ភ្នំពេញ ៖ អគ្គស្នងការនគរបាលជាតិ នាយឧត្តមសេនីយ៍ នេត សាវឿន បានបញ្ជាកម្លាំងសមត្ថកិច្ចជំនាញបើកការស្រាវជ្រាវជាបន្ទាន់ ចំពោះជនអនាមិក ដែលបានចូលវាយប្រហារ (Hack) ទំព័រហ្វេសប៊ុកផេករបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ។
សូមបញ្ជាក់ថា គេហទំព័ររបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលមានឈ្មោះថា «Samdech Hun Sen, Cambodian Prime Minister» ត្រូវបានក្រុមជនអនាមិកលួចចូលទៅគ្រប់គ្រង (Hack) នៅប៉ុន្មាននាទីមុននេះ។ នេះបើតាមការបញ្ជាក់របស់ ឌួង ដារា អ្នកគ្រប់គ្រងទំព័រ Facebook របស់សម្តេចតេជោ ។
នៅលើហ្វេសប៊ុកផ្លូវការរបស់សម្តេចតេជោ ហ៊ុន សែន ( Samdech Hun Sen, Cambodia Prime Minister ) បានបង្ហោះសារថា «ដើម្បីលើកតម្កើនលិទ្ធិប្រជាធិបតេយ្យ ក្នុងប្រទេសកម្ពុជាយើង គណបក្សប្រជាជនកម្ពុជា និងចែករំលែក ៤អាសនៈទៅគណបក្សផ្សេងទៀត។ ២អាសនៈ ជូនទៅគណបក្សសម្ព័ន្ធដើម្បីលិទ្ធិប្រជាធិបតេយ្យ និង២អាសនៈទៀត ជូនទៅគណបក្សហ្វ៊ុនស៊ិនប៉ិច ។ រាជរដ្ឋាភិបាលថ្មីអាណត្តិទី៦ ដែលមានខ្ញុំជាអ្នកដឹកនាំ គឺនឹងខិតខំប្រឹងប្រែងទ្វេដងអោយសមទៅនឹងទឹកចិត្តស្រឡាញ់គាំទ្ររបស់បងប្អូន និងកូនក្មួយ ដើម្បីកម្ពុជាយើងរីកចម្រើនទៅមុខទាំងអស់គ្នា។ សូមជូនពរបងប្អូនជនរួមជាតិ និងកូនក្មួយទាំងអស់ ជួបតែសេចក្តីសុខ និងសំណាងល្អគ្រប់ៗគ្នា» ។
ជាមួយនឹងការប្រកាសពីការលួចចូលទៅគ្រប់គ្រងរបស់ក្រុមជនអនាមិកនេះ លោក ឌួង ដារា អ្នកគ្រប់គ្រងទំព័រហ្វេសប៊ុករបស់នាយករដ្ឋមន្ត្រី ក៏បានច្រានចោលព័ត៌មានដែលបានបង្ហោះថា មានការបែងចែកអាសនៈទៅគណបក្សសម្ព័ន្ធដើម្បីប្រជាធិបតេយ្យ LDP និងគណបក្សហ្វ៊ុនស៊ិនប៉ិចផងដែរ ។
សូមរម្លឹកថា អ្នកប្រើប្រាស់ពាក្យអសុរោះ និងជេរប្រមាថសម្ដេច លើបណ្ដាញសង្គមហ្វេសប៊ុក គេចមិនផុតពីការតាមដានឡើយ បើសិនជាសម្ដេច ចង់ចាប់ទោសពៃរ៍ ។ សមត្ថកិច្ចអាចរកទីតាំងអ្នកប្រើប្រាស់ហ្វេសប៊ុកនេះ ត្រឹមតែ៨នាទីប៉ុណ្ណោះ ។
ជាការក្រើនរំឭកជាថ្មី ដល់អ្នកប្រើប្រាស់ពាក្យសម្តីមិនសមរម្យលើរដ្ឋាភិបាល តាមរយៈបណ្ដាញសង្គមហ្វេសប៊ុកនេះ សម្ដេច ហ៊ុន សែន បានបង្ហើបថា រដ្ឋាភិបាលអាចក្តាប់បាន រាល់ទិន្នន័យអ្នកប្រើប្រាស់បណ្ដាញសង្គមគ្រប់ទីកន្លែង ទោះស្ថិតនៅក្នុងកាលៈទេសៈបែបណាក៏ដោយ។ វាគ្មានអ្វីពិបាកសម្រាប់រដ្ឋាភិបាល ក្នុងការកំណត់មុខសញ្ញា ឬទីតាំងរបស់អ្នកប្រើប្រាស់បណ្ដាញសង្គមនេះទេ ។
ក្រៅពីកំណត់ទីតាំងនៅកម្ពុជាបានហើយ បច្ចេកវិទ្យារបស់រដ្ឋាភិបាល ក៏អាចកំណត់ទីតាំងអ្នកប្រើប្រាស់បណ្ដាញសង្គម ដោយប្រើប្រាស់ពាក្យអសុរោះ នៅក្រៅប្រទេសបានដែរ។ នេះជាការបន្ថែមរបស់នាយករដ្ឋមន្ត្រី ហ៊ុន សែន ដែលបានអះអាងថា ប្រព័ន្ធគ្រប់គ្រងរដ្ឋាភិបាលសព្វថ្ងៃ មានបច្ចេកវិទ្យាទំនើប និងរឹងមាំក្នុងទប់ស្កាត់ស្ថានការណ៍អសន្តិសុខនានា។
គួរបញ្ជាក់ថា កន្លងមកសមត្ថកិច្ចធ្លាប់ឃាត់ខ្លួនអ្នកប្រើប្រាស់ហ្វេសប៊ុកមួយចំនួន ដែលប្រើប្រាស់ពាក្យជេរប្រមាថ និងសកម្មភាពមិនសមរម្យ លើរដ្ឋាភិបាល ហើយបង្ហោះជាសាធារណៈ លើបណ្ដាញសង្គមដ៏ពេញនិយមមួយនេះផងដែរ៕
