BYD បានរៀបចំពិធីសម្ពោធដាក់លក់ជាផ្លូវការនូវ Sealion 6 EV FLASH Charge Edition នៅ BYD & Denza Flagship Showroom ក្នុងរាជធានីភ្នំពេញកាលពីនៅថ្ងៃទី 20 ខែកញ្ញា 2026។
រថយន្ត SUV អគ្គិសនីសុទ្ធខ្នាតមធ្យមនេះ ដែលបំពាក់ដោយ ថ្ម Blade battery ជំនាន់ទី 2 និងបច្ចេកវិទ្យា FLASH Charge បានចូលទីផ្សារកម្ពុជាជាផ្លូវការ ជាមួយតម្លៃលក់ផ្លូវការ 32,800 ដុល្លារ និងបទពិសោធន៍សាកថ្ម “សាក 5 នាទីរួចរាល់, សាក 9 នាទីពេញ” ដោយចូលរួមក្នុងទីផ្សាររថយន្តថាមពលថ្មីរបស់កម្ពុជា ដែលកំពុងឈានចូលដំណាក់កាលរីក ចម្រើនយ៉ាងឆាប់រហ័ស។ ចំណុចលេចធ្លោបំផុតរបស់ Sealion 6 EV FLASH Charge Edition គឺបច្ចេកវិទ្យា FLASH Charge។ ដោយពឹងផ្អែកលើ កំលាំងអគ្គិសនីខ្ពស់ 800V និង ថ្ម Blade battery ជំនាន់ទី 2 រថយន្តអាចសាកថ្មពី 10% ដល់ 70% ក្នុងរយៈពេលត្រឹម 5 នាទី និងសាកដល់ 97% ក្នុងរយៈពេលត្រឹម 9 នាទី។ ដោយប្រើប្រាស់បច្ចេកវិទ្យា FLASH Charge រថយន្ត Sealion 6 EV អាចផ្តល់បទពិសោធន៍សាកថ្មដ៏លឿន ដោយអាចបន្ថែមចម្ងាយបើកបរបានដល់ 700 គីឡូម៉ែត្រ ក្នុងរយៈពេល 9 នាទី។
លោក ដេននី ចាន់ ( Danny Chan ) នាយកប្រតិបត្តិការផ្នែកលក់រថយន្ត BYD អាស៊ីប៉ាស៊ីហ្វិក ប្រចាំប្រទេសកម្ពុជាបានថ្លែងថា ជាដំបូងលោកសូមអរគុណដល់ Harmony iCar ដែលជាអ្នកចែកចាយផ្តាច់មុខរបស់ BYD នៅកម្ពុជា ព្រមទាំងដៃគូសហការដូចជា KHIEV Auto, Golden Star Auto, Modern Auto និងដៃគូផ្សេងទៀត សម្រាប់ការរួមដំណើរជាមួយ BYD ជាបន្តបន្ទាប់ និងការរីកចម្រើនរបស់ម៉ាក BYD ចាប់តាំងពីចូលទីផ្សារកម្ពុជា។ លោកបានបន្តថា ៖ Sealion 6 EV FLASH Charge Edition បំពាក់ដោយ ថ្ម Blade battery ជំនាន់ទី 2 ទំហំ 82.73kWh និងមានចម្ងាយបើកបររហូតដល់ 710 គីឡូម៉ែត្រ តាមស្តង់ដារ CLTC។
ម៉ូទ័រអគ្គិសនីមានកម្លាំង 270kW និងអាចបង្កើនល្បឿនពី 0-100km/h ក្នុងរយៈពេល 7.2 វិនាទី។ ថ្ម Blade battery ជំនាន់ទី 2 (Lithium Iron Phosphate) បានឆ្លងកាត់ការធ្វើតេស្តយ៉ាងតឹងរ៉ឹង រួមមានការធ្វើតេស្ត ចាក់ម្ជុល ខណៈពេលកំពុង FLASH Charge ការប៉ះទង្គិចពីផ្នែកខាងក្រោម និងការធ្វើតេស្តកម្ដៅក្នុងឡសីតុណ្ហភាព 700°C ដោយមិនឆេះ និងមិនផ្ទុះ។
ក្នុងផ្នែកបច្ចេកវិទ្យាឆ្លាតវៃ Sealion 6 EV បំពាក់ដោយប្រព័ន្ធរ៉ាដា និងកាមេរ៉ាជាច្រើន ព្រមទាំងគាំទ្រមុខងារ Adaptive Cruise Control, Lane Keeping Assist និង Intelligent Parking ជាដើម។
តួរថយន្តត្រូវបានបង្កើតឡើងលើ e-Platform 3.0 Evo ដោយប្រើប្រព័ន្ធបូមឯករាជ្យ MacPherson ខាងមុខជាមួយ Dual Ball Joint និង Five-Link ខាងក្រោយ។ រថយន្តក៏បំពាក់ស្តង់ដារនូវប្រព័ន្ធ DiSus-C Intelligent Damping Body Control ដែលអាចកែសម្រួលភាពទន់-រឹងនៃប្រព័ន្ធបូមតាមស្ថានភាពផ្លូវជាក់ស្តែង ដើម្បីផ្តល់ភាពទន់រលូននៅពេលឆ្លងផ្លូវទួលបន្ថយល្បឿន និងរក្សាលំនឹង បានល្អនៅលើផ្លូវមិនស្មើ ដោយរួមបញ្ចូលទាំងផាសុកភាព និងការគ្រប់គ្រងរថយន្ត។
លោកបានបន្ថែមទៀតថា ៖ ដោយសារតម្លៃប្រេងឥន្ធនៈ អន្តរជាតិមាននិន្នាការកើនឡើងជាបន្តបន្ទាប់ ការចាប់អារម្មណ៍ និងការទទួលយករថយន្តអគ្គិសនី របស់អ្នកប្រើប្រាស់ ក្នុងស្រុកក៏កំពុងកើនឡើងផងដែរ។ នៅឆ្នាំ 2024 រាជរដ្ឋាភិបាលកម្ពុជាបានដាក់ចេញ “គោលនយោបាយអភិវឌ្ឍ វិស័យយានយន្តអគ្គិសនី ឆ្នាំ 2024–2030” ដោយកំណត់គោលដៅឱ្យចំនួនរថយន្តថាមពលថ្មីកើនដល់ 30,000 គ្រឿង និងម៉ូតូអគ្គិសនីកើនដល់ 720,000 គ្រឿង នៅឆ្នាំ 2030 ព្រមទាំងមានវិធានការគាំទ្រដូចជា ការលើកលែងពន្ធគយលើរថយន្តអគ្គិសនី ជាដើម ដែលបង្កើតបរិយាកាសគោលនយោបាយ អំណោយផល សម្រាប់ការរីកចម្រើននៃរថយន្តថាមពលថ្មី។
សូមបញ្ជាក់ផងដែរថា BYD បានវិនិយោគ 32 លានដុល្លារ ដើម្បីសាងសង់ រោងចក្រផលិតរថយន្តដឹកអ្នកដំណើរ ថាមពលថ្មីដំបូងរបស់កម្ពុជា នៅក្នុងតំបន់សេដ្ឋកិច្ចពិសេសក្រុងព្រះសីហនុ។ រោងចក្រនេះមានផ្ទៃដី 12 ហិកតា និងមានសមត្ថភាពផលិតប្រចាំឆ្នាំ 10,000 គ្រឿង។
ក្រៅពីនេះ TVET, ក្រុមហ៊ុន BYD និងក្រសួងការងារ និងបណ្តុះបណ្តាលវិជ្ជាជីវៈបានសហការដើម្បីរួមគ្នាបង្កើតកម្មវិធីបណ្តុះបណ្តាលជំនាញរថយន្តថាមពលថ្មី និងរៀបចំការបណ្តុះបណ្តាល ជំនាញបច្ចេកទេសជាប្រចាំ ហើយ BYD បានវិនិយោគទឹកប្រាក់ 6 លានដុល្លារអាមេរិក ដើម្បីសាងសង់មជ្ឈមណ្ឌលគ្រឿងបន្លាស់ដ៏ធំមួយនៅកម្ពុជា ដែលគ្រោងដាក់ឱ្យដំណើរការក្នុងឆ្នាំ 2026។ 
មជ្ឈមណ្ឌលនេះនឹងមានអត្រាផ្គត់ផ្គង់គ្រឿងបន្លាស់រហូតដល់ 99% ដោយអាចដឹកជញ្ជូនគ្រឿងបន្លាស់នៅក្នុងរាជធានីភ្នំពេញ និងទៅកាន់បណ្តាខេត្តបានលឿន ដើម្បីជួយដោះស្រាយតម្រូវការជួសជុលនិងថែទាំរថយន្តរបស់អតិថិជនបានយ៉ាងឆាប់រហ័ស៕
