ថៃប្រកាសច្បាប់អាជ្ញាសឹកនៅខេត្តណារ៉ាធិវ៉ាត់ ក្រោយក្រុមបំបែកខ្លួនឆ្មក់វាយប្រហារសម្លា.ប់ទាហាន ៥ នាក់

ស្ថានការណ៍សន្តិសុខនៅភាគខាងត្បូងប្រទេសថៃបានឡើងកម្ដៅ និងកំពុងតានតឹងជាថ្មីម្តងទៀត បន្ទាប់ពីមានហេតុការណ៍វាយប្រហារយ៉ាងសាហាវមួយបានកើតឡើងនៅក្នុងខេត្តណារ៉ាធិវ៉ាត់ (Narathiwat) ដែលបណ្តាលឱ្យទាហានព្រំដែនថៃចំនួន ៥ នាក់បានបាត់បង់ជីវិត និងមនុស្សមួយចំនួនទៀតរងរបួស។ ឆ្លើយតបទៅនឹងការវាយប្រហារដ៏រន្ធត់នេះ អាជ្ញាធរសន្តិសុខថៃបានសម្រេចប្រកាសដាក់តំបន់មួយចំនួនក្នុងខេត្តនេះឱ្យស្ថិតក្រោមច្បាប់អាជ្ញាសឹកជាបន្ទាន់ ដើម្បីបើកប្រតិបត្តិការតាមប្រមាញ់ក្រុមជនដៃដល់។ នេះបើតាមសារព័ត៌មាន ខាវស៊ត បានផ្សាយនៅថ្ងៃទី២៤ ខែកក្ដដា ឆ្នាំ ២០២៦។

តាមសេចក្តីរាយការណ៍ពីអាជ្ញាធរមូលដ្ឋាន បានឱ្យដឹងថា ហេតុការណ៍នេះបានកើតឡើងកាលពីថ្ងៃទី២២ ខែកក្ដដា នៅពេលដែលក្រុមប្រដាប់អាវុធបំបែកខ្លួនមួយក្រុម ដែលមានសមាជិកប្រហែល ១០ នាក់ បានធ្វើការឆ្មក់វាយប្រហារយ៉ាងទាន់ហោសទៅលើប៉ុស្តិ៍ត្រួតពិនិត្យសន្តិសុខមួយកន្លែង។ ក្រុមប្រដាប់អាវុធទាំងនោះបានប្រើប្រាស់កាំភ្លើងសង្គ្រាម រួមជាមួយគ្រាប់បែកកែច្នៃ គប់ និងបាញ់ស្រោចទៅលើកងកម្លាំងប្រចាំការ ដោយមិនបានឱ្យដឹងខ្លួនមុនឡើយ ដែលបណ្ដាលឲ្យទាហានប៉ារ៉ាថៃ ៥នាក់ បាត់បង់ជីវិត និងរងរបួសជនស៉ីវិល ៦នាក់ រូមទាំងកុមារ ២នាក់។

ភ្លាមៗបន្ទាប់ពីកើតហេតុការណ៍នេះ បញ្ជាការប្រតិបត្តិការសន្តិសុខផ្ទៃក្នុងតំបន់ ៤ របស់ថៃ បានសម្រេចប្រកាសអនុវត្តច្បាប់អាជ្ញាសឹកគ្របដណ្តប់លើស្រុកទាំង ១៣ ក្នុងខេត្តនរាធិវាស។ ការដាក់ច្បាប់អាជ្ញាសឹកនេះ ផ្តល់អំណាចពេញលេញដល់កងកម្លាំងយោធាក្នុងការបិទខ្ទប់តំបន់សង្ស័យ ឆែកឆេរលំនៅឋាន និងឃាត់ខ្លួនបុគ្គលណាដែលសង្ស័យថាមានពាក់ព័ន្ធនឹងក្រុមបំបែកខ្លួន ដោយមិនបាច់មានដីកាចាប់ខ្លួនពីតុលាការឡើយ។

បន្ថែមពីនេះ នាយករដ្ឋមន្ត្រីថៃបានចេញមុខថ្កោលទោសយ៉ាងដាច់អហង្ការចំពោះការវាយប្រហារនេះ ដោយចាត់ទុកថាជាអំពើភេរវកម្មដ៏ឃោរឃៅដែលតម្រង់ទិសដៅលើកងកម្លាំងការពារជាតិ និងបានបញ្ជាឱ្យអាជ្ញាធរសន្តិសុខបង្កើនកិច្ចការពារនៅតាមព្រំដែន ព្រមទាំងប្រមូលផ្តុំកម្លាំងដើម្បីតាមស្វែងរកកាត់ទោសក្រុមប្រដាប់អាវុធទាំងនោះឱ្យបានឆាប់រហ័សបំផុត៕