៊ុករបស់ខ្លួននោះមក លោក សុខ ឥសាន អ្នកនាំពាក្យគណបក្សប្រជាជនកម្ពុជា បានហៅការលើកឡើងរបស់លោក សម រង្ស៊ី គឺជាការនិយាយលើកតម្កើងខ្លួន ប្រៀបដូចជាអង្គុយលើចង្កេលើកខ្លួនឯងអ៊ីចឹង។
លោក សុខ ឥសាន បានឆ្លើយតបនូវការលើកឡើងខាងលើ ដោយគូសបញ្ជាក់នៅថ្ងៃទី១០ សីហា នេះថា ៖ «ទណ្ឌិត សម រង្ស៊ី កំពុងខិតខំលេីកតម្លៃខ្លួនឯង។ ក្រោយពេលទទួលបរាជ័យ នៅក្នុងឧបាយកលចង់រារាំង និងបំផ្លាញនូវការបោះឆ្នោត មិនបានសម្រេចនោះមក ទណ្ឌិត សម រង្ស៊ី ត្រូវធ្លាក់ទៅក្នុងភាពទ័លច្រក រកផ្លូវដេីរទៅមុខមិនរួច។ ដេីម្បីស្តារមុខមាត់ ទណ្ឌិត សម រង្ស៊ី បាន និងកំពុងខិតខំលើកកម្ពស់ខ្លួនឯង ដោយបានលេីកតម្កេីងថា ខ្លួនគឺជាឧបសគ្គនៅក្នុងកែវភ្នែករបស់ប្រជាជនកម្ពុជា»។
អ្នកនាំពាក្យបក្សកាន់អំណាចរូបនេះ បានបន្តថា ការនិយាយរបស់លោក សម រង្ស៊ី បែបនេះកាន់តែត្រូវបានបញ្ជាក់ថា ទណ្ឌិត សម រង្ស៊ី ទទួលសារភាពថា ខ្លួនគឺជាអ្នកបង្កើតបញ្ហាឲ្យប្រទេសជាតិកម្ពជា និងប្រជាជនកម្ពុជា បង្កអំពេីប្រទូសរ៉ាយឥតឈប់ឈរ ប្រឆាំងនឹងផលប្រយោជន៍របស់កម្ពុជា។ ទន្ទឹមនឹងនេះដែរ លោក សម រង្ស៊ី បានឆ្លៀតលេីកតម្លៃខ្លួនឯងដោយចោទថា មានគេប៉ុនប៉ងធ្វេីឃាតខ្លួននៅក្រៅប្រទេស។
លោក សុខ ឥសាន បានសង្កត់ធ្ងន់ថា៖ «តេីចង់ធ្វេីឃាតទណ្ឌិត សម រង្ស៊ី បានប្រយោជន៏អ្វី បេីទណ្ឌិត សម រង្ស៊ី អស់តម្លៃរួចទៅហេីយ ទោះបីទណ្ឌិតនេះនិយាយអ្វីក៏គ្មាននរណាយកចិត្តទុកដាក់ ឬចាប់អារម្មណ៍ដែរ។ រឿងអីមកចោទបញ្ហាថា មានគេចង់ទៅធ្វើឃាតខ្លួននៅស្រុកបារាំងនោះ។ នេះវាគ្រាន់តែជាការនិយាយបង្វែងដាន ដើម្បីលើកតម្លៃខ្កួនតែប៉ុណ្ណោះ»។
លោក សុខ ឥសាន បានបន្ថែមថា៖ «ទោះចង់លេីកតម្លៃយ៉ាងណា ក៏មិនអាចលេីកទៅបានដែរ ដោយ សារទណ្ឌិត សម រង្ស៊ី គ្មានតម្លៃត្រូវលេីក ពីព្រោះជីវិតនយោបាយរបស់ទណ្ឌិត សម រង្ស៊ី ត្រូវបានបញ្ចប់រួចទៅហេីយ»។
គួររំឭកថា កន្លងមក លោក សម រង្ស៊ី អតីតប្រធានគណបក្សសង្រ្គោះជាតិ ដែលកំពុងនិរទ្ទេស ដោយខ្លួនឯងពីការតាមចាប់ខ្លួនរបស់សមត្ថកិច្ចកម្ពុជា បានចោទប្រកាន់មកលើគណបក្សប្រជាជនកម្ពុជា និងគណៈកម្មាធិការរៀបចំការបោះឆ្នោតពីការបំប៉ោងចំនួនអ្នកទៅបោះឆ្នោត។ ប៉ុន្តែក្រោយមក សម្ដេចតេជោ ហ៊ុន សែន នាយករដ្ឋមន្រ្ដី បានបបួលស្បថដាក់ជីវិត តែលោក សម រង្ស៊ី មិនហ៊ាន៕