ភ្នំពេញ ៖ ហាងលក់ និងជួសជុលទូរស័ព្ទដៃយីហោ អាយខេស ទុស្សេឆាបឆេះចេញពីជាន់ទី១ បង្កឱ្យមានការណ៍ភ្ញាក់ផ្អើល ដល់ប្រជាពលរដ្ឋ និងរថយន្តពន្លត់អគ្គិភ័យមកជួយអន្តរាគមន៍ កាលពីវេលាម៉ោង៨យប់ ថ្ងៃទី២០ ខែមិថុនា ឆ្នាំ២០១៧ ត្រង់ចំណុចផ្ទះលេខ៦២៣ ហាងលក់និងជួសជុលទូរស័ព្ទដៃយីហោ អាយខេស តាមបណ្តោយផ្លូវកម្ពុជាក្រោយ ស្ថិតក្នុងសង្កាត់ទឹកល្អក់ទី១ ខណ្ឌទួលគោក ។
តាមប្រភពព័ត៌មានពីស្ត្រីម្នាក់ជាម្ចាស់បណ្ណាគារ យីហោ ប្រជាប្រិយ សូមមិនបញ្ចេញឈ្មោះ រស់នៅជាប់កន្លែងកើតហេតុបានឱ្យដឹងថា នៅមុខពេលកើតហេតុ គាត់រួមទាំងកូនចៅ ២-៣ នាក់ទៀតកំពុងតែរៀបចំបិទហាង ស្រាប់តែធុំក្លិនឈ្ងៀម ហើយឃើញមានផ្សែងហុយខ្មួលខ្មាញ់ចេញពីហាងកើតហេតុជាន់ទី១ ។
ដោយសារតែហាងកើតហេតុខាងលើ បានបិទទ្វារ គាត់ក៏ទំនាក់ទំនង់ទៅម្ចាស់ផ្ទះ និងបានរាយការណ៍ទៅប្រាប់សមត្ថកិច្ចមូលដ្ឋាន លុះសមត្ថកិច្ចមូលដ្ឋាន បានចុះមកដល់កន្លែងកើតហេតុបានយកបំពង់ពន្លត់អគ្គិភ័យបាញ់អស់ពីរបីបំពង់ តែមិនរលត់ ក៏បានទំនាក់ទំនងហៅរថយន្តពន្លត់អគ្គិភ័យ របស់ស្នងការនគរបាលរាជធានីភ្នំពេញ ចំនួន ៣គ្រឿង និងមានរថយន្តពន្លត់អគ្គិភ័យរបស់ អង្គភាព ៧០ចំនួន២គ្រឿង និងរថយន្តពន្លត់របស់ក្រុមហ៊ុនសូគីមិច ចំនួន ១គ្រឿង បានអន្តរាគមន៍បាញ់ទឹកពន្លត់អស់ចំនួន ៣គ្រឿង (ជារថយន្តពន្លត់របស់ស្នងការនគរបាលរាជធានីភ្នំពេញ) ភ្លើងរលត់អស់ទៅវិញនៅម៉ោង៨និង៤០នាទីយប់ ថ្ងៃដដែល ។
បើតាមសម្តីពីសមត្ថកិច្ចបានឱ្យដឹងថា ម្ចាស់ហាងខាងលើមានឈ្មោះ ធន់ សុភា ភេទប្រុស អាយុ ៣៤ឆ្នាំ បានជួលផ្ទះពីឈ្មោះមួយទៀត ក្នុងករណីអគ្គិភ័យខាងលើនេះ ជំហ៊ានដំបូងសមត្ថកិច្ចសន្និដ្ឋានថា បណ្តាលមកពីផ្ទុះសេខ្សែភ្លើង តែមិនដឹងថាផ្ទុះចេញពីប្រភពណានោះទេ បណ្តាលឱ្យឆាបឆេះជាន់ទី១ ដែលជាកន្លែងជួសជុលទូរស័ព្ទ រងខូចខាតទាំងស្រុង ៕
សហការី KBN-LIVE.com