ភ្នំពេញ ៖ នៅមុននេះបន្តិច បន្ទាប់ពីមានការបង្ហោះតាមហ្វេសប៊ុកនូវដំណឹងចែកអាសនៈ៤ឲ្យគណបក្សហ្វ៊ុនស៊ិនប៉ិច និងគណបក្សសម្ព័ន្ធដើម្បីប្រជាធិបតេយ្យ អ្នកកាន់ហ្វេសប៊ុករបស់លោកនាយករដ្ឋមន្ត្រី ហ៊ុន សែន បានប្រាប់អង្គភាពសារព័ត៌មាន Fresh News ថា ហ្វេសប៊ុកផេកនេះត្រូវបានគេ Hack យកទៅគ្រប់គ្រង ។
កាលពីម៉ោងជិត១១ និង៣០នាទី ថ្ងៃទី១០ ខែសីហា ឆ្នាំ២០១៨ នៅលើហ្វេសប៊ុកផ្លូវការរបស់សម្តេចតេជោ ហ៊ុន សែន ( Samdech Hun Sen, Cambodia Prime Minister ) បានបង្ហោះសារថា «ដើម្បីលើកតម្កើនលិទ្ធិប្រជាធិបតេយ្យ ក្នុងប្រទេសកម្ពុជាយើង គណបក្សប្រជាជនកម្ពុជា និងចែករំលែក ៤អាសនៈទៅគណបក្សផ្សេងទៀត។ ២អាសនៈ ជូនទៅគណបក្សសម្ព័ន្ធដើម្បីលិទ្ធិប្រជាធិបតេយ្យ និង២អាសនៈទៀត ជូនទៅគណបក្សហ្វ៊ុនស៊ិនប៉ិច ។ រាជរដ្ឋាភិបាលថ្មីអាណត្តិទី៦ ដែលមានខ្ញុំជាអ្នកដឹកនាំ គឺនឹងខិតខំប្រឹងប្រែងទ្វេដងអោយសមទៅនឹងទឹកចិត្តស្រឡាញ់គាំទ្ររបស់បងប្អូន និងកូនក្មួយ ដើម្បីកម្ពុជាយើងរីកចម្រើនទៅមុខទាំងអស់គ្នា។ សូមជូនពរបងប្អូនជនរួមជាតិ និងកូនក្មួយទាំងអស់ ជួបតែសេចក្តីសុខ និងសំណាងល្អគ្រប់ៗគ្នា» ។
ជាមួយនឹងការប្រកាសពីការលួចចូលទៅគ្រប់គ្រងរបស់ក្រុមជនអនាមិកនេះ លោក ឌួង ដារា អ្នកគ្រប់គ្រងទំព័រហ្វេសប៊ុករបស់នាយករដ្ឋមន្ត្រី ក៏បានច្រានចោលព័ត៌មានដែលបានបង្ហោះថា មានការបែងចែកអាសនៈទៅគណបក្សសម្ព័ន្ធដើម្បីប្រជាធិបតេយ្យ LDP និងគណបក្សហ្វ៊ុនស៊ិនប៉ិចផងដែរ ៕
