តារាសម្តែង Guan Xiaotong ដែលទស្សនិកជនមួយចំនួនស្គាល់ថាជាគូស្នេហ៍របស់ Luhan កំពុងទទួលបានការចាប់អារម្មណ៍បន្ទាប់ពីរឿងភាគរ៉ូមែនទិក-អាថ៌កំបាំង «Love You in the Dark» ដែលនាងសម្តែងជាតួឯកជាមួយតារាសម្តែង Chen Xingxu ទើបបញ្ចប់ការថត ហើយរូបភាពថ្មីៗពីរឿងនេះក៏ត្រូវបានបញ្ចេញជាបន្តបន្ទាប់។
ក្នុងរឿងនេះ Guan Xiaotong សម្តែងជាតួ Meng Lusha ដែលជាវិចិត្រករវ័យក្មេងដ៏មានទេពកោសល្យ មានភាពស្រស់ស្អាត និងអាថ៌កំបាំង។ តួអង្គនេះត្រូវបានគេចាត់ទុកថាជាការផ្លាស់ប្តូរពីតួនាទីដែលនាងធ្លាប់សម្តែងជាញឹកញាប់ ដូចជាតួសិស្សសាលា ឬកូនស្រីអ្នកមាន។ អ្វីដែលធ្វើឱ្យអ្នកគាំទ្រចាប់អារម្មណ៍ជាពិសេសគឺរូបភាពថ្មីរបស់ Guan Xiaotong ក្នុងសម្លៀកបំពាក់រ៉ូបវែង ដែលបង្ហាញស្មា និងខ្នងរបស់នាង បង្កើតបាននូវរូបភាពបែបចាស់ទុំ និងទាក់ទាញជាងតួអង្គដែលនាងធ្លាប់សម្តែងកន្លងមក។
«Love You in the Dark» និយាយពីរឿងរ៉ាវស្នេហារវាង Lu Xizhou សម្តែងដោយ Chen Xingxu ដែលជានិស្សិតបណ្ឌិតផ្នែកចិត្តវិទ្យា មកពីគ្រួសារអ្នកមាន និងមានបុគ្គលិកលក្ខណៈស្ងៀមស្ងាត់ ខណៈ Meng Lusha គឺជានារីដែលមានទេពកោសល្យខាងសិល្បៈ។ អ្នកទាំងពីរបានជួបគ្នានៅរាត្រីនិទាឃរដូវមួយដែលមានភ្លៀង ហើយក្រោយមកបានធ្វើដំណើរទៅចក្រភពអង់គ្លេសជាមួយគ្នា។
ដំបូងឡើយ ទំនាក់ទំនងរបស់ពួកគេហាក់ដូចជាស្នេហាដ៏ស្រស់ស្អាត ប៉ុន្តែបន្ទាប់ពីមានការស្លាប់ដ៏អាថ៌កំបាំងរបស់នារីវ័យក្មេងម្នាក់ ស្ថានការណ៍ក៏ចាប់ផ្តើមប្រែប្រួល។ តួអង្គទាំងពីរត្រូវបានទាញចូលទៅក្នុងរឿងរ៉ាវពាក់ព័ន្ធនឹង ការឃុបឃិត ការសងសឹក និងការយល់ច្រឡំ ដែលធ្វើឱ្យទំនាក់ទំនងរបស់ពួកគេប្រឈមនឹងឧបសគ្គជាបន្តបន្ទាប់។ ការផ្លាស់ប្តូរពីតួអង្គបែបយុវវ័យមកកាន់តួអង្គដែលមានភាពចាស់ទុំជាងមុន បានធ្វើឱ្យអ្នកទស្សនាចាប់អារម្មណ៍ថា តើ Guan Xiaotong នឹងបង្ហាញសមត្ថភាពសម្តែងបែបណា ក្នុងតួ ខាងលើនេះ។
Guan Xiaotong គឺជាតារាសម្តែងចិនម្នាក់ដែលមានអ្នកតាមដានច្រើននៅលើ Weibo ជាមួយនឹងតួលេខជាង ៣៦លាននាក់។ នាងក៏ធ្លាប់ទទួលពានរង្វាន់ Best Supporting Actress នៅ Shanghai Television Festival សម្រាប់ការសម្តែងក្នុងរឿង To Be a Better Man និងត្រូវបានជ្រើសរើសចូលបញ្ជី Forbes 30 Under 30 Asia ក្នុងឆ្នាំ ២០១៧៕
