រាជធានីភ្នំពេញ ៖ មានការភ្ញាក់ផ្អើលមួយយ៉ាងខ្លាំងបានកើតឡើង បន្ទាប់ពីគេបានឮសំឡេងបុរសម្នាក់ដែលអះអាងថា ខ្លួនជាមន្ត្រីនគរបាលនោះ បានដកកាំភ្លើងអាមេគំរាមរកបាញ់បុរសម្នាក់ក្នុងជម្លោះពាក្យសម្តីមួយ នាំមានការភ្ញាក់ផ្អើលជាខ្លាំងពីប្រជាពលរដ្ឋនៅកន្លែងកើតហេតុនោះ ។
ហេតុការណ៍នោះបានកើតឡើងកាលពីវេលាម៉ោងប្រមាណ១១យប់ថ្ងៃទី០៩ ខែសីហា ឆ្នាំ២០១៨ នៅតាមផ្លូវលេខ២៧៨ ខាងក្រោយអតីតរោងកុនគិរីរម្យ ក្នុងខណ្ឌចំការមន រាជធានីភ្នពេញ ។
ខ្មាន់កាំភ្លើង អាមេគំរាមរកបាញ់ជនស៊ីវិលនេះខាងលើនោះ ត្រូវបានគេទម្លាយថា ឈ្មោះ លន់ ស៊ីវធេង ជាមន្ត្រីនគរបាល ថ្នាក់អនុសេនីយ៍ទោ អត្តលេខ៧៥៣៣២ ។
បើតាមបុរសដែលរងនូវការគំរាមបាញ់នេះ បានអះអាងថា រូបគេមិនមានបញ្ហាអ្វីនឹងគ្នានោះទេ ហើយនៅមុនពេលកើតហេតុរូបគេ និងមិត្តភក្តិបានជិះម៉ូតូនៅតាមផ្លូវស្ងាត់មួយ ស្រាប់តែលេចចេញក្រុមបុរសអះអាងខ្លួនថា ជានគរបាលនេះបានជិះម៉ូតូដេញពីក្រោយ ហើយស្រែកថាចោរៗ ហើយជិះតាមពួកគេរហូត ។ ឃើញដូច្នេះ ពួកគេភ័យ ហើយក៏ជិះម៉ូតូរត់មករកកន្លែងមានមនុស្សច្រើន ដើម្បីការពារខ្លួនតែម្តង ។
វីដេអូដែលថតបានពីកាមេរ៉ាសុវត្ថិភាពនៅផ្ទះប្រជាពលរដ្ឋ គេឃើញមានការប៉ះពាក្យសម្តី និងដកកាំភ្លើងអាមេគំរាមបាញ់គេហើយ បន្ទាប់មក បុរសអះអាងជាមន្ត្រីនគរបាល និងបក្ខពួកក៏បានជិះម៉ូតូចេញពីកន្លែងកើតហេតុបាត់ទៅ ។
ទោះជាយ៉ាងណាសារព័ត៌មាន KBN នៅមិនទាន់ទទួលបានការបំភ្លឺពីភាគីខាងបុរសដែលអះអាងថា ខ្លួនជាមន្ត្រីនគរបាលនោះ បាននៅឡើយទេ ។
ប្រជាពលរដ្ឋនៅកន្លែងកើតហេតុ ដែលបានឃើញសកម្មភាពរបស់បុរសអះអាងខ្លួនជាមន្ត្រីនគរបាលនេះ បាននាំគ្នារិះគន់ ព្រមទាំងបានអំពាវនាវឲ្យថ្នាក់ដឹកនាំកងកម្លាំងនគរបាលជាតិ មេត្តាស្រាវជ្រាវរករឿងហេតុពិត ហើយក៏សង្ឃឹមថា នឹងដាក់វិន័យទៅលើបុរសអះអាងជាមន្ត្រីនគរបាលនេះតាមវិន័យរបស់នគរបាលជាតិ ៕
